Kolkata : పశ్చిమ బెంగాల్ రాజధాని కోల్‌కతాలో జూన్ 25న చోటుచేసుకున్న ఓ దారుణ ఘటన దేశవ్యాప్తంగా తీవ్ర సంచలనం రేపుతోంది. సౌత్ కలకత్తా లా కాలేజీలో చదువుతున్న 24 ఏళ్ల యువతి, తానే చదువుతున్న విద్యాసంస్థలోనే లైంగిక దాడికి గురైనట్లు తన ఫిర్యాదులో పేర్కొంది. పెళ్లి ప్రతిపాదనను తిరస్కరించిందన్న కక్షతో తృణమూల్ కాంగ్రెస్ (టీఎంసీ) విద్యార్థి విభాగానికి చెందిన నేత ఈ ఘాతుకానికి పాల్పడ్డాడని ఆమె ఆరోపించింది. బాధితురాలి పోలీసులకు అందించిన ఫిర్యాదు ప్రకారం, టీఎంసీపీ (టీఎంసీ విద్యార్థి విభాగం) జనరల్ సెక్రటరీగా పనిచేసిన మనోజిత్ మిశ్రా (31) ఆమెపై పెళ్లి ఒత్తిడి తెచ్చాడు. తాను ఇప్పటికే ప్రేమలో ఉన్నానని చెప్పినప్పటికీ, మనోజిత్ తనను బెదిరిస్తూ వేధింపులకు పాల్పడ్డాడని పేర్కొంది. తన తల్లిదండ్రులపై తప్పుడు కేసులు పెడతానంటూ హెచ్చరించాడని తెలిపింది.
Read Also: Vijaya Rama Raju : ఏపీ విద్యాశాఖ కమిషనర్ పై హైకోర్టు ఆగ్రహం
ఘటన రోజున పరీక్ష ఫారాలు నింపేందుకు కళాశాలకు వెళ్లిన బాధితురాలిని, నిందితుడు మరియు అతని సహచరులు కళాశాల క్యాంపస్‌లోనే బంధించారని పేర్కొంది. నన్ను వదిలేయమని వేడుకున్నా వినలేదు. బలవంతంగా సెక్యూరిటీ గార్డు గదిలోకి లాక్కెళ్లి, నన్ను బలాత్కరించాడు. ఇద్దరు వ్యక్తుల సమక్షంలో ఈ దారుణం జరిగింది అని బాధితురాలు వివరించింది. శ్వాస తీసుకోవడంలో ఇబ్బందిగా ఉండటంతో ఇన్‌హేలర్ అడిగితే ఇచ్చినప్పటికీ, ఆసుపత్రికి తీసుకెళ్లడాన్ని నిర్లక్ష్యం చేశారని ఆవేదన వ్యక్తం చేసింది. దాడి సమయంలో వీడియోలు తీశారని, ఈ విషయం ఎవరికైనా చెబితే వాటిని బయటపెడతామని బ్లాక్‌మెయిల్ చేశారని బాధితురాలు తెలిపింది. తప్పించుకోవడానికి ప్రయత్నించిన సమయంలో హాకీ స్టిక్‌తో దాడికి యత్నించారని వెల్లడించింది. ఈ లైంగిక దాడి సుమారు మూడు గంటలపాటు కొనసాగిందని, అనంతరం తీవ్రమైన హెచ్చరికలతో తనను బయటకు పంపించారని వివరించింది.
పోలీసులు కేసు నమోదు చేసి, ప్రధాన నిందితుడు మనోజిత్ మిశ్రా‌తో పాటు అదే కళాశాలలో చదువుతున్న జైబ్ అహ్మద్ (19), ప్రమిత్ ముఖర్జీ (20)లను అరెస్టు చేశారు. వారి ఫోన్లను స్వాధీనం చేసుకుని ఐదు రోజుల పోలీసు కస్టడీకి తరలించారు. ఈ ఘటనపై రాజకీయాల వాతావరణం రచ్చబండగా మారింది. నిందితుడి ఫోటోలు టీఎంసీ నేతలతో ఉన్నాయని బీజేపీ నేతలు సామాజిక మాధ్యమాల్లో పోస్ట్ చేస్తూ, నేరస్తులకు రక్షణ ఇస్తున్నారంటూ టీఎంసీపై విమర్శలు గుప్పిస్తున్నారు. దీనిపై స్పందించిన టీఎంసీ, నిందితుడికి పార్టీతో సంబంధం ఉన్నదే అయినప్పటికీ, అతడిని క్షమించేది లేదని స్పష్టం చేసింది. కళాశాల ప్రాంగణంలోనే భద్రత కరువైన ఘటనపై విద్యార్థి సంఘాలు, మహిళా సంఘాలు తీవ్ర ఆందోళన వ్యక్తం చేస్తుండగా, బాధితురాలు నేను లా చదువుతున్న విద్యార్థిని, కానీ న్యాయం కోసం పోరాడాల్సిన బాధితురాలిని అయ్యాను అని ఆవేదన వ్యక్తం చేసింది.