Tape Warm : టేప్ వార్మ్ గుడ్లు, లేదా బద్దె పురుగు గుడ్లు అని కూడా అంటారు. ఇవి టేప్ వార్మ్ అనే పరాన్నజీవికి సంబంధించిన సూక్ష్మ గుడ్లు. మనిషి శరీరంలోకి ఇవి చేరినప్పుడు, జీర్ణ వ్యవస్థలో పురుగులుగా అభివృద్ధి చెందుతాయి. దీనిని ఆంగ్లంలో టెనియాసిస్ అని అంటారు. ఈ వ్యాధి ప్రపంచవ్యాప్తంగా చాలా దేశాల్లో కనిపిస్తుంది. సరైన పరిశుభ్రత లేని ప్రాంతాల్లో, పచ్చి మాంసం ఎక్కువగా తినే ప్రాంతాల్లో ఈ వ్యాధి ఎక్కువగా వ్యాప్తి చెందుతుంది.
నాడీ వ్యవస్థపై ప్రభావం
టేప్ వార్మ్ గుడ్లు నాడీ వ్యవస్థపై తీవ్ర ప్రభావం చూపే ప్రమాదం ఉంది. ఈ గుడ్లు పంది మాంసం లేదా ఇతర అపరిశుభ్రమైన మాంసం ద్వారా మనిషి శరీరంలోకి ప్రవేశిస్తాయి. అక్కడ జీర్ణవ్యవస్థలోంచి రక్తంలో కలిసిపోయి, మెదడుకు చేరుకోగలవు. ఒకసారి మెదడులోకి చేరిన తర్వాత, అవి పురుగులుగా మారి సిస్ట్లను (నీటి తిత్తులు) ఏర్పరుస్తాయి. ఈ పరిస్థితిని న్యూరోసిస్టిసెర్కోసిస్ అని అంటారు. దీనివల్ల తీవ్రమైన తలనొప్పి, ఫిట్స్, మూర్ఛ, దృష్టి లోపాలు, జ్ఞాపకశక్తి మందగించడం, మానసిక సమస్యలు, కోమా వంటి లక్షణాలు కనిపిస్తాయి. నాడీ వ్యవస్థపై ఈ వ్యాధి చాలా ప్రమాదకరమైన ప్రభావాలను చూపుతుంది.
ఇది వైరసా? పరాన్న జీవినా? ఎలా పుడుతుంది?
టేప్ వార్మ్ అనేది వైరస్ కాదు, ఇది ఒక పరాన్నజీవి. ఇది పశువులు లేదా పందుల మాంసంలో ఉంటుంది. ఈ మాంసాన్ని సరిగ్గా ఉడికించకుండా తిన్నప్పుడు, గుడ్లు మనిషి శరీరంలోకి ప్రవేశిస్తాయి. అక్కడ పురుగులుగా మారి పెద్దవి అవుతాయి. ఇవి చిన్న పేగులో నివసిస్తూ గుడ్లను ఉత్పత్తి చేస్తాయి. ఈ గుడ్లు మలం ద్వారా బయటకు వచ్చి, నీరు, ఆహారం, మట్టిని కలుషితం చేస్తాయి.
ఎలాంటి ప్రదేశాల్లో జీవం పోసుకుంటుంది?
టేప్ వార్మ్ గుడ్లు అపరిశుభ్రమైన వాతావరణంలో, ముఖ్యంగా పరిశుభ్రత తక్కువగా ఉన్న ప్రదేశాల్లో బాగా అభివృద్ధి చెందుతాయి. మనుషులు, పశువులు ఒకే చోట నివసించడం, పారిశుద్ధ్య వ్యవస్థ సరిగా లేకపోవడం, సురక్షితం కాని తాగునీరు వంటి పరిస్థితుల్లో ఈ గుడ్లు విస్తృతంగా వ్యాప్తి చెందుతాయి. పశువులకు, పందులకు అపరిశుభ్రమైన నీరు, ఆహారం ఇవ్వడం వల్ల కూడా ఈ గుడ్లు వాటి శరీరాల్లో చేరి, ఆ తర్వాత మనిషికి సంక్రమిస్తాయి.
నివారణ చర్యలు, బాధితులు ఉన్న దేశాలు
ఈ వ్యాధి నివారణకు ప్రధాన మార్గం పరిశుభ్రత పాటించడం. మాంసాన్ని పూర్తిగా ఉడికించి తినడం చాలా ముఖ్యం. చేతులను తరచుగా శుభ్రంగా కడుక్కోవడం, సురక్షితమైన తాగునీరు వాడడం కూడా అవసరం. మాంసానికి సంబంధించిన పరిశుభ్రతా ప్రమాణాలు సరిగా పాటించడం కూడా చాలా ముఖ్యం. ఈ వ్యాధి ప్రపంచవ్యాప్తంగా చాలా దేశాల్లో ఉంది. ముఖ్యంగా లాటిన్ అమెరికా, సబ్-సహారా ఆఫ్రికా, ఆసియాలోని కొన్ని ప్రాంతాలలో దీని బాధితులు ఎక్కువగా ఉన్నారు. భారతదేశంలో కూడా పరిశుభ్రత తక్కువగా ఉన్న ప్రాంతాల్లో ఈ వ్యాధి కేసులు కనిపిస్తాయి. ఇది నిర్లక్ష్యం చేస్తే ప్రాణాంతకం కాగలదు. అందుకే, దీనిపై అవగాహన పెంచుకోవడం చాలా ముఖ్యం.