PM Modi : భారత్-పాకిస్థాన్‌ల మధ్య ఉద్రిక్తతలు రోజురోజుకూ తీవ్రతరమవుతున్నాయి. పహల్గాంలో ఉగ్రవాదులు పర్యాటకులపై జరిపిన దాడి తరువాత రెండు దేశాల మధ్య సంబంధాలు మరింత దిగజారాయి. ఈ దాడిలో నలుగురు పర్యాటకులు మృతి చెందగా, పలువురు గాయపడ్డారు. ఈ దారుణానికి ప్రతీకారంగా భారత సైన్యం ‘ఆపరేషన్‌ సిందూర్‌’ పేరిట పాకిస్థాన్ ఆక్రమిత కాశ్మీర్‌లోని తొమ్మిది ఉగ్రవాద స్థావరాలపై లక్ష్యంగా దాడులు నిర్వహించింది. ఈ దాడుల్లో అనేకమంది ఉగ్రవాదులు హతమయ్యారు.
Read Also: Drone Attack : ఢిల్లీ విమానాశ్రయంలో 138 విమానాల రద్దు
ఈ పరిణామాల నేపథ్యంలో, ప్రధానమంత్రి నరేంద్ర మోడీ శనివారం ఉదయం అత్యున్నత స్థాయి భద్రతా సమీక్ష నిర్వహించారు. మోడీ నివాసంలో జరుగుతున్న ఈ అత్యవసర భేటీలో త్రివిధ దళాధిపతులు, చీఫ్ ఆఫ్ డిఫెన్స్ స్టాఫ్ జనరల్ అనిల్ చౌహాన్, రక్షణ మంత్రి రాజ్‌నాథ్ సింగ్‌ పాల్గొన్నారు. సమీప భవిష్యత్తులో చోటుచేసుకోగల సవాళ్లను దృష్టిలో ఉంచుకొని, సైనిక మరియు వ్యూహాత్మక అంశాలపై సమగ్ర చర్చలు కొనసాగుతున్నాయి.
అంతకుముందు, జాతీయ భద్రతా సలహాదారు అజిత్ డోభాల్ ప్రధానమంత్రితో ప్రత్యేకంగా భేటీ అయ్యారు. భారత భద్రతా పరిపాలనలో కీలక పాత్ర పోషిస్తున్న డోభాల్, తాజా పరిణామాలపై ప్రధానికి సమగ్ర నివేదికను సమర్పించినట్టు సమాచారం. గత రెండు రోజులుగా ఆయన వరుసగా మోడీతో భద్రతా అంశాలపై చర్చలు జరుపుతున్నారు. ఇదిలా ఉండగా, పాక్ వైపు నుంచి యుద్ధసంబంధిత చొరబాట్లు పెరిగినట్టు సైనిక వర్గాలు వెల్లడించాయి. నియంత్రణ రేఖ వెంబడి పాక్ దళాల కదలికలు గణనీయంగా పెరిగాయని, దీనికి భారత్ తగిన శక్తితో స్పందిస్తుందని అధికార వర్గాలు స్పష్టం చేశాయి. భారత్ ఎల్లప్పుడూ శాంతిని కోరుకున్నా, దేశ భద్రతకు భంగం కలిగే పరిస్థితుల్లో సమర్థవంతంగా స్పందించేందుకు సిద్ధంగా ఉందని మోడీ భద్రతా బృందానికి స్పష్టమైన దిశానిర్దేశం ఇచ్చినట్టు సమాచారం.