Sesame Jaggery Laddu : రోజు సాయంత్రం సమయం అవగానే చాలామందికి చిరుతిండికి కోసం ఎదురుచూస్తుంటారు. బస్‌స్టాండ్‌లు, స్కూల్‌లు, రహదారుల పక్కన ఉండే బండ్లపై అందుబాటులో ఉండే బజ్జీలు, బొండాలు, మిర్చి, పునుగులు, సమోసాలు, పఫ్స్‌లు ఇలా ఇంకా ఎన్నో రుచికరమైన కానీ ఆరోగ్యానికి హానికరమైన ఫాస్ట్‌ఫుడ్‌లు అందుబాటులో ఉంటాయి. ఇవి నోరూరిస్తుండటం సహజమే కానీ, ఆరోగ్యంపై దీర్ఘకాలిక ప్రభావాలు వదిలిపెట్టకమానవు. అలాగే, రోజూ ఇలా తినడం వల్ల జీర్ణకోశ సమస్యలు, పెరుగుతున్న కొలెస్ట్రాల్, అధిక బరువు, బీపీ, డయాబెటిస్ వంటి అనారోగ్య సమస్యలు ఎదురవుతాయి. అయితే, ఇదే సమయంలో ఆరోగ్యానికి మేలు చేసే, రుచికరంగా ఉండే, శక్తిని అందించే చిరుతిండిని ఎంచుకుంటే మంచిదే కదా!. ఆరోగ్యవంతమైన సాయంత్రపు స్నాక్ కోసం నువ్వుల లడ్డూ బెస్ట్ ఎంపికగా చెప్పవచ్చు. సాధారణంగా ఇంట్లో సులభంగా తయారు చేసుకునే ఈ నువ్వుల లడ్డూ, ఎంతో పోషక విలువలు కలిగి ఉంటుంది. ముఖ్యంగా బెల్లంతో కలిపి చేసినప్పుడు ఇది ఆరోగ్యానికి మేలు చేసే చక్కని టానిక్‌గా మారుతుంది.
నువ్వుల లడ్డూ ఆరోగ్యానికి ఎందుకు మంచిది?
నువ్వుల్లో అధికంగా ఉండే క్యాల్షియం, మెగ్నీషియం, ఫాస్ఫరస్ వంటి ఖనిజాలు ఎముకల ఆరోగ్యానికి ముఖ్యమైనవి. నిత్యం ఒకటి లేదా రెండు నువ్వుల లడ్డూలు తీసుకుంటే, ఎముకలు బలంగా మారి, వృద్ధాప్యంలో వచ్చే ఆస్టియోపోరోసిస్ వంటి సమస్యలు రాకుండా ఉంటాయి. ఇంకా, నువ్వుల్లో ఉండే ఐరన్ శరీరంలో హిమోగ్లోబిన్ స్థాయిని పెంచుతుంది. దీని వల్ల రక్తహీనత నివారించబడుతుంది. ముఖ్యంగా పిల్లలు, మహిళలు, గర్భిణీలు వంటి వారికి ఇది ఎంతో లాభదాయకం.
శక్తిని అందించే స్నాక్
సాయంత్రం సమయానికి శరీరం అలసటకు లోనవుతుంది. అప్పుడు నువ్వుల లడ్డూ తింటే శక్తి వస్తుంది, మళ్లీ ఉత్సాహంగా ప‌ని చేయగలుగుతారు. ఎందుకంటే నువ్వులలో ప్రోటీన్లు, హెల్తీ ఫాట్స్ ఎక్కువగా ఉంటాయి. ఇవి శరీరానికి కావాల్సిన తగిన శక్తిని అందిస్తాయి.
జీర్ణవ్యవస్థకు మేలు
నువ్వులలో ఫైబర్ పుష్కలంగా ఉండటంతో జీర్ణవ్యవస్థ మెరుగుపడుతుంది. మలబద్ధకం సమస్యకు ఇది సహాయపడుతుంది. బెల్లం వల్ల జీర్ణక్రియ మరింత బాగుంటుంది. జీర్ణ సంబంధిత సమస్యలు తగ్గుతాయి. తిన్న ఆహారం సులభంగా జీర్ణమవుతుంది.
గుండెకు రక్షణ
నువ్వుల్లో ఉండే మోనో అన్‌సాచురేటెడ్ మరియు పాలీ అన్‌సాచురేటెడ్ ఫాట్స్, లిగ్నన్స్, ఫైటోస్టెరాల్స్ చెడు కొలెస్ట్రాల్‌ను తగ్గించి, మంచి కొలెస్ట్రాల్‌ను పెంచుతాయి. దీని వల్ల గుండె ఆరోగ్యంగా ఉంటుంది. రక్తనాళాల్లో అడ్డంకులు ఏర్పడకుండా, హార్ట్‌అటాక్ వంటి ప్రమాదాలను నివారించవచ్చు.
వాతావరణానికి అనుకూలం
చలికాలంలో శరీరాన్ని వేడిగా ఉంచే నువ్వుల లడ్డూ, సహజమైన వేడి జనకంగా పనిచేస్తుంది. శీతల వాతావరణంలో శరీరానికి అవసరమైన వెచ్చదనాన్ని అందిస్తుంది. అలాగే, ఇందులో ఉండే యాంటీ ఆక్సిడెంట్లు, మినరల్స్ రోగ నిరోధక శక్తిని పెంచుతాయి. ఫలితంగా దగ్గు, జలుబు వంటి సీజనల్ ఇన్‌ఫెక్షన్లకు చెక్ పెట్టవచ్చు. రోజూ సాయంత్రం సమయాన్ని ఆరోగ్యపూరితంగా మార్చాలంటే, రహదారి తిండి వైపు కన్ను వేసే ముందు ఒకసారి నువ్వుల లడ్డూ గురించి ఆలోచించండి. ఇది మీ శరీరానికి శక్తిని, ఆరోగ్యాన్ని, రుచిని ఒకేసారి అందించగల ఆరోగ్యవంతమైన స్నాక్. చిన్నల నుంచి పెద్దల వరకు అందరూ ఆస్వాదించగల ఈ లడ్డూను మీ డైలీ డైట్‌లో భాగం చేసుకోండి.