. ఆకుకూరలు, ధాన్యాలు – డయాబెటిస్కు మిత్రులు
. కాయధాన్యాలు, గింజలు – శక్తికి ఆధారం
. పండ్లు, చేపలు, పాల ఉత్పత్తులు – సంపూర్ణ పోషణ
Diabetes : ప్రస్తుత జీవనశైలిలో డయాబెటిస్ ఒక సాధారణ ఆరోగ్య సమస్యగా మారింది. వయస్సుతో సంబంధం లేకుండా చిన్నారుల నుంచి వృద్ధుల వరకు ఈ వ్యాధి ప్రభావం చూపుతోంది. మారిన ఆహారపు అలవాట్లు, వ్యాయామం లేకపోవడం మానసిక ఒత్తిడి వంటి కారణాల వల్ల రక్తంలో చక్కెర స్థాయిలు అదుపు తప్పుతున్నాయి. డయాబెటిస్తో బాధపడే వారు కేవలం మందులపై మాత్రమే ఆధారపడకుండా తాము తీసుకునే ఆహారంపై కూడా ప్రత్యేక శ్రద్ధ వహించాల్సిన అవసరం ఉంది. సరైన ఆహారం తీసుకున్నప్పుడే రక్తంలో చక్కెర స్థాయిలు నియంత్రణలో ఉండటంతో పాటు శరీరానికి కావాల్సిన శక్తి, పోషకాలు అందుతాయి. డయాబెటిస్ ఉన్నవారు రోజువారీ ఆహారంలో ఆకుకూరలను తప్పనిసరిగా చేర్చుకోవాలి. పాలకూర, మెంతి ఆకులు, కాలే వంటి ఆకుకూరల్లో క్యాలరీలు తక్కువగా ఉండటంతో పాటు ఫైబర్, యాంటీ ఆక్సిడెంట్లు సమృద్ధిగా ఉంటాయి. ఇవి రక్తంలో చక్కెర స్థాయిలను సమతుల్యంలో ఉంచడంలో సహాయపడతాయి.
అలాగే బ్రౌన్ రైస్, ఓట్స్, జొన్న, రాగి వంటి చిరుధాన్యాలు నెమ్మదిగా జీర్ణమవుతాయి. దీని వల్ల ఒక్కసారిగా చక్కెర స్థాయిలు పెరగకుండా కాపాడుతాయి. ఈ ధాన్యాలు ఎక్కువసేపు కడుపు నిండిన భావనను కలిగించి అధికంగా తినే అలవాటును తగ్గిస్తాయి. కాయధాన్యాలు డయాబెటిస్ ఉన్నవారికి మంచి ఆహారం. శనగలు, కిడ్నీ బీన్స్, పెసరపప్పు వంటి వాటిలో ఫైబర్తో పాటు ప్రోటీన్ అధికంగా ఉంటుంది. ఇవి రక్తంలో చక్కెర శోషణను నెమ్మదిగా జరిగేలా చేస్తాయి. అలాగే బాదం వాల్నట్స్, అవిసె గింజలు, చియా విత్తనాలు వంటి గింజల్లో ఆరోగ్యకరమైన కొవ్వులు ఉంటాయి. ఇవి ఇన్సులిన్ నిరోధకతను తగ్గించడంలో కీలక పాత్ర పోషిస్తాయి. రోజూ కొద్దిగా ఈ గింజలను తీసుకోవడం వల్ల శరీరానికి స్థిరమైన శక్తి లభిస్తుంది.
డయాబెటిస్ ఉన్నవారు అన్ని పండ్లు కాకుండా తక్కువ చక్కెర ఉన్న పండ్లను ఎంచుకోవాలి. స్ట్రాబెర్రీ, బ్లూబెర్రీ, రాస్ప్బెర్రీ వంటి బెర్రీల్లో యాంటీ ఆక్సిడెంట్లు అధికంగా ఉంటాయి. ఇవి రక్తంలో చక్కెర స్థాయిలను పెంచకుండా ఆరోగ్యానికి మేలు చేస్తాయి. అలాగే సాల్మన్, సార్డిన్స్, మాకేరెల్ వంటి చేపల్లో ఒమెగా–3 ఫ్యాటీ యాసిడ్లు ఉంటాయి. ఇవి డయాబెటిస్ నియంత్రణతో పాటు గుండె ఆరోగ్యాన్ని మెరుగుపరుస్తాయి. పెరుగు వంటి పాల ఉత్పత్తులు పేగుల ఆరోగ్యాన్ని కాపాడి చక్కెర స్థాయిలను స్థిరంగా ఉంచుతాయి. సమగ్రంగా చూస్తే డయాబెటిస్ ఉన్నవారు సరైన ఆహార నియమాలు పాటిస్తే నీరసం అలసట వంటి సమస్యలు తగ్గి రోజువారీ జీవితం మరింత చురుకుగా మారుతుంది. సమతుల్య ఆహారం, నియమిత వ్యాయామం, వైద్యుల సూచనలు పాటించడం ద్వారా డయాబెటిస్ను అదుపులో ఉంచుకోవచ్చు.