Mohali : ఈరోజు ఉదయం పంజాబ్ రాష్ట్రంలోని మోహాలీ పట్టణాన్ని తీవ్ర విషాదంలోకి నెట్టిన ఘటన చోటుచేసుకుంది. మోహాలీలోని ఫేజ్-9 ప్రాంతంలో ఉన్న ఓ ఆక్సిజన్ ప్లాంట్‌లో ఒక్కసారిగా జరిగిన భారీ పేలుడు స్థానికులను భయాందోళనకు గురిచేసింది. ఈ ప్రమాదంలో ఇప్పటివరకు ఇద్దరు మరణించినట్లు సమాచారం. పేలుడు శబ్దం చుట్టుపక్కల దాదాపు 2-3 కిలోమీటర్ల వరకు వినిపించిందని ప్రత్యక్ష సాక్షులు చెబుతున్నారు. ప్లాంట్‌లోని సిలిండర్లలో ఒక్కసారిగా సంభవించిన ఈ బ్లాస్ట్ కారణంగా పరిసర ప్రాంతాల్లోని భవనాలు దద్దరిల్లాయి. పేలుడు ధాటికి ఫ్యాక్టరీలో పనిచేస్తున్న కొంతమంది కూలీలు అక్కడికక్కడే నేలకూలినట్లు తెలుస్తోంది. ప్రమాద సమయంలో ప్లాంట్‌లో పనిచేస్తున్న పది మంది కార్మికుల్లో ముగ్గురు తీవ్రంగా గాయపడగా, వారిని అత్యవసర చికిత్స నిమిత్తం ఫేజ్-6లోని సివిల్ ఆస్పత్రికి తరలించారు.
Read Also: CM Chandrababu : కొనసాగుతున్న ఏపీ మంత్రివర్గ సమావేశం.. 10 కీలక అంశాలపై చర్చ..!
దుర్ఘటన స్థలానికి మోహాలీ పోలీసులు, పౌర పరిపాలన అధికారులు, సబ్-డివిజనల్ మేజిస్ట్రేట్ చేరుకొని పరిస్థితిని సమీక్షించారు. రెస్క్యూ టీములు ఘటనా స్థలంలో శకలాల క్రింద చిక్కుకున్న వారిని బయటకు తీసేందుకు కొనసాగిస్తున్న ప్రయత్నాలు చేస్తున్నారు. పేలుడు వల్ల ప్లాంట్‌లోని పలు యంత్రాలు ధ్వంసమయ్యాయి. అధికారికంగా మరణించిన వారి వివరాలు ఇంకా బయటపడకపోయినా, మృతుల సంఖ్య మరింత పెరిగే అవకాశం ఉందని అధికారులు తెలిపారు. ప్లాంట్ లోపల ఇంకా కొన్ని శరీర భాగాలు కనిపించడంతో, మిగతా బాధితుల కోసం గాలింపు కొనసాగుతోంది. ప్రమాదానికి గల కారణాలపై అధికారులు విచారణ ప్రారంభించారు. సిలిండర్ పేలడానికి కారణమైన సాంకేతిక లోపమా, లేదా మానవ తప్పిదమా అనే కోణాల్లో విచారణ జరుగుతోంది. ప్లాంట్ యాజమాన్యానికి సంబంధించిన సమాచారం కూడా సేకరిస్తున్నారు.
ప్రమాదం జరిగిన వెంటనే స్థానికులు పోలీసులకు సమాచారం అందించడంతో, రెస్క్యూ చర్యలు వేగంగా ప్రారంభమయ్యాయి. అయినప్పటికీ భారీ పేలుడుతో జరిగిన నష్టం చాలా ఎక్కువగా ఉందని అంచనా. ఈ పేలుడుతో కలిగిన ప్రకంపనలతో పక్కనే ఉన్న పరిశ్రమలకు కూడా కొంత నష్టం జరిగినట్లు తెలుస్తోంది. ఇదిలా ఉండగా, ఈ ఘటనపై పంజాబ్ ప్రభుత్వము కూడా స్పందించింది. బాధితులకు అండగా ఉంటామని, అవసరమైన సహాయాన్ని అందిస్తామని వెల్లడించింది. అలాగే, ప్రమాదానికి కారణమైన వ్యవస్థపరమైన లోపాలపై కఠిన చర్యలు తీసుకుంటామని హామీ ఇచ్చింది. సామాన్య ప్రజలకు అవసరమైన ఆక్సిజన్‌ను సరఫరా చేసే స్థలంలో ఇలాంటి ప్రమాదం చోటు చేసుకోవడం కలచివేసే విషయం. పరిశ్రమల్లో భద్రతా ప్రమాణాలు పటిష్టంగా ఉండేలా అధికారులు చర్యలు తీసుకోవాలని ప్రజలు కోరుతున్నారు.
Read Also: Stock Market : ఆర్బీఐ విధాన నిర్ణయానికి ముందే మార్కెట్లు స్థిరంగా ప్రారంభం