విశాఖ నగరంలో డ్ర‌గ్స్ వాడ‌కం విచ్చ‌ల‌విడిగా పెరుగుతోంది. ఎక్కువ మంది విద్యార్థులు ఈ వ్య‌స‌నానికి గుర‌వుతున్నారు. తల్లిదండ్రులు తమ పిల్లలలో ప్రవర్తనాపరమైన మార్పులను గమనించాలి. ముఖ్యంగా కళాశాలకు వెళ్లే విద్యార్థులు ఇటువంటి వాటికి ఆక‌ర్షితుల‌వుతారు. కాబ‌ట్టి తల్లిదండ్రులు సకాలంలో జోక్యం చేసుకుంటే వారి ప్రాణాలను కాపాడవచ్చు.
ఆంధ్రా యూనివర్శిటీ లోని సెంటర్ ఫర్ సైకలాజికల్ అసెస్‌మెంట్ అండ్ కౌన్సెలింగ్ కేంద్రానికి కౌన్సెలింగ్, చికిత్స కోసం వారానికి రెండు నుండి మూడు కేసులు వస్తున్నాయి. తమ కేంద్రానికి వచ్చే వారిలో ఎక్కువ మంది ఇంజినీరింగ్, లా కాలేజీల విద్యార్థులే ఎక్కువ‌గా ఉన్నార‌ని.. మరికొందరు విద్యార్థులు రష్యాలో చదివి, అక్కడ డ్ర‌గ్స్ కి అలవాటు పడి తిరిగి వచ్చిన విద్యార్థులు ఉన్న‌ట్లు సెంటర్ డైరెక్టర్ ఎం.వి.ఆర్. రాజు తెలిపారు.
కొన్ని కాలేజీల్లో త‌ర‌గ‌తులు స‌రిగా జ‌ర‌గ‌క‌పోవ‌డం… హాజరులో సడలింపులు విద్యార్థుల‌కు చాలా స్వేచ్ఛను ఇవ్వ‌డంతో విద్యార్థులు చెడు అల‌వాట్లకు ఆక‌ర్షితుల‌వుతున్నారు. కొన్నిసార్లు విద్యార్థులు ఇష్టపడని నిర్దిష్ట కోర్సును తీసుకోవాలని తల్లిదండ్రులు పట్టుబట్టడం కూడా యువతలో ఒత్తిడి, ఆందోళనకు కారణమవుతుంది. దీంతో చాలా మంది విద్యార్థులు ఈ ఒత్తిడిని అధిగ‌మించేందుకు డ్ర‌గ్స్ బారిన ప‌డుతున్నారు. ఈ డ్ర‌గ్స్ దందా అంతా ఇప్పుడు ఆన్‌లైన్ ద్వారా న‌డుస్తుంది. దీంతో ఎక్క‌డ‌ప‌డితే అక్కడ గంజాయి సులభంగా లభ్యం కావడం, వారు అలవాటును ఎంచుకునేందుకు ఉపయోగపడుతుందని ఎం.వి.ఆర్ రాజు తెలిపారు.
బాధితుడు తన చుట్టూ ఉన్న వారితో సంభాషించడానికి ఆసక్తి చూపకపోవడంతో సమస్య మొదలవుతుందని…ఇది మానసిక సమస్యలకు దారి తీస్తుందని ఆయ‌న తెలిపారు. నగరంలో ఉన్న గవర్నమెంట్ హాస్పిటల్ ఫర్ మెంటల్ కేర్ (GHMC) ఆంధ్ర ప్రదేశ్‌లో మానసిక సంరక్షణ కోసం మాత్రమే తృతీయ సంరక్షణ ఆసుపత్రి. ఇక్క‌డ అర్హత కలిగిన మానసిక వైద్యులు ఉంటార‌ని…ఇలాంటి కేసులను ఎదుర్కోవటానికి అవసరమైన సౌకర్యాలు అక్కడ ఉన్నాయ‌ని ఆయ‌న తెలిపారు.
జనవరి 6, 2020న GHMCలో ప్రారంభించబడిన ఓపియాయిడ్ సబ్‌స్టిట్యూషన్ థెరపీ (OST) సెంటర్ ఇంజెక్షన్ డ్రగ్స్‌కు బానిసలైన వారికి ఒక వరం. ఈ సెంటర్‌లో రోగులను చూసేందుకు సైకియాట్రిస్ట్, డేటా మేనేజర్, కౌన్సెలర్, స్టాఫ్ నర్సు ఉన్నారు. OSTలో చికిత్స పొందిన చాలా మంది రోగులు పూర్తిగా నయమయ్యారు మరియు ఇప్పుడు సాధారణ జీవితాలను గడుపుతున్నారు. జనవరి నుండి డిసెంబర్ 2020 వరకు మొత్తం 124 మంది వ్యక్తులు OSTలో చికిత్స కోసం నమోదు చేసుకున్నారు. నవంబర్ 2021 చివరి నాటికి వారి సంఖ్య 165కి చేరుకుంది.