Anil Chauhan : భారత రక్షణ వ్యవస్థను మరింత శక్తిమంతంగా, శత్రు దుర్భేద్యంగా మార్చే దిశగా దేశీయంగా మరో కీలక పరిజ్ఞాన ప్రాజెక్టు రూపుదిద్దుకుంటోంది. ఇజ్రాయెల్ అభివృద్ధి చేసిన ప్రసిద్ధ ‘ఐరన్ డోమ్’ తరహాలో, భారత్ స్వదేశీ టెక్నాలజీతో ‘సుదర్శన చక్ర’ అనే అత్యాధునిక రక్షణ వ్యవస్థను అభివృద్ధి చేస్తోంది. దీనిని 2035 నాటికి పూర్తి స్థాయిలో అమలు చేయనున్నట్లు చీఫ్ ఆఫ్ డిఫెన్స్ స్టాఫ్ (CDS) జనరల్ అనిల్ చౌహాన్ వెల్లడి చేశారు. మధ్యప్రదేశ్ రాష్ట్రంలోని మౌ గ్రామంలో ఉన్న ఆర్మీ వార్ కాలేజ్ వేదికగా తొలిసారిగా నిర్వహించిన త్రివిధ దళాల సదస్సు ‘రణ్ సంవాద్’ సందర్భంగా ఆయన ఈ ప్రకటన చేశారు. “యుద్ధ తంత్రంపై సాంకేతికత ప్రభావం” అనే అంశంపై ప్రసంగిస్తూ, దేశ రక్షణలో టెక్నాలజీ పాత్రపై లోతైన అవగాహన అవసరమని పేర్కొన్నారు.
Read Also: AP News : 18 నెలల బాలుడిపై పైశాచిక దాడి.. ప్రైవేట్ పార్ట్స్ కొరికి చిత్ర హింసలు..
‘సుదర్శన చక్రం’ భారత్ అభివృద్ధి చేస్తున్న తొలి సమగ్ర, మల్టీ-లేయర్డ్, యాక్టివ్ డిఫెన్స్ షీల్డ్ వ్యవస్థ. ఇది కేవలం రక్షణ పాత్రలోనే కాకుండా, ప్రత్యుత్తర దాడులకు కూడా సన్నద్ధంగా ఉంటుందని చెప్పారు. శత్రు క్షిపణులను గమనించడం, వాటిని మధ్యలోనే ఛేదించడం, అవసరమైతే సమర్థవంతంగా నాశనం చేయడం వంటి పనులను ఇది నిర్వహించగలదు. ఈ వ్యవస్థలో కైనెటిక్ అటాక్ ఆయుధాలు, డైరెక్టెడ్ ఎనర్జీ వెపన్స్ (లేజర్ ఆధారిత టెక్నాలజీ) ఉపయోగించబడతాయని వెల్లడించారు. ఈ రక్షణ వ్యవస్థ ముఖ్యంగా దేశంలోని వ్యూహాత్మక, పౌర, మరియు జాతీయ ప్రాముఖ్యత కలిగిన ప్రాంతాలను శత్రు దాడుల నుంచి రక్షించేందుకు రూపొందించబడుతుంది. ప్రధానంగా డ్రోన్లు, క్రూజ్ క్షిపణులు, రాకెట్లు, ఇతర గగన మార్గ అటాక్స్ను ఛేదించే సామర్థ్యం దీనికి ఉంటుంది.
ఈ సందర్భంగా ప్రధానమంత్రి నరేంద్ర మోడీ స్వాతంత్ర్య దినోత్సవ వేడుకల్లో ప్రస్తావించిన ‘సుదర్శన చక్రం’ ప్రాజెక్టును ప్రత్యేకంగా ఉద్దేశిస్తూ చౌహాన్ వివరించారు. ఇది కేవలం ఒక రక్షణ వ్యవస్థ కాదు, భారత్ ఆత్మనిర్భర్ రక్షణ లక్ష్యానికి మూలస్తంభంగా నిలిచే ప్రాజెక్టు. దేశ భద్రతా రంగాన్ని, సాంకేతికతను కలిపే సాంకేతిక అస్త్రం అని ఆయన చెప్పారు. అదేవిధంగా, ఈ సందర్భంగా ఆయన భవిష్యత్తు యుద్ధాల స్వరూపం, భారత సాయుధ దళాల తాత్కాలికతపై సుదీర్ఘంగా ప్రసంగించారు. మారుతున్న యుద్ధ సిద్ధాంతాలు, మానవరహిత వ్యవస్థలు, AI ఆధారిత కమాండ్ అండ్ కంట్రోల్ వ్యవస్థలపై దృష్టి పెట్టాల్సిన అవసరం ఉందని, టెక్నాలజీ ఆధారిత నాయకత్వమే భవిష్యత్తులో గెలుపునిచ్చే శక్తిగా మారుతుందన్నారు. భారత రక్షణ వ్యవస్థలో నిరంతర మార్పులు, నవోత్పత్తులు జరుగుతున్న నేపథ్యంలో ‘సుదర్శన చక్రం’ ప్రాజెక్టు దేశానికి భద్రత పరంగా గర్వకారణంగా మారబోతున్నదనే చెప్పాలి. స్వదేశీ అభివృద్ధితో తయారవుతున్న ఈ సాంకేతిక అస్త్రం, ‘వికసిత భారత్’ లక్ష్య సాధనలో మైలురాయిగా నిలుస్తుందని రక్షణ వర్గాలు అభిప్రాయపడుతున్నాయి.