Indigo Flight Gate Locked: ఛత్తీస్‌గఢ్ రాజధాని రాయ్‌పూర్‌లోని స్వామి వివేకానంద విమానాశ్రయంలో జూన్ 18, 2025న ఢిల్లీ నుంచి వచ్చిన ఇండిగో విమానం గేటు అకస్మాత్తుగా లాక్ (Indigo Flight Gate Locked) అయిన ఘటన ప్రయాణికులను ఆందోళనకు గురిచేసింది. విమానం మధ్యాహ్నం 2:25 గంటలకు సురక్షితంగా ల్యాండ్ అయినప్పటికీ సాంకేతిక లోపం కారణంగా గేటు 40 నిమిషాల పాటు తెరుచుకోలేదు. దీంతో విమానంలో గందరగోళ వాతావరణం నెలకొంది. ఈ సమయంలో ఛత్తీస్‌గఢ్ మాజీ ముఖ్యమంత్రి భూపేష్ బఘేల్, రాయ్‌పూర్ మేయర్ మీనల్ చౌబే, ఎమ్మెల్యే చాతురీనంద్‌తో సహా వందలాది మంది ప్రయాణికులు విమానంలో చిక్కుకున్నారు.
విమానం ల్యాండ్ అయిన వెంటనే ప్రయాణికులు దిగేందుకు సిద్ధమవగా గేటు స్క్రీన్‌లో సమస్య ఏర్పడటంతో అది లాక్ అయింది. సాంకేతిక లోపం కారణంగా గేటు తెరవకపోవడంతో ప్రయాణికులు భయాందోళనలకు గురయ్యారు. విమాన సిబ్బంది వెంటనే సాంకేతిక నిపుణులను పిలిచి సమస్యను పరిష్కరించే ప్రయత్నం చేశారు. సుమారు 40 నిమిషాల తీవ్ర ప్రయాస తర్వాత నిపుణులు గేటును తెరవడంలో విజయం సాధించారు. గేటు తెరవబడిన వెంటనే ప్రయాణికులు ఊపిరి పీల్చుకుని బయటకు వచ్చారు.
Also Read: Krithi Shetty : అందాల ‘ఉప్పెన’.. సంప్రదాయ సొగసులో కుర్రకారును కట్టిపడేస్తున్న బ్యూటీ..!
ఈ ఘటన ప్రయాణికులకు తీవ్ర ఇబ్బందిని కలిగించింది. ముఖ్యంగా విమానంలో ఉన్న ప్రముఖులు కూడా ఆందోళన వ్యక్తం చేశారు. ఇండిగో అధికారులు ఈ సంఘటనపై స్పందిస్తూ సాంకేతిక సమస్య కారణంగా ఈ ఇబ్బంది ఏర్పడిందని, ప్రయాణికుల భద్రతకు ఎటువంటి హాని జరగలేదని తెలిపారు. అయితే, ఈ ఘటన విమానాశ్రయ సాంకేతిక సౌకర్యాలు, నిర్వహణపై ప్రశ్నలు లేవనెత్తింది. స్థానిక మీడియా నివేదికల ప్రకారం.. ప్రయాణికులు ఈ ఆలస్యం వల్ల మానసిక ఒత్తిడికి గురైనట్లు తెలిపారు.
విమానాశ్రయ అధికారులు ఈ ఘటనను దర్యాప్తు చేస్తున్నారు. ఇలాంటి సమస్యలు భవిష్యత్తులో పునరావృతం కాకుండా చర్యలు తీసుకుంటామని హామీ ఇచ్చారు. ఈ ఘటన ఇండిగో సేవలపై, ముఖ్యంగా రాంఘా విమానాశ్రయంలో సాంకేతిక నిర్వహణపై విమర్శలకు దారితీసింది.