మాజీ క్రికెటర్ సురేశ్ రైనా (Suresh Raina) బంధువులను హతమార్చిన నిందితుడు రషీద్ ను ఉత్తరప్రదేశ్‌లోని ముజఫర్‌నగర్ పోలీసులు ఎన్‌కౌంటర్‌లో హతమార్చారు. రషీద్‌పై 50 వేల రూపాయల రివార్డు ప్రకటించారు. గత రెండేళ్లుగా అతడి కోసం గాలిస్తున్నారు. ఈ ఘటనలో కొందరు నిందితులను ఇప్పటికే అరెస్టు చేశారు. ఈ ఎన్కౌంటర్ షాపూర్ పోలీస్ స్టేషన్‌లోని సహదుడి రోడ్డులో జరిగింది. ఇందులో షాపూర్ పోలీస్ స్టేషన్ ఇన్‌చార్జి బబ్లూ కుమార్‌పై కూడా కాల్పులు జరిగాయి. షాపూర్ పోలీసులు, ముజఫర్‌నగర్ ఎస్‌ఓజి సంయుక్తంగా నిర్వహించిన ఆపరేషన్‌లో రషీద్ హతమయ్యాడు. రాజస్థాన్‌కు చెందిన రషీద్ 2020లో పఠాన్‌కోట్‌లో జరిగిన దోపిడీలో సురేశ్ రైనా అత్త, మామలతో సహా ముగ్గురిని హతమార్చాడు.
యూపీ పోలీసులు అతడిపై రివార్డు కూడా ప్రకటించారు. రషీద్ నుంచి రివాల్వర్, పిస్టల్, లైవ్ కాట్రిడ్జ్‌లను పోలీసులు స్వాధీనం చేసుకున్నారు. సెప్టెంబరు 2022లో హత్య కేసులో కాకా అలియాస్ షాజాద్‌గా గుర్తించబడిన మరో నిందితుడిని పోలీసులు అరెస్టు చేశారు. ఈ ఘటన తర్వాత సురేశ్ రైనా అప్పటి పంజాబ్ సీఎం కెప్టెన్ అమరీందర్ సింగ్‌ను సిట్‌పై విచారణకు డిమాండ్ చేశారు.
Also Read: Nepal President: నేపాల్‌ అధ్యక్షుడు రామచంద్ర పౌడెల్ కి అస్వస్థత.. ఆసుపత్రిలో చేరిక
19 ఆగస్టు 2020 రాత్రి రైనా మామ కుటుంబంను దోపిడి చేయాలనే ఉద్దేశ్యంతో దుండగులు దాడి చేశారు. ఈ దాడిలో రైనా మామ అశోక్ కుమార్ మృతి చెందగా, అత్త ఆశా, బంధువు కౌశల్ కుమార్ ఆస్పత్రిలో చికిత్స పొందుతూ మృతి చెందారు. ఈ దాడిలో మరో ఇద్దరు వ్యక్తులు గాయపడ్డారు. వీరంతా ముఠాగా ఏర్పడి దోచుకునేవారు. ఘటన జరిగిన రోజు రాత్రి ఐదుగురు నిందితులు టెర్రస్‌పై నుంచి ఇంట్లోకి ప్రవేశించారు. ముగ్గురు వ్యక్తులు చాపలపై నిద్రిస్తుండటం చూసి వారిపై దాడి చేశారు. అనంతరం మెట్లపై నుంచి ఇంట్లోకి ప్రవేశించి దోపిడీ చేసి పరారయ్యారు.