Reliance Foundation Scholarships : రిలయన్స్ స్కాలర్‌షిప్స్.. పీజీ విద్యార్థులకు రూ.6 లక్షలు, యూజీ విద్యార్థులకు రూ.2 లక్షలు

Reliance Foundation Scholarships : గ్రాడ్యుయేట్, పోస్ట్ గ్రాడ్యుయేట్ కోర్సులు చదువుతున్న ప్రతిభావంతులైన పేద  విద్యార్థులకు  రిలయన్స్ ఫౌండేషన్ స్కాలర్‌షిప్‌లను(Reliance Foundation Scholarships) అందించనుంది. 2024-25 విద్యా సంవత్సరానికిగానూ ఇందుకోసం 5100 మందిని ఎంపిక చేయనుంది. దీనికి సంబంధించిన వివరాలివీ..

తాజాగా ఈ ఏడాది అందించనున్న 5100 స్కాలర్‌షిప్‌లతో  భారత్​లోనే అతిపెద్ద ప్రైవేట్ స్కాలర్‌షిప్‌ ప్రోగ్రామ్‌గా రిలయన్స్ ఫౌండేషన్ స్కాలర్‌షిప్‌ నిలవనుంది. ఇంజినీరింగ్, టెక్నాలజీ, ఎనర్జీ, లైఫ్ సైన్సెస్‌‌లలో గ్రాడ్యుయేషన్, పోస్ట్ గ్రాడ్యుయేషన్ కోర్సులు చేస్తున్న వారికి ఈ ఉపకారవేతనాలను అందిస్తారు. అండర్ గ్రాడ్యుయేట్ విద్యార్థులకు రూ.2 లక్షలు, పోస్ట్ గ్రాడ్యుయేట్ విద్యార్థులకు  రూ.6 లక్షలు స్కాలర్‌షిప్‌గా అందిస్తారు. ఇప్పటి వరకు రిలయన్స్ దేశవ్యాప్తంగా 23,000 ఉన్నత విద్యా స్కాలర్‌షిప్‌లను అందించింది. ఆర్థిక భారం లేకుండా విద్యార్థులు చదువును కొనసాగించేందుకు ఈ స్కాలర్‌షిప్‌లు ఉపయోగపడనున్నాయి. ఈ స్కాలర్‌షిప్‌కు ఎంపికయ్యే వారికి రిలయన్స్ ఫౌండేషన్ తరఫున మెంటార్ షిప్ సపోర్టును కూడా అందిస్తారు. కెరీర్ గైడెన్ సైతం లభిస్తుంది. వర్క్‌షాప్‌లు, సెమినార్ల ద్వారా వారిలో నాయకత్వ, ప్రొఫెషనల్ నైపుణ్యాలను పెంపొందింపజేస్తారు. సామాజిక సేవ సంబంధిత కార్యక్రమాల్లో పాల్గొనేలా విద్యార్థులను ప్రోత్సహిస్తారు.