CNG Price Hike :పెట్రోల్ నుంచి సీఎన్‌జీ వరకు.. వరుస ధరల పెంపులతో సామాన్యుడికి షాక్

దేశవ్యాప్తంగా ఇంధన ధరలు మరోసారి పెరగడంతో వినియోగదారులపై భారం మరింత పెరిగింది. ఢిల్లీలో మంగళవారం నుంచి కంప్రెస్డ్ నేచురల్ గ్యాస్ (CNG) ధరలను కిలోకు రూ.2 పెంచడంతో, ప్రస్తుతం కిలో ధర రూ.83.09కి చేరింది. గత 15 రోజుల్లో సీఎన్‌జీ ధరలు నాలుగోసారి పెరగడం గమనార్హం. ఇటీవల కిలోకు రూ.1 పెంచిన కొద్ది రోజులకే మరోసారి ధరలు పెంచడం వినియోగదారుల్లో ఆందోళన కలిగిస్తోంది. ఢిల్లీతో పాటు దేశంలోని ప్రధాన నగరాల్లో పెట్రోల్, డీజిల్ ధరలు కూడా వరుసగా పెరుగుతున్నాయి. తాజా పెంపు తర్వాత ఢిల్లీలో పెట్రోల్ ధర లీటరుకు రూ.102.12కి చేరగా, డీజిల్ ధర రూ.95.20కి పెరిగింది. దీంతో పెట్రోల్ ధర రూ.100 మార్క్‌ను దాటింది. ఇక కోల్‌కతా, ముంబై, చెన్నై వంటి మెట్రో నగరాల్లో కూడా ధరల పెరుగుదల కొనసాగుతోంది. కోల్‌కతాలో పెట్రోల్ ధర రూ.113.51కు చేరగా, డీజిల్ రూ.99.82కి పెరిగింది. ముంబైలో పెట్రోల్ రూ.111.21, డీజిల్ రూ.97.83గా నమోదైంది. చెన్నైలో పెట్రోల్ ధర రూ.107.77, డీజిల్ ధర రూ.99.55కి చేరాయి. ప్రపంచ ముడి చమురు మార్కెట్లలో అస్థిరత, పశ్చిమాసియాలో కొనసాగుతున్న భౌగోళిక రాజకీయ ఉద్రిక్తతలు ఇంధన ధరల పెరుగుదలకు ప్రధాన కారణాలుగా భావిస్తున్నారు. అంతర్జాతీయ మార్కెట్లో చమురు ధరల మార్పులు, డాలర్ మారకపు విలువ, స్థానిక పన్నులు వంటి అంశాల ఆధారంగా దేశీయంగా ఇంధన ధరలను సవరించడం జరుగుతోంది. ఇంధన ధరల పెరుగుదలతో రవాణా, లాజిస్టిక్స్ ఖర్చులు కూడా పెరిగే అవకాశం ఉందని నిపుణులు చెబుతున్నారు. దీని ప్రభావం నిత్యావసర వస్తువుల ధరలపై పడే అవకాశం ఉండటంతో, ద్రవ్యోల్బణం మరింత పెరిగే పరిస్థితి ఏర్పడవచ్చని అంచనా వేస్తున్నారు.