Shubhanshu Shukla : అంతర్జాతీయ అంతరిక్ష కేంద్రం (ఐఎస్ఎస్)ను సందర్శించిన తొలి భారతీయ వ్యోమగామిగా చరిత్రలో నిలిచిన శుభాంశు శుక్లా ఈ రోజు ఉదయం స్వదేశానికి చేరుకున్నారు. ఢిల్లీ అంతర్జాతీయ విమానాశ్రయంలో ఆయనకు ఘన స్వాగతం లభించింది. కేంద్ర మంత్రి డా. జితేంద్ర సింగ్, ఢిల్లీ ముఖ్యమంత్రి రేఖ గుప్తా, ఇస్రో ఛైర్మన్ వి. నారాయణన్, ఇతర ప్రముఖులు ఈ సందర్భంగా హాజరై శుక్లాను సాదరంగా స్వాగతించారు. వారి అభినందనలు, మన్ననలు అందుకున్న శుక్లా విజయచిహ్నం (విక్టరీ సింబల్) చూపుతూ నవ్వులు చిందించారు. ఈ ఘట్టానికి సంబంధించిన వీడియోలు, ఫోటోలు సామాజిక మాధ్యమాల్లో వేగంగా వైరల్ అవుతున్నాయి. శుక్లా అభిమాని వర్గం, అంతరిక్ష పరిశోధనలో ఆసక్తి ఉన్న యువత ఈ విజయం పట్ల గర్వంతో స్పందిస్తున్నారు. శుక్లా మాట్లాడుతూ..ఇది కేవలం వ్యక్తిగత ప్రయాణం కాదు. ఇది దేశం పట్ల నాకు ఉన్న ప్రేమకు, నా శిక్షణను అందించిన ప్రతీ గురువు పట్ల ఉన్న కృతజ్ఞతకు నిదర్శనం అన్నారు. అంతరిక్షంలో గడిపిన క్షణాలు మరిచిపోలేనివిగా పేర్కొంటూ, తన అనుభవాలను దేశంలోని విద్యార్థులతో, శాస్త్రవేత్తలతో, సైనికులతో పంచుకోవాలని ఆకాంక్షించారు.
యాక్సియం – 4 మిషన్‌ లో భాగస్వామ్యం
శుభాంశు శుక్లా యాక్సియం స్పేస్ సంస్థ చేపట్టిన ఏఎక్స్ – 4 (Axiom Mission 4) మిషన్‌లో భాగంగా అంతర్జాతీయ అంతరిక్ష కేంద్రానికి వెళ్లారు. గత ఏడాది ఆయన అమెరికా వెళ్లి, NASA మరియు యాక్సియం ద్వారా ఖచ్చితమైన శిక్షణను అందుకున్నారు. శారీరకంగా, మానసికంగా కఠినమైన ప్రొగ్రామ్‌ను పూర్తి చేసి, 2025లో ఐఎస్ఎస్‌కు ప్రయాణించారు. ఈ మిషన్‌లో ఆయన విజ్ఞాన సంబంధిత ప్రయోగాలు నిర్వహించడంతో పాటు, భారతీయ యువతకు ప్రేరణనిచ్చేలా పలు కార్యక్రమాల్లో పాల్గొన్నారు. అక్కడి అనుభవాలు, శాస్త్రపరమైన విశ్లేషణలు త్వరలో ప్రభుత్వానికి, ఇస్రోకు సమర్పించనున్నట్లు సమాచారం.
#WATCH | Delhi: Group Captain Shubhanshu Shukla arrives back in India. He is welcomed by Union MoS for Science & Technology, Dr Jitendra Singh and Delhi CM Rekha Gupta.#ShubhanshuShukla #ISS #Trending pic.twitter.com/auq5FjXDlM
— TIMES NOW (@TimesNow) August 17, 2025
మోడీతో భేటీ, అంతరిక్ష దినోత్సవం హాజరు
ఈ రోజు సాయంత్రం శుభాంశు శుక్లా ప్రధాని నరేంద్ర మోడీతో ప్రత్యేకంగా సమావేశం కానున్నారు. ప్రధాని మోడీ వ్యక్తిగతంగా శుక్లాకు అభినందనలు తెలపనున్నారని ప్రధాన కార్యాలయ వర్గాలు పేర్కొంటున్నాయి. అంతేకాకుండా, ఈ నెల ఆగస్టు 23న నిర్వహించనున్న జాతీయ అంతరిక్ష దినోత్సవం కార్యక్రమంలో శుభాంశు ముఖ్య అతిథిగా పాల్గొననున్నారు. ఈ వేడుకలో ఆయన తన అనుభవాలు విద్యార్థులతో పంచుకుంటారు. ఈ సందర్భంగా కేంద్ర మంత్రి జితేంద్ర సింగ్ మాట్లాడుతూ..శుభాంశు శుక్లా విజయాన్ని దేశం మొత్తం గర్వంగా భావిస్తోంది. ఇది ‘న్యూ స్పేస్ ఇండియా’కి ఓ స్ఫూర్తిదాయక ఘట్టం. ప్రైవేట్ భాగస్వామ్యం, ప్రభుత్వ ప్రోత్సాహం కలిసి మరిన్ని భారతీయులను అంతరిక్ష ప్రయాణానికి సిద్ధం చేస్తున్నాయి అన్నారు. ఇక, తన ప్రయాణం ఇక్కడితో ముగియదని, ఇది కేవలం ఒక ప్రారంభమని శుభాంశు స్పష్టం చేశారు. భారత అంతరిక్ష పరిశోధనలో కీలక పాత్ర పోషించాలని, తద్వారా దేశ యువతకు మరిన్ని అవకాశాలు కల్పించాలన్నదే తన లక్ష్యమన్నారు.