Anil Ambani: రిలయన్స్ గ్రూప్ చైర్మన్ అనిల్ అంబానీ (Anil Ambani)కి చెందిన సంస్థలపై ముంబైలో కేంద్ర ఏజెన్సీ ఎన్ఫోర్స్మెంట్ డైరెక్టరేట్ (ఈడీ) దాడులు శనివారం మూడవ రోజు కూడా కొనసాగాయి. ఈ దాడుల్లో పెద్ద సంఖ్యలో డాక్యుమెంట్లు, కంప్యూటర్ పరికరాలను ఈడీ స్వాధీనం చేసుకుంది. ఈ చర్యలు రూ. 3,000 కోట్ల బ్యాంక్ లోన్ మోసం కేసుతో సంబంధం ఉన్న మనీలాండరింగ్ వ్యవహారంలో జరుగుతున్నాయి. కొన్ని సంస్థలపై కోట్ల రూపాయల ఆర్థిక అక్రమాల ఆరోపణలు కూడా ఉన్నాయి.
ఈడీ దాడుల వివరాలు
పీటీఐ నివేదిక ప్రకారం.. మనీలాండరింగ్ నిరోధక చట్టం (పీఎంఎల్ఏ) కింద ఈడీ దాడులు గురువారం ప్రారంభమయ్యాయి. ముంబైలో 35 కంటే ఎక్కువ ప్రాంగణాల్లో దాడులు జరిగాయి. వాటిలో కొన్ని శనివారం కూడా కొనసాగాయి. ఈ ప్రాంగణాలు 50 సంస్థలు, 25 మంది వ్యక్తులకు సంబంధించినవిగా తెలుస్తోంది. వీరిలో అనిల్ అంబానీ గ్రూప్ సంస్థల నుండి అనేక అధికారులు కూడా ఉన్నారని నివేదికలు చెబుతున్నాయి. ఈడీ వర్గాలను ఉటంకిస్తూ పీటీఐ మరింత వివరిస్తూ 2017 నుంచి 2019 వరకు ఎస్ బ్యాంక్ నుంచి సుమారు రూ. 3,000 కోట్ల లోన్ల దుర్వినియోగం ఆరోపణలపై ఈ దాడులు జరుగుతున్నాయని పేర్కొంది.
లోన్ దుర్వినియోగం ఆరోపణలు
రిలయన్స్ గ్రూప్కు చెందిన రెండు సంస్థలు రిలయన్స్ పవర్, రిలయన్స్ ఇన్ఫ్రాస్ట్రక్చర్, స్టాక్ ఎక్స్ఛేంజ్లకు విడివిడిగా సమాచారం అందించాయి. ఈడీ చర్యలు తమ వ్యాపార కార్యకలాపాలు, ఆర్థిక పనితీరు, షేర్హోల్డర్లు, సిబ్బంది లేదా ఇతర ఏ విధమైన హితధారులపై ఎలాంటి ప్రభావం చూపవని ఆ సంస్థలు స్పష్టం చేశాయి. సంస్థల తరపున వెల్లడించిన వివరాల ప్రకారం.. మీడియాలో వచ్చిన వార్తలు 10 సంవత్సరాల కంటే పాతవైన రిలయన్స్ కమ్యూనికేషన్స్ లిమిటెడ్ (ఆర్సీఓఎం) లేదా రిలయన్స్ హోమ్ ఫైనాన్స్ లిమిటెడ్ (ఆర్హెచ్ఎఫ్ఎల్) లావాదేవీలకు సంబంధించిన ఆరోపణలతో ముడిపడి ఉన్నట్లు తెలుస్తోంది.
Also Read: Sanjiv Goenka: తన జట్టు పేరు మార్చనున్న సంజీవ్ గోయెంకా.. కొత్త పేరు, జెర్సీ ఇదేనా?
ఈడీ వర్గాల ప్రకారం.. లోన్ ఇవ్వడానికి ముందు ప్రమోటర్లు వారి సంస్థల ద్వారా నిధులు స్వీకరించారని, ఇది లంచం లావాదేవీలను సూచిస్తుందని విచారణలో తేలింది. యస్ బ్యాంక్ ద్వారా రిలయన్స్ అంబానీ గ్రూప్ సంస్థలకు ఇచ్చిన లోన్ ఆమోదాల్లో బ్యాక్డేటెడ్ క్రెడిట్ డాక్యుమెంట్లు, బ్యాంక్ రుణ విధానాన్ని స్పష్టంగా ఉల్లంఘించడం, తగిన ఆడిట్ లేదా రుణ విశ్లేషణ లేకుండా పెట్టుబడి ప్రతిపాదనలు వంటి “తీవ్రమైన ఉల్లంఘనల” ఆరోపణలను ఈడీ పరిశీలిస్తోంది.
రిలయన్స్ ఇన్ఫ్రాస్ట్రక్చర్కు సంబంధించిన సుమారు రూ. 10,000 కోట్ల కథిత లోన్ ఫండ్ దుర్వినియోగం కేసు కూడా ఈడీ విచారణ పరిధిలో ఉంది. ఆర్హెచ్ఎఫ్ఎల్కు సంబంధించిన సెబీ నివేదిక కూడా ఈడీ విచారణకు ఆధారంగా ఉన్నట్లు భావిస్తున్నారు. మార్కెట్ రెగ్యులేటర్ నిర్ణయాల ప్రకారం.. రిలయన్స్ హోమ్ ఫైనాన్స్ లిమిటెడ్ (ఆర్హెచ్ఎఫ్ఎల్) ద్వారా ఇచ్చిన కార్పొరేట్ లోన్లు 2017-18 ఆర్థిక సంవత్సరంలో రూ. 3,742.60 కోట్ల నుంచి 2018-19 ఆర్థిక సంవత్సరంలో రూ. 8,670.80 కోట్లకు పెరిగాయి.
సంస్థలు స్టాక్ ఎక్స్ఛేంజ్లకు అందించిన సమాచారంలో అనిల్ అంబానీ ప్రస్తుతం ‘రిలయన్స్ పవర్’ లేదా ‘రిలయన్స్ ఇన్ఫ్రాస్ట్రక్చర్’ బోర్డులో లేరని స్పష్టం చేశాయి. అంతేకాకుండా ‘రిలయన్స్ కమ్యూనికేషన్స్’ లేదా ‘రిలయన్స్ హోమ్ ఫైనాన్స్ లిమిటెడ్’తో తనకు ఎలాంటి వ్యాపార లేదా ఆర్థిక సంబంధం లేదని పేర్కొన్నారు. ‘రిలయన్స్ కమ్యూనికేషన్స్’ లేదా ‘రిలయన్స్ హోమ్ ఫైనాన్స్ లిమిటెడ్’పై తీసుకున్న ఎలాంటి చర్య అయినా ‘రిలయన్స్ పవర్’ లేదా ‘రిలయన్స్ ఇన్ఫ్రాస్ట్రక్చర్’ కార్యకలాపాలు లేదా నిర్వహణపై ఎలాంటి ప్రభావం చూపవని ఆ సంస్థలు తెలిపాయి.