దేశంలోనే మొట్టమొదటి హైడ్రోజన్‌ రైలు పరుగులు పెట్టేందుకు రెడీ అవుతోంది

Hydrogen Powered Train భారతదేశ మొట్టమొదటి హైడ్రోజన్ రైలు త్వరలోనే పట్టాలెక్కనుంది. ఇప్పటికే ఈ హైడ్రోజన్ రైలు సిద్ధం కాగా.. హర్యానాలోని జింద్-సోనిపట్ మధ్య 90 కిలోమీటర్ల మార్గంలో జనవరి 26వ తేదీన ట్రయల్ రన్ ప్రారంభించనుంది. గంటకు 150 కిలోమీటర్ల వేగంతో పరుగులు పెట్టే ఈ అత్యాధునిక రైలు.. కాలుష్యాన్ని సున్నాకు తగ్గిస్తూ పర్యావరణ విప్లవానికి నాంది పలకనుంది. ఈ హైడ్రోజన్ రైలు అందుబాటులోకి వస్తే.. జర్మనీ, చైనా వంటి దేశాల తర్వాత ఈ టెక్నాలజీని సొంతం చేసుకున్న దేశాల్లో భారత్ ఒకటిగా నిలవనుంది.

పర్యావరణ హితమైన రవాణా దిశగా భారత రైల్వే శాఖ మరో భారీ ముందడుగు వేసింది. దేశంలోనే తొలి హైడ్రోజన్ ఆధారిత రైలును పట్టాలెక్కించేదుకు సర్వం సిద్ధం చేసింది. ఈ చారిత్రాత్మక ఘట్టానికి హర్యానాలోని జింద్ నగరం వేదిక కాబోతోంది. ఈ హైడ్రోజన్ రైలు హర్యానాలోని జింద్, సోనిపట్ మధ్య 90 కిలోమీటర్ల మేర ప్రయాణించనుంది. ఈ హైడ్రోజన్ రైలు గరిష్టంగా గంటకు 110 కిలోమీటర్ల నుంచి 150 కిలోమీటర్ల వేగంతో ప్రయాణించగలదని రైల్వే శాఖ వర్గాలు వెల్లడించాయి. ఈ వేగం ప్రస్తుతం అందుబాటులో ఉన్న డీజిల్ రైళ్ల కంటే వేగంగా గమ్యస్థానాన్ని చేరుకుంటుంది. జనవరి 26వ తేదీన గణతంత్ర దినోత్సవం సందర్భంగా ఈ హైడ్రోజన్ రైలు తొలి ట్రయల్ రన్ ప్రారంభం కానుందని సంబంధిత వర్గాల ద్వారా తెలుస్తోంది.

హైడ్రోజన్ రైలు ఎలా పనిచేస్తుంది?

ఈ హైడ్రోజన్ రైలు నీటి నుంచి ఇంధనాన్ని తయారు చేసుకుని పరుగులు తీస్తుంది. ఈ రైలుకు అవసరమైన హైడ్రోజన్ ఇంధనం కోసం జింద్‌లో ఒక ప్రత్యేక ప్లాంట్‌ను నిర్మించారు. సుమారు 9 లీటర్ల నీటిని విద్యుత్ విశ్లేషణ చేయడం ద్వారా 900 గ్రాముల హైడ్రోజన్‌ను తయారు చేస్తారు. ఈ 900 గ్రాముల హైడ్రోజన్.. రైలును 1 కిలోమీటర్ దూరం నడిపించేందుకు సరిపోతుంది.

ఈ రైలు పొగకు బదులుగా కేవలం నీటి ఆవిరి, వేడిని మాత్రమే విడుదల చేస్తుంది. దీనివల్ల పర్యావరణానికి ఎలాంటి హాని ఉండదని పర్యావరణ నిపుణులు చెబుతున్నారు. అంతేకాకుండా ఈ హైడ్రోజన్ రైలు.. డీజిల్ ఇంజిన్ల లాగా భారీ శబ్దాలు చేయకుండా.. మెట్రో రైలు లాగా చాలా నిశ్శబ్దంగా ప్రయాణిస్తుంది.

హైడ్రోజన్ రైలు విశేషాలు

ఈ హైడ్రోజన్ రైలును తమిళనాడు రాజధాని చెన్నైలోని ఇంటెగ్రల్ కోచ్ ఫ్యాక్టరీ (ఐసీఎఫ్) లో పూర్తి స్వదేశీ టెక్నాలజీతో తయారు చేశారు. ఈ హైడ్రోజన్ రైలులో మొత్తం 10 కోచ్‌లు ఉంటాయి. అందులో 2 డ్రైవింగ్ పవర్ కార్లు, 8 ప్యాసింజర్ కోచ్‌లు ఉంటాయి. ఈ హైడ్రోజన్ రైలు ఒకేసారి సుమారు 2,600 మంది ప్రయాణికులను మోసుకెళ్లగలదు.

అంతేకాకుండా ఈ రైలులో ఆధునిక వసతులను ప్రయాణికులకు అందించనున్నారు. మెట్రో రైళ్ల తరహాలో ఆటోమేటిక్ డోర్లు, డిజిటల్ డిస్‌ప్లేలు, ఏసీ, ఎల్‌ఈడీ లైటింగ్ వంటి అత్యాధునిక సౌకర్యాలు ఉన్నాయి. ప్రాథమిక సమాచారం ప్రకారం.. ఈ రైలు టికెట్ ధర సాధారణ ప్యాసింజర్ రైళ్ల మాదిరిగానే రూ. 5 నుంచి ప్రారంభమై రూ. 25 మధ్య ఉండే అవకాశం ఉందని రైల్వే శాఖ వర్గాల ద్వారా తెలుస్తోంది.