Modi China Tour : దేశాల మధ్య శాశ్వత మిత్రత్వం లేదా శాశ్వత శత్రుత్వం అనే భావనకు తావులేదని, అంతర్జాతీయ సంబంధాల్లో శాశ్వత ప్రయోజనాలే వాస్తవం అని రక్షణ శాఖ మంత్రి రాజ్నాథ్ సింగ్ స్పష్టం చేశారు. జాతీయ మీడియాలో నిర్వహించిన ఒక ప్రముఖ సదస్సులో పాల్గొన్న ఆయన మారుతున్న గ్లోబల్ డైనమిక్స్, భారత్ స్వావలంబన దిశగా తీసుకుంటున్న అడుగులపై తన అభిప్రాయాలను వెల్లడించారు. ప్రపంచం వేగంగా మారుతోంది. ప్రతి దేశం తన ప్రయోజనాల దృష్ట్యా వ్యూహాలు మార్చుకుంటోంది. అలాంటి పరిణామాల్లో మిత్రుడైనా, శత్రువైనా శాశ్వతం కాదు. శాశ్వతంగా ఉండేది కేవలం దేశ ప్రయోజనాలే అని ఆయన వ్యాఖ్యానించారు.
ఆత్మనిర్భరత అవసరమైంది
రాజ్నాథ్ సింగ్ మాట్లాడుతూ..భారత్ రక్షణ రంగంలో విదేశాలపై ఆధారపడడం అనేది ఈ రోజుల్లో వ్యూహాత్మకంగా సరికాదు. ఆత్మనిర్భర భారత్ే భవిష్యత్. రక్షణ రంగంలో స్వావలంబన మన ఆర్థిక వ్యవస్థ, భద్రత రెండు కోణాల్లోను అత్యవసరం. 2014లో మన రక్షణ ఎగుమతుల విలువ రూ.700 కోట్లే. ప్రస్తుతం అది రూ.24,000 కోట్లకు చేరుకుంది. ఇది భారత్ ఇక కొనుగోలుదారుగా కాకుండా, ఎగుమతిదారుగా మారుతుందని సూచిస్తోంది.
భౌగోళిక రాజకీయాల మలుపులు
పహల్గాం ఉగ్రదాడి, ఆపరేషన్ సిందూర్ తదుపరి పరిణామాలు, అమెరికా మాజీ అధ్యక్షుడు ట్రంప్ విధించిన సుంకాల ప్రభావం, అలాగే ప్రస్తుత మోడీ చైనా పర్యటన నేపథ్యంలో భారత్ తన వ్యూహాలను మెల్లిగా మార్చుకుంటోందని ఆయన పేర్కొన్నారు. డొనాల్డ్ ట్రంప్ అమెరికా అధ్యక్షుడిగా ఉండగా, భారత్ను మిత్ర దేశంగా పేర్కొన్నప్పటికీ, ఒకవైపు భారత్పై సుంకాలు విధించడాన్ని మరిచిపోకూడదు. ముడి చమురు కొనుగోళ్ల విషయంలో రష్యాతో సంబంధాలపై ఒత్తిడులు ఎదురయ్యాయి. ఇవే మారుతున్న అంతర్జాతీయ రాజకీయాలకు ఉదాహరణలు అని అన్నారు.
దేశ ప్రయోజనాలే లక్ష్యం
మన శత్రువు ఎవరు? మన మిత్రుడు ఎవరు? అనే ప్రశ్నలకన్నా… మన ప్రయోజనం ఏమిటి? అనే ప్రశ్న ముఖ్యం. రైతు, వ్యాపారవేత్త, శాస్త్రవేత్త, సైనికుడు అందరి ప్రయోజనాలే దేశ ప్రయోజనాలుగా భావించాలి. వాటికే ప్రభుత్వం కట్టుబడి ఉండాలి.
స్వదేశీ శక్తితో భారత్ దూసుకుపోతోంది
అత్యాధునిక సాంకేతిక పరిజ్ఞానం, స్వదేశీ ఆయుధ వ్యవస్థలు ఆధారంగా మన బలగాలు లక్ష్యాలపై అత్యంత కచ్చితంగా దాడులు జరిపిన సందర్భాలను ఆయన గుర్తు చేశారు. ఈ విజయాలు దూరదృష్టికి, సమన్వయానికి నిదర్శనంగా నిలుస్తున్నాయి. అలాంటి సన్నద్ధత లేకుండా ఎలాంటి మిషన్ సఫలీకృతం కాదు అని స్పష్టం చేశారు.
చైనా పర్యటనకు ప్రాధాన్యం
ఈ తరుణంలోనే, ఏడు ఏళ్ల అనంతరం ప్రధాని నరేంద్ర మోడీ చేపట్టిన చైనా పర్యటన విశేష ప్రాధాన్యం సంతరించుకుంది. గడచిన కొన్ని సంవత్సరాల్లో చైనా-భారత్ సంబంధాల్లో ఉద్రిక్తతలు నెలకొన్న నేపథ్యంలో, ఈ పర్యటనను వ్యూహాత్మక పరిణామంగా పరిగణిస్తున్నారు.