ఉరుకుల పరుగుల జీవితంలో ఒత్తిడి సహజం. డిప్రెషన్ను తట్టుకోలేక చాలామంది ఆత్మహత్య చేసుకుంటున్న సంఘటనలు చోటుచేసుకుంటున్నాయి. చాలామంది ఒత్తిడిని ‘లైట్’ తీసుకుంటున్నారు, కానీ దానివల్ల అనారోగ్య సమస్యలు ఎక్కువే. పురుషులతో పోలిస్తే మహిళల్లో ఒత్తిడి ప్రభావం ఎక్కువగా ఉంది. సర్వేలు సైతం ఇదే విషయాన్ని చెబుతున్నాయి. బయోలాజికల్ సైకియాట్రీ జర్నల్లో నిర్వహించిన అధ్యయనంలో ఈ విషయం బహిర్గతమైంది. ఉద్యోగ, ఉపాధి రంగాల్లో పురుషులతో సమానంగా పోటీ పడి పనిచేసే మహిళలకు ఒత్తిడి ఎక్కువగా ఉందని డాక్టర్లు సైతం తేల్చి చెప్పారు.
ఒత్తిడి ప్రభావం అటు పురుషులపై, ఇటు మహిళలపై పడుతున్నప్పటికీ, నిరాశ నిస్పృహలతో మహిళలు అనారోగ్య సమస్యలను ఎక్కువగా ఎదుర్కొంటున్నారు. మానవ మెదడుల్లో ఒత్తిడి వల్ల కలిగే మార్పులను కనుగొన్న తర్వాత పరిశోధకులు ఈ విషయాన్ని స్పష్టం చేశారు. పరిశోధకులు ఎలుకలపై ప్రయోగాలు చేసి ఈ విషయాన్ని వెల్లడించారు. మగ, ఆడ ఎలుకలపై పరిశోధనలు చేయగా, ఆడ ఎలుకలపై ఒత్తిడి ప్రభావం ఎక్కువగా ఉన్నట్లు తేలిందని పరిశోధకులు చెబుతున్నారు.