పచ్చి ఉల్లిపాయలను భోజనంతో తీసుకోవడం వల్ల క‌లిగే ఆరోగ్య ప్ర‌యోజ‌నాలు తెలుసుకుందామా?

. రోగనిరోధక శక్తి పెంపులో ఉల్లిపాయ పాత్ర

. గుండె, షుగర్ మరియు రక్తపోటుపై ప్రభావం

. జీర్ణక్రియ నుంచి చర్మం, జుట్టు వరకు లాభాలు

Raw Onions : భారతీయుల రోజువారీ వంటగదిలో అత్యంత సాధారణంగా కనిపించే కూరగాయల్లో ఉల్లిపాయ ఒకటి. దాదాపు ప్రతి ఇంట్లో ఇది తప్పనిసరిగా ఉంటుంది. కూరలు, పులుసులు, ఫ్రైలు మాత్రమే కాకుండా పకోడీలు, సలాడ్లు, సాండ్‌విచ్‌లలోనూ ఉల్లిపాయ విరివిగా ఉపయోగిస్తారు. అంతేకాదు, చాలా మంది భోజనంతో పాటు లేదా చిరుతిండ్లకు పచ్చి ఉల్లిపాయను నేరుగా తినే అలవాటు కూడా కలిగి ఉంటారు. ముఖ్యంగా వేసవి కాలంలో పచ్చి ఉల్లిపాయలు శరీరాన్ని చల్లగా ఉంచుతాయనే నమ్మకం ఉంది. రుచితో పాటు ఆరోగ్యానికి మేలు చేసే ఈ పచ్చి ఉల్లిపాయల్లో ఉన్న పోషకాలు, వాటి వల్ల కలిగే లాభాలపై పోషకాహార నిపుణులు కీలక విషయాలను వెల్లడిస్తున్నారు. ఉల్లిపాయలో క్వెర్సెటిన్ అనే శక్తివంతమైన యాంటీ ఆక్సిడెంట్ ఉంటుంది. ఇది శరీర రోగనిరోధక శక్తిని పెంచడంలో కీలక పాత్ర పోషిస్తుంది. తరచూ జలుబు, దగ్గు, అలర్జీ సమస్యలతో బాధపడేవారికి పచ్చి ఉల్లిపాయలు ఉపయోగకరంగా ఉంటాయని నిపుణులు చెబుతున్నారు. ఇవి శరీరంలో వాపులను తగ్గించడంతో పాటు యాంటీ బ్యాక్టీరియల్ లక్షణాలను కలిగి ఉంటాయి.

పచ్చి ఉల్లిపాయలను భోజనంతో తీసుకోవడం వల్ల ఇన్ఫెక్షన్ల నుంచి రక్షణ లభిస్తుంది. అలాగే విటమిన్ సి, బి కాంప్లెక్స్ విటమిన్లు శరీరానికి అవసరమైన శక్తిని అందించి అలసటను తగ్గిస్తాయి. ఉల్లిపాయల్లో పొటాషియం, యాంటీ ఇన్‌ఫ్లమేటరీ గుణాలు సమృద్ధిగా ఉంటాయి. ఇవి అధిక రక్తపోటును నియంత్రించడంలో సహాయపడతాయి. హై బీపీతో బాధపడే వారు తమ ఆహారంలో ఉల్లిపాయలను చేర్చుకుంటే మంచి ఫలితాలు కనిపిస్తాయని వైద్యులు సూచిస్తున్నారు. గుండె ఆరోగ్యానికి హానికరమైన చెడు కొలెస్ట్రాల్ స్థాయిలను తగ్గించడంలో కూడా ఉల్లిపాయలు దోహదపడతాయి. ఇక డయాబెటిస్, ప్రీ డయాబెటిస్ ఉన్నవారికి ఉల్లిపాయలు ఎంతో మేలు చేస్తాయి. పచ్చి ఉల్లిపాయలు తీసుకోవడం వల్ల రక్తంలో చక్కెర స్థాయిలు నియంత్రణలో ఉండే అవకాశం ఉందని నిపుణుల అభిప్రాయం.

పచ్చి ఉల్లిపాయల్లో ఫైబర్, ప్రీబయోటిక్స్ అధికంగా ఉంటాయి. ఇవి పేగుల ఆరోగ్యాన్ని మెరుగుపరచి జీర్ణక్రియను సజావుగా చేస్తాయి. తరచూ మలబద్ధకం సమస్యతో బాధపడేవారికి ఇవి మంచి పరిష్కారంగా పనిచేస్తాయి. అలాగే ఉల్లిపాయల్లో ఉండే సల్ఫర్ జుట్టు పెరుగుదలకు సహాయపడుతుంది. జుట్టు ఒత్తుగా, బలంగా పెరగడంలో ఇది కీలకంగా ఉంటుంది. వయసు పైబడినవారిలో ఎముకలు బలహీనపడకుండా ఉండేందుకు కూడా ఉల్లిపాయలు ఉపయోగపడతాయి. అంతేకాదు, పచ్చి ఉల్లిపాయలు చర్మ ఆరోగ్యాన్ని మెరుగుపరచడం, శరీర బరువును అదుపులో ఉంచడం, ఊపిరితిత్తుల పనితీరును మెరుగుపరచడం వంటి ప్రయోజనాలను కూడా ఇస్తాయి. క్యాన్సర్ వంటి తీవ్రమైన వ్యాధుల ప్రమాదాన్ని తగ్గించడంలోనూ ఇవి సహాయకారిగా ఉంటాయని నిపుణులు చెబుతున్నారు. ఈ విధంగా సాధారణంగా కనిపించే ఉల్లిపాయలు అనేక ఆరోగ్య లాభాలను అందిస్తాయి. రోజువారీ భోజనంలో పచ్చి ఉల్లిపాయలను సరైన మోతాదులో చేర్చుకుంటే ఆరోగ్యాన్ని కాపాడుకోవచ్చని పోషకాహార నిపుణులు సూచిస్తున్నారు.