గర్భధారణ సమయంలో మహిళలు తల్లి బిడ్డ ఇద్దరూ ఆరోగ్యంగా క్షేమంగా ఉండాలి అంటే కొన్ని రకాల జాగ్రత్తలు తీసుకోవడం తప్పనిసరి. మరి ముఖ్యంగా ఆహార విషయంలో చాలా రకాల జాగ్రత్తలు పాటించాలి. లేదంటే లేనిపోని సమస్యలు వచ్చే అవకాశాలు ఎక్కువగా ఉంటాయి. స్త్రీలు గర్భవతిగా ఉన్నప్పుడు సరైన పోషకాలు కలిగిన ఆహారాన్ని తీసుకోవాలి. అప్పుడే పుట్టిన బిడ్డ కూడా ఆరోగ్యంగా ఉంటుంది. మరి గర్భధారణ సమయంలో స్త్రీలు ఎలాంటి ఫుడ్ తీసుకుంటే బిడ్డ ఆరోగ్యంగా పుడుతుంది అన్న విషయానికి వస్తే.. తల్లి, బిడ్డ కణాలకు ఆక్సిజన్ ను తీసుకువెళ్లే హిమోగ్లోబిన్ ఉత్పత్తికి ఇనుము చాలా అవసరం.
గర్భధారణ సమయంలో రక్త పరిమాణం పెరిగేకొద్దీ ఇనుము అవసరం ఎక్కువగా ఉంటుంది. సన్నని మాంసాలు, చికెన్, చేపలు, తృణధాన్యాలు, ముదురు ఆకుకూరల్లో ఐరన్ పుష్కలంగా ఉంటుంది. సిట్రస్ పండ్లు వంటి విటమిన్ సి వనరులతో ఈ ఆహారాలను కలపడం వల్ల ఇనుము శోషణకు సహాయపడుతుందని చెబుతున్నారు. అదేవిధంగా శిశువు ఎముకలు దంతాల అభివృద్ధి కోసం కాల్షియం చాలా అవసరం. కాబట్టి గర్భధారణ సమయంలో మహిళలు క్యాల్షియాన్నీ తప్పకుండా తీసుకోవాలి. పాలు, పాల ఉత్పత్తులు ఆకుకూరలు వంటివి తీసుకోవడం వల్ల శరీరానికి కావాల్సిన క్యాల్షియం పుష్కలంగా లభిస్తుందని చెబుతున్నారు. ఫోలేట్ లేదా సింథటిక్ ఫోలిక్ ఆమ్లం గర్భం ప్రారంభ దశలో చాలా అవసరం. ఇది శిశువు న్యూరల్ ట్యూబ్లను నిర్మించడానికి సహాయపడుతుంది. ఇవి తర్వాత మెదడు, వెన్నుపాములో అభివృద్ధి చెందుతాయి.
ఆకుకూరలు, సిట్రస్ పండ్లు, చిక్కుళ్లు, ధాన్యాలు ఫోలేట్ కు మంచి వనరులు అని చెప్పాలి. అదేవిధంగా పిల్లల మెదడు కళ్ల అభివృద్ధి కోసం ఒమేగా 3 ఆమ్లాలు చాలా అవసరం. ఇవి సాల్మన్, మాకేరెల్, సార్డినెస్ వంటి కొవ్వు చేపల్లో పుష్కలంగా ఉంటాయి. అదేవిదంగా శిశువు కణం, కణజాల అభివృద్ధికి ప్రోటీన్ చాలా అవసరం. సన్నని మాంసాలు, పౌల్ట్రీ, చేపలు, గుడ్లు, పాల ఉత్పత్తులు, చిక్కుళ్లు, గింజలు ప్రోటీన్ కు మంచి వనరులు. గర్భధారణ సమయంలో సంతృప్త కొవ్వును తక్కువగా తినాలి. కాల్షియం శోషణకు విటమిన్ డి చాలా అవసరం. ఇది మీకు, మీ బిడ్డ ఎముకల అభివృద్ధికి సహాయపడుతుంది. విటమిన్ డి కోసం రోజూ కాసేపు ఎండలో ఉండండి. అలాగే బలవర్థకమైన ఆహారాన్ని తినండి. అవసరమైతే విటమిన్ డి మాత్రలను తీసుకోండి. అయితే వీటిని తీసుకోవడానికి ముందు మీరు ఖచ్చితంగా డాక్టర్ తో మాట్లాడాలని చెబుతున్నారు.