Sriram Akhand Jyoti : అయోధ్య రామమందిరంలో అఖండ జ్యోతి.. విశేషాలివీ..

Sriram Akhand Jyoti : అయోధ్య రామమందిరంలో జనవరి 22న బాలరాముడి విగ్రహ ప్రాణ ప్రతిష్ఠ అంగరంగ వైభవంగా జరగబోతోంది. శ్రీరాముడి అభిషేక సమయంలో  5 కేజీల అఖండ జ్యోతిని వెలిగించనున్నారు. కంప్లీట్‌గా వెండితో తయారైన అఖండ దీపం అయోధ్యకు చేరుకుంది. దీనికి శ్రీరామ్ అఖండ జ్యోతి అని పేరు పెట్టారు. శైలేంద్ర సోని అనే భక్తుడు రూ.5లక్షల వ్యయంతో దీన్ని తయారు చేయించారు. అఖండ జ్యోతి నిర్మాణంలో 18 గేజ్ వెండి ప్లేట్‌ను వాడటం వల్ల అది బలంగా ఉంటుంది. ఈనెల 16 నుంచి 22 వరకు (వారం రోజుల పాటు) అయోధ్య రామమందిరంలో జరగనున్న రాంలల్లా పవిత్రోత్సవంలో శ్రీరామ్ అఖండ జ్యోతిని ఉపయోగించనున్నారు. రామ్‌లల్లా ప్రాణ ప్రతిష్ట కార్యక్రమం సందర్భంగా వారం పాటు ప్రత్యేక పూజలు కొనసాగుతాయి. ఈ అఖండ జ్యోతిని ఒక్కసారి నెయ్యి నింపి వెలిగిస్తే..  72 గంటల పాటు వెలుగుతుంది. దీని నుంచి వచ్చే పొగ కూడా ఆలయ ప్రాంగణంలోకి వెళ్లదు. ఆ పొగ కూడా అఖండ జ్యోతి లోపలికే వెళ్లేలా తయారుచేశారు. ఈ అఖండ జ్యోతి 25 సంవత్సరాల పాటు ఏమాత్రం పాడవ్వకుండా ఉండగలదని శైలేంద్ర సోని చెప్పారు. ఇది అయోధ్య రామాలయంలో ఎప్పుడూ వెలుగుతూనే ఉంటుంది. ప్రతి రోజూ దీన్ని శుభ్రపరచి నిరంతరం వెలిగేలా చేస్తారని(Sriram Akhand Jyoti) తెలిసింది.