Red Hibiscus Flowers : తెలుగు ఇంటి ఆవరణల్లో తరచుగా కనిపించే మొక్కలలో మందార (హిబిస్కస్) చెట్టు ఒకటి. ముఖ్యంగా ఎరుపు రంగు పువ్వులతో ఉండే మందార మొక్కలు చూసేందుకు ఎంతో అందంగా కనిపిస్తాయి. అయితే అందం మాత్రమే కాదు, ఈ పువ్వులు ఆరోగ్య పరంగా కూడా అనేక ప్రయోజనాలను అందిస్తాయని ఆయుర్వేద నిపుణులు చెబుతున్నారు. ముఖ్యంగా జుట్టుకు ఇది ఓ ప్రకృతి వరం అని చెప్పవచ్చు.
మందార పువ్వులో ఉన్న పోషక విలువలు
ఎరుపు రంగు మందార పువ్వుల్లో విటమిన్లు, అమైనో ఆమ్లాలు, యాంటీ ఆక్సిడెంట్లు అధికంగా ఉండటం వలన ఇవి జుట్టుకు అవసరమైన పోషణను అందిస్తాయి. ఇవి శిరోజాల వృద్ధిని పెంచడమే కాదు, వెంట్రుకలు దృఢంగా మారేలా చేస్తాయి. చుండ్రు నివారణలోనూ ఎంతో సహాయపడతాయి. ఈ పువ్వులతో తయారు చేసే ఆయుర్వేద నూనెను వాడటం ద్వారా జుట్టు ఒత్తుగా, పొడవుగా పెరిగే అవకాశముంది.
మందార పువ్వుతో నూనె తయారీ విధానం
5 నుంచి 6 తాజా మందార పువ్వులను శుభ్రంగా కడిగి మెత్తటి పేస్ట్లా చేయాలి. ఓ కప్పు కొబ్బరినూనెను తక్కువ మంటపై వేడి చేసి, అందులో ఈ పేస్ట్ను కలపాలి. 10 నిమిషాల పాటు నెమ్మదిగా మరిగించాలి. నూనె లాలారంగులోకి మారిన తర్వాత స్టవ్ ఆఫ్ చేయాలి. చల్లారిన తర్వాత వడకట్టి సీసాలో నిల్వ చేయాలి. ఈ నూనెను వారానికి కనీసం రెండు సార్లు జుట్టుకు మర్దన చేయడం ద్వారా శిరోజాలు ఆరోగ్యంగా మారతాయి.
పెరుగు – మందార మిశ్రమం
మందార పేస్ట్లో కొద్దిగా పెరుగు కలిపి జుట్టుకు పట్టించి 30 నిమిషాల తరువాత తలస్నానం చేస్తే, వెంట్రుకలకు తేమ అందుతుంది. ఈ చిట్కా పొడిబారిన జుట్టు సమస్యను తగ్గిస్తుంది. వెంట్రుకలు చిట్లకుండా, మెత్తగా మారతాయి.
గుజ్జుతో కలబంద మిశ్రమం
2 టేబుల్ స్పూన్ల మందార పువ్వుల గుజ్జులో అంతే పరిమాణంలో కలబంద గుజ్జు వేసి బాగా కలిపి జుట్టు కుదుళ్లకు అప్లై చేయాలి. 30 నిమిషాల తర్వాత తలస్నానం చేయాలి. ఇది కుదుళ్ల ఆరోగ్యాన్ని మెరుగుపరచి చుండ్రును తగ్గిస్తుంది.
మందార నీటితో తలస్నానం
తాజా మందార పువ్వులను నీటిలో మరిగించి చల్లార్చిన తరువాత ఆ నీటిని తలపై రాయాలి. ఇది తలలో ఉండే దురదను తగ్గించి చుండ్రు నివారణలో సహాయపడుతుంది. శిరోజాలు కాంతివంతంగా కనిపిస్తాయి.
ఉసిరిక పొడి మరియు మందార మిశ్రమం
ఉసిరిక పొడిలో మందార పేస్ట్ను కలిపి, ఈ మిశ్రమాన్ని జుట్టుకు పట్టించి 60 నిమిషాల తరువాత తలస్నానం చేయాలి. ఈ చిట్కా జుట్టు రాలడాన్ని తగ్గించి తెల్ల జుట్టును సహజ నలుపుగా మార్చే అవకాశం ఉంది. ఉసిరిక పొడిలో ఉండే విటమిన్ సి జుట్టుకు అవసరమైన కొల్లాజెన్ను ఉత్పత్తి చేస్తుంది. ఈ విధంగా ఎరుపు రంగు మందార పువ్వులను వివిధ రకాలుగా ఉపయోగించడం వల్ల శిరోజాల ఆరోగ్యాన్ని మెరుగుపరచుకోవచ్చు. సహజ చిట్కాలతో జుట్టు పొడిబారడం, చుండ్రు, జుట్టు రాలడం లాంటి సమస్యలను నివారించవచ్చు. ఆయుర్వేద నిపుణుల సూచనల ప్రకారం ఈ పద్ధతులను అనుసరించడం వలన జుట్టు ఒత్తుగా, బలంగా మారి ప్రకాశవంతంగా కనిపిస్తుంది.