Rajya Sabha Bypolls: రాజ్యసభ ఉప ఎన్నికల తేదీలను ప్ర‌క‌టించిన ఎన్నిక‌ల సంఘం!

Rajya Sabha Bypolls: భారత ఎన్నికల సంఘం (ఈసీఐ) రాజ్యసభ ఉప ఎన్నికల (Rajya Sabha Bypolls) తేదీలను ప్రకటించింది. పంజాబ్‌లోని ఒక ఖాళీ సీటు, జమ్మూ-కాశ్మీర్‌లోని నాలుగు ఖాళీ సీట్లను భర్తీ చేయడానికి అక్టోబర్ 24, 2025న ఉప ఎన్నికలు జరుగుతాయని ప్ర‌క‌టించింది. పంజాబ్‌లో ఎంపీ సంజీవ్ అరోరా రాజీనామా తర్వాత సీటు ఖాళీ అయింది. జమ్మూ-కాశ్మీర్‌లో నాలుగు సీట్లు ఫిబ్రవరి 2021 నుండి ఖాళీగా ఉన్నాయి.

పంజాబ్‌లో ఉప ఎన్నిక షెడ్యూల్

పంజాబ్‌లోని లూథియానా వెస్ట్ నుండి ఆప్ ఎమ్మెల్యే గుర్‌ప్రీత్ గోగి బస్సి జనవరి 2025లో మరణించారు. దీనికి జూన్ 19, 2025న ఉప ఎన్నిక జరిగింది. ఇందులో రాజ్యసభ ఎంపీ సంజీవ్ అరోరా గెలుపొందారు. అయితే సంజీవ్ అరోరా అసెంబ్లీ ఉప ఎన్నికలో గెలిచిన తర్వాత రాజ్యసభ పదవికి రాజీనామా చేయడంతో ఆ సీటు ఖాళీ అయింది. ఇప్పుడు ఆ ఖాళీ సీటుకు ఉప ఎన్నిక తేదీలను ప్రకటించారు.

ఎన్నికల సంఘం సెప్టెంబర్ 24, 2025న ఉప ఎన్నికను ప్రకటించింది. దీనికి సంబంధించిన నోటిఫికేషన్ అక్టోబర్ 6, 2025న విడుదలవుతుంది. అక్టోబర్ 13 వరకు నామినేషన్లు స్వీకరిస్తారు. అక్టోబర్ 16 వరకు నామినేషన్లను ఉపసంహరించుకోవచ్చు. అక్టోబర్ 24న ఉదయం 9 గంటల నుంచి సాయంత్రం 4 గంటల వరకు పోలింగ్ జరుగుతుంది. అదే రోజు సాయంత్రం ఓట్ల లెక్కింపు చేసి కొత్త రాజ్యసభ ఎంపీని ప్రకటిస్తారు.

Also Read: IND vs WI: వెస్టిండీస్‌తో టెస్ట్ సిరీస్‌.. టీమిండియా జ‌ట్టు ఇదేనా?

సంజీవ్ అరోరా రాజీనామా తర్వాత పంజాబ్ రాజకీయ వర్గాల్లో అరవింద్ కేజ్రీవాల్ లేదా మనీష్ సిసోడియాను పంజాబ్ నుండి రాజ్యసభకు పంపవచ్చని చర్చ జరిగింది. కానీ ఇటీవల అరవింద్ కేజ్రీవాల్ ఎంపీ కావడానికి నిరాకరించి, రాజ్యసభకు వెళ్లే ఊహాగానాలకు ముగింపు పలికారు. ఇప్పుడు రాజ్యసభకు ఎవరు వెళ్తారనేది పార్టీ రాజకీయ వ్యవహారాల కమిటీ నిర్ణయిస్తుంది.

జమ్మూ-కాశ్మీర్‌లో షెడ్యూల్

జమ్మూ-కాశ్మీర్‌లో నాలుగు సీట్లు ఫిబ్రవరి 2021 నుండి ఖాళీగా ఉన్నాయి. ఎన్నికల సంఘం సెప్టెంబర్ 22, 2025న ఉప ఎన్నికను ప్రకటించింది. దీని నోటిఫికేషన్ అక్టోబర్ 6న విడుదల అవుతుంది. అక్టోబర్ 13 వరకు నామినేషన్లు వేయవచ్చు. అక్టోబర్ 16 వరకు నామినేషన్లను వెనక్కి తీసుకోవచ్చు. అక్టోబర్ 24న ఉదయం 9 గంటల నుండి సాయంత్రం 4 గంటల వరకు పోలింగ్ జరుగుతుంది. సాయంత్రం 5 గంటల నుండి ఓట్ల లెక్కింపు ప్రారంభమై ఫలితాలు ప్రకటిస్తారు.