Rajiv Gandhi Death Anniversary: పాపా! మీరు నాతో ఉన్నారు.. రాహుల్ భావోద్వేగ నివాళి

Rajiv Gandhi Death Anniversary: మాజీ ప్రధాని రాజీవ్ గాంధీ 32వ వర్ధంతి (Rajiv Gandhi Death Anniversary)ని పురస్కరించుకుని కాంగ్రెస్ అధినేత రాహుల్ గాంధీ (Rahul Gandhi) ఆదివారం ఆయన తండ్రి రాజీవ్ గాంధీకి భావోద్వేగంతో నివాళులర్పించారు. రాజీవ్ గాంధీకి సంబంధించిన వివిధ క్షణాల వీడియోను పంచుకుంటూ రాహుల్ గాంధీ హిందీలో ట్వీట్ చేశారు. “పాపా, మీరు ఎల్లప్పుడూ నాతో, జ్ఞాపకాలలో, ప్రేరణగా ఉంటారు!”అంటూ ట్వీట్ చేశారు.

అంతకుముందు మాజీ ప్రధాని రాజీవ్ గాంధీ 32వ వర్ధంతి సందర్భంగా దేశ రాజధానిలోని వీరభూమిలో రాహుల్ గాంధీ తన సోదరి ప్రియాంక గాంధీ వాద్రాతో కలిసి పూలమాల వేసి నివాళులర్పించారు. కాంగ్రెస్ పార్లమెంటరీ పార్టీ చైర్‌పర్సన్ సోనియా గాంధీ, పార్టీ అధ్యక్షుడు మల్లికార్జున్ ఖర్గే కూడా మాజీ ప్రధాని రాజీవ్ గాంధీ వర్ధంతి సందర్భంగా ఆయనకు నివాళులర్పించారు.

Also Read: Karnataka CM: ఏడాది లోపే కర్ణాటక ప్రభుత్వం కూలిపోతుంది: తమిళనాడు బీజేపీ

1984లో తన తల్లి అప్పటి ప్రధాని ఇందిరాగాంధీ హత్య తర్వాత రాజీవ్ గాంధీ కాంగ్రెస్ బాధ్యతలు చేపట్టారు. అక్టోబరు 1984లో ఆయన పదవీ బాధ్యతలు స్వీకరించినప్పుడు 40 సంవత్సరాల వయస్సులో భారతదేశపు అతి పిన్న వయస్కుడైన ప్రధానమంత్రి అయ్యారు. 1944 ఆగస్టు 20న జన్మించిన రాజీవ్ గాంధీ 1991 మే 21న తమిళనాడులోని శ్రీపెరంబుదూర్‌లో ఎన్నికల ర్యాలీలో లిబరేషన్ టైగర్స్ ఆఫ్ తమిళ్ ఈలం (ఎల్‌టిటిఇ) ఆత్మాహుతి బాంబర్ చేతిలో హత్యకు గురయ్యారు. తమిళనాడులోని శ్రీపెరంబుదూర్‌లో రాజీవ్ గాంధీ జ్ఞాపకార్థం స్మారక చిహ్నం నిర్మించబడింది. గత ఏడాది భారత్ జోడో యాత్ర సందర్భంగా రాహుల్ గాంధీ కూడా తన తండ్రి స్మారకాన్ని సందర్శించారు. కాంగ్రెస్ ప్రతి సంవత్సరం మే 21వ తేదీన దేశవ్యాప్తంగా రక్తదాన శిబిరాలు, అనేక కార్యక్రమాలు నిర్వహిస్తారు.