అస‌లు సినిమా ముందుంది.. ఆప్‌పై రాఘ‌వ్ చద్దా ఫైర్!

Raghav Chadha: రాఘవ్ చద్దా మళ్లీ ఆమ్ ఆద్మీ పార్టీ (AAP)పై తన దూకుడు వైఖరిని ప్రదర్శించారు. తన X (ట్విట్టర్) ఖాతాలో ఆయన మరొక వీడియోను పోస్ట్ చేశారు. ఆ వీడియోతో పాటు వార్నింగ్ కూడా ఇచ్చారు. ట్విట్ట‌ర్‌లో రాఘవ్ చద్దా పార్లమెంటులో పంజాబ్ సమస్యలను లేవనెత్తడంలో విఫలమయ్యారని వీడియోలు విడుదల చేయవలసి వచ్చిన నా ఆమ్ ఆద్మీ పార్టీ సహచరుల కోసం ఇది. ఇది కేవలం ఒక చిన్న ట్రైలర్ మాత్రమే, అసలు సినిమా ఇంకా ఉంది. పంజాబ్ నాకు కేవలం ఒక చర్చాంశం కాదు. అది నా ఇల్లు, నా కర్తవ్యం, నా మట్టి, నా ఆత్మ అని రాసుకొచ్చారు.

రాఘవ్‌పై పంజాబ్ నేతల ప్రశ్నలు

రాఘవ్ చద్దాపై ఆమ్ ఆద్మీ పార్టీ పంజాబ్ సీనియర్ నేతలు, ఆర్థిక మంత్రి హర్పాల్ సింగ్ చీమా, పంజాబ్ అధ్యక్షుడు అమన్ అరోరా, పార్టీ ప్రధాన ప్రతినిధి కుల్దీప్ సింగ్ ధాలివాల్ ప్రశ్నలు లేవనెత్తారు. రాజ్యసభ సభ్యుడిగా రాఘవ్ పార్లమెంటులో పంజాబ్‌కు సంబంధించిన ముఖ్యమైన అంశాలను ప్రస్తావించడంలో విఫలమయ్యారని వారు విమర్శించారు. పంజాబ్ సమస్యలను జాతీయ స్థాయిలో బలంగా వినిపిస్తారని పంజాబ్ ఎమ్మెల్యేలు ఆయనను ఎన్నుకున్నారని, కానీ ఆయన సున్నితమైన అంశాలను లేవనెత్తడానికి వెనుకాడారని వారు ఆరోపించారు.

Also Read: పానిక్ బయింగ్.. ప్ర‌జ‌ల‌కు కేంద్రం విజ్ఞ‌ప్తి!

రాఘవ్ చద్దా ధీటైన సమాధానం

గతంలో కూడా రాఘవ్ చద్దా ఒక వీడియో విడుదల చేస్తూ తనదైన శైలిలో సమాధానం ఇచ్చారు. “నేను గాయపడ్డాను. అందుకే మరింత ప్రమాదకరంగా మారాను. ప్రతి అబద్ధం బట్టబయలు అవుతుంది. నాపై పక్కా ప్రణాళికతో ప్రచారం జరుగుతోంది. నేను మాట్లాడకూడదని అనుకున్నాను. కానీ నేను మౌనంగా ఉంటే పదేపదే చెప్పే అబద్ధం కూడా నిజమని నమ్మే ప్రమాదం ఉంది. అందుకే ఇప్పుడు గొంతు ఎత్తాల్సిన సమయం వచ్చింది” అని పేర్కొన్నారు. అంతకుముందు కూడా “నన్ను మౌనంగా ఉండేలా చేశారు. కానీ నేను ఓడిపోలేదు” అని క్యాప్షన్ ఇస్తూ ప్రజలకు ఒక సందేశాన్ని ఇచ్చారు.

రాజ్యసభ పదవి నుంచి తొలగించినప్పటి నుండి ఉద్రిక్తత

రాజ్యసభలో డిప్యూటీ లీడర్ పదవి నుంచి తొలగించినప్పటి నుండి రాఘవ్ చద్దా పార్టీపై ఆగ్రహంగా ఉన్నారు. ఆమ్ ఆద్మీ పార్టీ రాజ్యసభ సెక్రటేరియట్‌కు లేఖ రాస్తూ.. రాఘవ్‌ను పదవి నుంచి తొలగించి, ఆయన స్థానంలో పంజాబ్ ఎంపీ అశోక్ మిట్టల్‌ను డిప్యూటీ లీడర్‌గా నియమించాలని కోరింది. పార్టీ తీసుకున్న ఈ నిర్ణయంతో రాఘవ్ తీవ్ర అసంతృప్తితో ఉన్నారు.