Freezer Coin Trick: సోషల్ మీడియాలో అప్పుడప్పుడు కొన్ని వింత చిట్కాలు కనిపిస్తుంటాయి. వినడానికి ఇవి వింతగా అనిపించినా, వాటి వల్ల కలిగే ప్రయోజనాలు మాత్రం మనల్ని ఆశ్చర్యపరుస్తాయి. అలాంటి ఒక అద్భుతమైన ట్రిక్ గురించి ఇప్పుడు తెలుసుకుందాం. దీని కోసం మీరు పెద్దగా కష్టపడాల్సిన అవసరం లేదు. కేవలం మీ ఇంట్లోని ఫ్రిజ్ ఫ్రీజర్లో 1 రూపాయి నాణెం (కాయిన్) ఉంచితే సరిపోతుంది. ఫ్రీజర్లో కాయిన్ పెట్టడం ఏంటి? అని ఆశ్చర్యపోకండి. ఇది మీ ఆరోగ్యాన్ని కాపాడటంలో కీలక పాత్ర పోషిస్తుంది.
ఏమిటి ఈ ‘ఫ్రీజర్ కాయిన్ ట్రిక్’?
మనం ఎక్కడికైనా ఊరికి వెళ్లినప్పుడు లేదా ఇంట్లో లేనప్పుడు కరెంటు ఎన్ని గంటల పాటు పోయింది అనేది తెలుసుకోవడానికి ఇది ఒక స్మార్ట్ పద్ధతి. ఫ్రిజ్లో నిల్వ ఉంచిన ఆహారం తినడానికి సురక్షితంగా ఉందో లేదో ఈ ట్రిక్ ద్వారా నిర్ధారించుకోవచ్చు. సాధారణంగా మనం 1-2 రోజులు బయటికి వెళ్లినప్పుడు ఇంట్లో పవర్ కట్ అయితే, ఫ్రిజ్లోని పదార్థాలు పాడయ్యే అవకాశం ఉంటుంది. ఆ ఆహారం తింటే అనారోగ్యం పాలవుతాము. ఈ కాయిన్ ట్రిక్ ఆ ప్రమాదాన్ని ముందే పసిగడుతుంది.
ఈ ట్రిక్ను ఎలా ఉపయోగించాలి?
- ఒక కప్పులో నీళ్లు నింపండి.
- ఆ కప్పును ఫ్రీజర్లో పెట్టి, నీరు పూర్తిగా గడ్డకట్టే వరకు ఉంచండి.
- గడ్డకట్టిన మంచు పైన ఒక రూపాయి నాణెం ఉంచండి.
- ఇప్పుడు ఆ కప్పును అలాగే ఫ్రీజర్లో వదిలేయండి.
దీని ఫలితం ఎలా ఉంటుంది?
నాణెం మంచు పైనే ఉంటే: మీరు తిరిగి వచ్చినప్పుడు నాణెం మంచు పైనే ఉంటే కరెంటు అస్సలు పోలేదని లేదా చాలా తక్కువ సమయం మాత్రమే పోయిందని అర్థం. ఫ్రిజ్లోని ఆహారం సురక్షితంగా ఉందని దీని అర్థం.
నాణెం మధ్యలో ఉంటే: నాణెం కొంచెం లోపలికి దిగి ఉంటే కొంత సమయం పాటు కరెంటు పోయిందని, మంచు కొద్దిగా కరిగి మళ్లీ గడ్డకట్టిందని అర్థం.
నాణెం కప్పు అడుగున ఉంటే: ఒకవేళ నాణెం కప్పు అడుగు భాగానికి చేరుకుంటే చాలా సేపటి వరకు కరెంటు లేదని అర్థం. దీనివల్ల మంచు పూర్తిగా కరిగి నాణెం కిందకు పడిపోయింది. ఇలా జరిగితే ఫ్రిజ్లోని ఆహారం పాడైపోయి ఉంటుందని, అది తినడం అస్సలు క్షేమం కాదని గుర్తించాలి.
పాడైన ఆహారం విషతుల్యం కావచ్చు!
కలుషితమైన లేదా పాడైన ఆహారం తీసుకోవడం వల్ల స్టమక్ ఇన్ఫెక్షన్ వచ్చే ప్రమాదం ఉంది. దీనివల్ల పేగుల్లో బ్యాక్టీరియా చేరి కడుపు నొప్పి, వాంతులు, విరేచనాలు, జ్వరం, నీరసం వంటి సమస్యలు తలెత్తుతాయి. అందుకే మీరు ఊరికి వెళ్లేటప్పుడు ఈ చిన్న ట్రిక్ను తప్పకుండా పాటించండి. మీ ఆరోగ్యాన్ని కాపాడుకోండి.