మావోయిస్టు ఉద్యమంలో కీలక పాత్ర పోషించిన అగ్రనేతలు మల్లోజుల వేణుగోపాల్, ఆశన్న (Mallojula Venugopal, Ashanna)ఇటీవల ఆయుధాలతో అధికారుల ముందుకు లొంగిపోయిన విషయం తెలిసిందే. ఈ లొంగుబాటుతో మావోయిస్టు శ్రేణుల్లో కలకలం రేగింది. దశాబ్దాలుగా అడవుల్లో గెరిల్లా యుద్ధం సాగించిన ఈ ఇద్దరు నేతలు, శాంతి మార్గంలోకి వచ్చి సాధారణ జీవితాన్ని ప్రారంభించాలనే నిర్ణయం తీసుకోవడం ప్రభుత్వం దృష్టిలో పెద్ద విజయం అని భావిస్తున్నారు. ఈ నేపథ్యంలో, వారి భద్రతపై సీరియస్గా ఆలోచించిన కేంద్రం, వారికి ‘Y’ కేటగిరీ సెక్యూరిటీ కల్పించాలని నిర్ణయించినట్లు విశ్వసనీయ సమాచారం బయటకు వచ్చింది.
Ovarian Cancer: సైలెంట్ కిల్లర్.. పెరుగుతున్న అండాశయ క్యాన్సర్ కేసులు
ఇదిలా ఉండగా.. ఈ ఇద్దరు నేతలు లొంగిపోవడంపై మావోయిస్టు సంస్థ తీవ్ర ఆగ్రహం వ్యక్తం చేసింది. ‘నమ్మకద్రోహం’ చేశారని, తాము వారిని క్షమించబోమని మావోయిస్టు అధికార ప్రతినిధి ‘అభయ్’ పేరిట ఒక లేఖ విడుదల చేశారు. అందులో “వాళ్లు తాము పొందిన నమ్మకాన్ని తాకట్టు పెట్టారని, ఉద్యమాన్ని ధిక్కరించినందుకు తగిన శిక్ష తప్పదని” పేర్కొంది. ఈ హెచ్చరికతో భద్రతా సంస్థలు అప్రమత్తమయ్యాయి. ఎందుకంటే, గతంలో లొంగుబాటుకు వచ్చిన మావోయిస్టు నేతలపై ప్రతీకార దాడులు జరిగిన ఉదాహరణలు ఉన్నాయి.
ఈ పరిణామాలన్నింటిని పరిగణనలోకి తీసుకున్న కేంద్ర గృహ మంత్రిత్వ శాఖ, మల్లోజుల వేణుగోపాల్, ఆశన్న భద్రతను పెంచాలని నిర్ణయించింది. వారికి ‘Y’ కేటగిరీ సెక్యూరిటీ ఇవ్వడం ద్వారా ఎల్లప్పుడూ సెంట్రల్ ఫోర్స్ సిబ్బంది రక్షణగా ఉంటారు. అధికారులు భావిస్తున్నారు – వీరిద్దరిపై దాడి జరిగితే, అది ప్రభుత్వంపై చెడ్డపేరు తెస్తుందని, మిగతా మావోయిస్టుల లొంగుబాట్లపై ప్రతికూల ప్రభావం చూపుతుందని. అందువల్ల, ఈ చర్యను కేవలం భద్రతా కారణంగానే కాకుండా, భవిష్యత్లో మావోయిస్టుల సమర్పణా విధానాన్ని బలోపేతం చేసే వ్యూహాత్మక నిర్ణయంగా కేంద్రం చూస్తోంది.