దేశంలోని కేబుల్ బ్రిడ్జ్ నిర్మాణాలలో మరో కీలక మైలురాయిగా నిలిచే వంతెన కర్ణాటకలో నిర్మాణం పూర్తిచేసుకొని ప్రయాణికులకు అందుబాటులోకి వచ్చింది. శివమొగ్గ జిల్లా సిగందూర్ సమీపంలోని శరావతి నది(Sharavathi in Shivamogga )పై నిర్మించిన ఈ కేబుల్ బ్రిడ్జి(India’s Second Longest Cable )ని కేంద్ర రవాణా శాఖ మంత్రి నితిన్ గడ్కరీ అధికారికంగా ప్రారంభించారు. ఈ కార్యక్రమంలో పలువురు రాష్ట్ర మంత్రులు, ప్రజా ప్రతినిధులు పాల్గొన్నారు. ఇది దేశంలోనే రెండో అతిపెద్ద కేబుల్ బ్రిడ్జిగా గుర్తింపు పొందింది.
ఈ వంతెన నిర్మాణానికి సుమారు రూ.473 కోట్ల వ్యయం జరిగింది. బ్రిడ్జి మొత్తం పొడవు 2.14 కిలోమీటర్లు కాగా, వెడల్పు 16 మీటర్లుగా ఉంది. ఇందులో 740 మీటర్ల వరకూ కేబుల్ ఆధారిత నిర్మాణంగా వుంటుంది. ఈ బ్రిడ్జి ద్వారా శరావతి బ్యాక్ వాటర్ను దాటి వెళ్లే వాహనదారులకు, స్థానికులకు పెద్దగా ప్రయోజనం చేకూరనుంది. ఈ వంతెన భౌగోళికంగా కూడికలేని ప్రాంతాలను కలుపుతూ, పరిసర గ్రామాలకు మెరుగైన రవాణా సౌకర్యాలను అందిస్తుంది.
Medak : కాంగ్రెస్ యువ నాయకుని దారుణ హత్య
ఇప్పటి వరకు దేశంలో గుజరాత్లోని ఒఖా-బేట్ ద్వారక మధ్య నిర్మించిన సుదర్శన్ సేతు కేబుల్ బ్రిడ్జి (పొడవు: 2.32 కి.మీ)నే అత్యంత పొడవైనదిగా ఉంది. శరావతిపై నిర్మితమైన ఈ వంతెన ప్రస్తుతం రెండో స్థానాన్ని దక్కించుకుంది. రవాణా మౌలిక సదుపాయాల విస్తరణలో భాగంగా కేంద్ర ప్రభుత్వం చేపట్టిన ఈ ప్రాజెక్ట్ ప్రాధాన్యతను కలిగినదిగా భావిస్తున్నారు. బ్రిడ్జి ప్రారంభంతో రాష్ట్రానికి కొత్త అభివృద్ధి మార్గాలు తెరుచుకున్నట్టు నితిన్ గడ్కరీ వ్యాఖ్యానించారు.
ఈ బ్రిడ్జి నిర్మాణం ద్వారా కేవలం ప్రయాణ సౌకర్యాలే కాకుండా పర్యాటక అభివృద్ధికీ దోహదం చేయనుంది. శరావతి బ్యాక్ వాటర్ ప్రాంతానికి వచ్చే పర్యాటకులు ఇకపై సురక్షితంగా ఈ వంతెన ద్వారా ప్రయాణించగలుగుతారు. ప్రాంతీయ ఆర్ధిక కార్యకలాపాలు, వ్యాపార అభివృద్ధికి ఇది బలమైన మద్దతు అందిస్తుందని అధికారులు ఆశాభావం వ్యక్తం చేస్తున్నారు. ఇలాంటి ప్రాజెక్టుల ద్వారా దేశ మౌలిక నిర్మాణాల్లో పురోగతి కొనసాగుతుందని కేంద్ర ప్రభుత్వం పేర్కొంది.