. జీర్ణక్రియ లోపాలు..పిగ్మెంటేషన్కు మూలం
. హార్మోన్లు, ఒత్తిడి ప్రభావం ఎంతటి తీవ్రం?
. నిద్ర లోపమే చర్మానికి శత్రువు
Pigmentation : మనం రోజూ ఎదుర్కొనే చర్మ సంబంధిత సమస్యల్లో పిగ్మెంటేషన్ ఒక ప్రధాన సమస్య. ముఖంపై మెడపై లేదా చేతులపై కనిపించే మచ్చలను చాలామంది చర్మ ఉపరితలంపై ఏర్పడే సాధారణ సమస్యగా భావిస్తారు. వాటిని తగ్గించుకోవడానికి క్రీములు, సీరమ్స్, ఫేస్ ప్యాక్లు, ఇంటి చిట్కాలు ఇలా ఎన్నో ప్రయత్నాలు చేస్తుంటారు. కొంతవరకూ ఫలితం కనిపించినా కాలక్రమంలో మచ్చలు మళ్లీ తిరిగి రావడం చాలా మందికి నిరాశను కలిగిస్తుంది. అయితే వైద్య నిపుణులు చెప్పేదేమిటంటే పిగ్మెంటేషన్ కేవలం చర్మానికి సంబంధించిన సమస్య మాత్రమే కాదు..ఇది మన శరీర అంతర్గత ఆరోగ్య స్థితిని కూడా తెలియజేసే ఒక సంకేతం.
పిగ్మెంటేషన్తో బాధపడే చాలామందిలో జీర్ణక్రియ సరిగ్గా లేకపోవడం పోషకాల శోషణ తగ్గిపోవడం గమనించబడిందని పరిశోధనలు చెబుతున్నాయి. జీర్ణక్రియ బాగా లేనప్పుడు చర్మానికి అవసరమైన విటమిన్లు, ఖనిజాలు అందవు. దీంతో చర్మం తనను తాను రిపేర్ చేసుకునే శక్తిని కోల్పోతుంది. ఫలితంగా మచ్చలు అలాగే ఉండిపోతాయి లేదా మరింత ముదిరిపోతాయి. వైద్యుల సూచన ప్రకారం రోజూ ఇంట్లో వండిన తాజా ఆహారమే తీసుకోవాలి. ఆహారాన్ని నెమ్మదిగా బాగా నమిలి తినాలి. పొట్ట పూర్తిగా నిండేలోపే అంటే 80 శాతం నిండగానే భోజనం ఆపేయడం మంచిది. కాలేయం శరీరంలోని వ్యర్థాలను సరిగా తొలగించలేకపోతే పిగ్మెంటేషన్ మొండిగా మారుతుందని నిపుణులు హెచ్చరిస్తున్నారు.
పిగ్మెంటేషన్ తిరిగి తిరిగి రావడానికి ప్రధాన కారణాల్లో హార్మోన్ల అసమతుల్యత ఒకటి. ఇన్సులిన్ నిరోధకత ఈస్ట్రోజన్ స్థాయిలు అధికంగా ఉండడం కార్టిసాల్ అసమతుల్యత వంటి అంశాలు మెలనిన్ ఉత్పత్తిని మెల్లగా పెంచుతాయి. దీని వల్ల మచ్చలు తగ్గినట్టు అనిపించినా మళ్లీ ఉధృతంగా కనిపిస్తాయి. అలాగే అధిక ఒత్తిడి శరీరంలో వాపును పెంచుతుంది. ఈ వాపు కూడా పిగ్మెంటేషన్ కణాలను ప్రేరేపిస్తుంది. కాబట్టి రోజూ శ్వాస వ్యాయామాలు చేయడం నడక లేదా తేలికపాటి వ్యాయామాలు అలవాటు చేసుకోవడం చాలా అవసరం. ఆహారంలో పండ్లు, కూరగాయలు, ప్రోటీన్ ఎక్కువగా ఉండేలా చూసుకోవాలి. శుద్ధి చేసిన చక్కెరను తగ్గించడం కూడా కీలకం.
సైన్స్ ప్రకారం నిద్ర సిర్కాడియన్ రిథమ్, మెలనిన్ ఉత్పత్తి మధ్య బలమైన సంబంధం ఉంది. నిద్రలేమి వల్ల ఆక్సీకరణ ఒత్తిడి పెరుగుతుంది. ఇది ఇన్సులిన్ నిరోధకతను కార్టిసాల్ స్థాయిలను మరింత పెంచుతుంది. ఫలితంగా పిగ్మెంటేషన్ తీవ్రత ఎక్కువవుతుంది. వైద్యులు సూచించేది రోజుకు కనీసం 6 నుంచి 8 గంటల నిద్ర తప్పనిసరి. ప్రతిరోజూ ఒకే సమయానికి నిద్రపోవడం, మేల్కొనడం అలవాటు చేసుకోవాలి. రాత్రి వేళ స్క్రీన్ వినియోగాన్ని తగ్గించాలి. మనం నిద్రిస్తున్నప్పుడే చర్మానికి అసలు మరమ్మత్తు జరుగుతుంది. కాబట్టి పిగ్మెంటేషన్ తగ్గాలంటే కేవలం బయట చికిత్సలపై ఆధారపడకుండా జీర్ణక్రియ, హార్మోన్లు, ఒత్తిడి, నిద్ర అన్నింటినీ సమతుల్యంలో ఉంచుకోవాల్సిందే అని వైద్యులు స్పష్టం చేస్తున్నారు.