Haryana accident: హర్యానాలో ఘోర రోడ్డు ప్రమాదం

Road accident

హర్యానాలో ఘోర రోడ్డు ప్రమాదం జరిగింది. జింద్ జిల్లాలో రోహ్తక్ జాతీయ రహదారిపై వేగంగా వస్తున్న బస్సు.. ట్రక్కును ఢీకొట్టింది. ఈ దుర్ఘటనలో ట్రక్కు డ్రైవర్ ప్రాణాలు కోల్పోగా, 50 మంది ప్యాసెంజర్లు గాయాలపాలయ్యారు. వారిలో చిన్నారులు కూడా ఉన్నారు. విషమంగా ఉన్న 20 మందిని స్థానిక ఆరోగ్య కేంద్రం నుంచి పెద్దాసుపత్రికి తరలించారు. ఘటన గురించిన సమాచారంతో అధికారులు సహాయక చర్యలను ముమ్మరం చేశారు.

గాయపడిన వారిని జులానాలోని కమ్యూనిటీ హెల్త్ సెంటర్‌లో చేర్చారు. 20 మంది ప్రయాణీకుల పరిస్థితి విషమంగా ఉన్నట్లు సమాచారం. ఈ ప్రమాదంలో బస్సు, ట్రక్కు ముందు భాగం మొత్తం ధ్వంసమైంది. దీనిపై జులనా పోలీస్ స్టేషన్ దర్యాప్తు చేస్తోంది. శనివారం ఉదయం ప్రయాణికులతో బస్సు గురుగ్రామ్‌కు బయలుదేరింది. జింద్-రోహ్‌తక్ రహదారిపై నిర్మాణ పనులు జరుగుతున్నాయి. దీంతో రోడ్డు వన్‌వేగా మారింది. రోడ్డు మార్గం బస్సు జజ్వంతి గ్రామ సమీపంలోకి రాగానే ట్రక్కును ఢీకొట్టింది. ప్రమాదం జరిగిన సమయంలో బస్సు, ట్రక్కు రెండూ అతివేగంతో ఉన్నాయి. లారీ ముందు భాగం పూర్తిగా దెబ్బతింది. ట్రక్కు డ్రైవర్ క్యాబిన్‌లో ఇరుక్కుపోయి అక్కడికక్కడే మృతి చెందాడు.

ప్రమాద సమయంలో రోడ్డు మార్గంలో ఉన్న బస్సులో దాదాపు 50 మంది ప్రయాణికులు ఉన్నారు. ప్రమాదం జరిగిన వెంటనే కేకలు విని చుట్టుపక్కల వారు అక్కడికి చేరుకుని బస్సులో ఇరుక్కున్న క్షతగాత్రులను బయటకు తీసి జులనాలోని కమ్యూనిటీ హెల్త్ సెంటర్‌లో చేర్పించారు. తీవ్ర గాయాల కారణంగా 20 మంది గాయపడిన వారిని పిజిఐ రోహ్‌తక్‌కు రిఫర్ చేయగా, మరికొంత మంది స్వల్ప గాయాల కారణంగా ప్రథమ చికిత్స అనంతరం డిశ్చార్జ్ అయ్యారు. కాగా క్యాబిన్‌ను పగలగొట్టి ట్రక్కు డ్రైవర్‌ను బయటకు తీశారు.