. కంటి ఆరోగ్యం, రోగనిరోధక శక్తికి బలం
. గుండె, చర్మం మరియు జీర్ణక్రియకు మేలు
. బరువు తగ్గడం నుంచి మెదడు ఆరోగ్యం వరకు
Carrot Juice : మనం నిత్యం ఆహారంగా తీసుకునే కూరగాయల్లో క్యారెట్కు ప్రత్యేక స్థానం ఉంది. సాధారణంగా నారింజ రంగులో కనిపించే క్యారెట్లు ఇప్పుడు తెలుపు, పసుపు, ఊదా, ఎరుపు రంగుల్లో కూడా అందుబాటులో ఉన్నాయి. తియ్యటి రుచితో పాటు పోషకాలతో నిండిన ఈ కూరగాయ ఆరోగ్యానికి ఎన్నో విధాలుగా మేలు చేస్తుంది. క్యారెట్లలో బీటా కెరోటీన్, ఫైబర్, విటమిన్ కె1, పొటాషియం, యాంటీ ఆక్సిడెంట్లు సమృద్ధిగా ఉంటాయి. కొవ్వు, కేలరీలు తక్కువగా ఉండటంతో ఇవి ఆరోగ్యకరమైన ఆహారంగా నిలుస్తున్నాయి. వంటల్లోనే కాకుండా ఉదయం అల్పాహారంలో భాగంగా క్యారెట్ జ్యూస్గా తీసుకుంటే మరిన్ని ప్రయోజనాలు లభిస్తాయని పోషకాహార నిపుణులు చెబుతున్నారు.
క్యారెట్లలో అధికంగా ఉండే బీటా కెరోటీన్ శరీరంలోకి వెళ్లిన తర్వాత విటమిన్ ఎగా మారుతుంది. ఈ విటమిన్ ఎ కంటి ఆరోగ్యాన్ని కాపాడడంలో కీలక పాత్ర పోషిస్తుంది. ఉదయాన్నే క్యారెట్ జ్యూస్ తాగడం వల్ల చూపు లోపాలు తగ్గడమే కాకుండా కంటి అలసట కూడా తగ్గుతుంది. అలాగే క్యారెట్ జ్యూస్లో విటమిన్ సి, యాంటీ ఆక్సిడెంట్లు ఉండటం వల్ల శరీర రోగనిరోధక శక్తి పెరుగుతుంది. దీంతో సీజనల్ జబ్బులు, ఇన్ఫెక్షన్ల బారిన పడే అవకాశాలు తగ్గుతాయి. ముఖ్యంగా మారుతున్న వాతావరణంలో క్యారెట్ జ్యూస్ మంచి రక్షణగా పనిచేస్తుంది.
క్యారెట్లలో ఉండే పొటాషియం, విటమిన్ కె రక్తపోటును నియంత్రించడంలో సహాయపడతాయి. దీంతో గుండె సంబంధిత వ్యాధుల ముప్పు తగ్గుతుంది. క్యారెట్ జ్యూస్లోని యాంటీ ఆక్సిడెంట్లు చర్మాన్ని లోపల నుంచి పోషించి కాంతివంతంగా మారుస్తాయి. ముడతలు, మచ్చలు, మొటిమలు వంటి సమస్యలు తగ్గడంతో పాటు వృద్ధాప్య లక్షణాలు ఆలస్యంగా కనిపిస్తాయి. అంతేకాదు, క్యారెట్ జ్యూస్లో ఫైబర్ అధికంగా ఉండటంతో జీర్ణక్రియ మెరుగుపడుతుంది. మలబద్ధకం సమస్య తగ్గి పొట్ట ఆరోగ్యం బాగుంటుంది. కాలేయంలో పేరుకుపోయిన విషపదార్థాలను బయటకు పంపడంలో కూడా క్యారెట్ జ్యూస్ సహకరిస్తుంది.
బరువు తగ్గాలనుకునే వారికి క్యారెట్ జ్యూస్ మంచి ఎంపిక. తక్కువ కేలరీలు, ఎక్కువ ఫైబర్ ఉండటంతో కడుపు నిండిన భావన కలుగుతుంది. దీంతో ఎక్కువగా తినాలనే కోరిక తగ్గి బరువు నియంత్రణలో ఉంటుంది. క్యారెట్ జ్యూస్లో ఉండే విటమిన్ ఇ, యాంటీ ఆక్సిడెంట్లు మెదడు కణాలను రక్షించి జ్ఞాపకశక్తి, ఆలోచనా సామర్థ్యాన్ని మెరుగుపరుస్తాయి. అలాగే ఇందులోని క్యాల్షియం, పొటాషియం దంతాలు, చిగుళ్లను బలంగా ఉంచుతాయి. క్యాన్సర్కు కారణమయ్యే ఫ్రీ రాడికల్స్తో పోరాడే శక్తి కూడా క్యారెట్ జ్యూస్కు ఉంది. క్యారెట్తో పాటు పాలకూర, ఆపిల్, అల్లం కలిపి జ్యూస్ చేసుకుంటే రుచి, పోషకాలు మరింత పెరుగుతాయి. ముఖ్యంగా చలికాలంలో ఈ జ్యూస్ను అలవాటుగా చేసుకుంటే ఆరోగ్యానికి మరిన్ని లాభాలు పొందవచ్చు.