రొమ్ము క్యాన్సర్ అనగానే కేవలం మహిళలకు మాత్రమే పరిమితం అని చాలామంది భావిస్తారు. కానీ, పురుషుల్లో కూడా ఈ క్యాన్సర్ వచ్చే అవకాశం ఉందని వైద్యులు హెచ్చరిస్తున్నారు. రొమ్ము క్యాన్సర్ పురుషులలో రావడం చాలా అరుదు (మొత్తం రొమ్ము క్యాన్సర్ కేసులలో ఇది 1% కంటే తక్కువ). అయితే, అవగాహన లేకపోవడం వల్ల చాలామంది దీనిని సాధారణ గడ్డలుగా భావించి నిర్లక్ష్యం చేస్తారు. ఫలితంగా వ్యాధి ముదిరిన తర్వాత గానీ గుర్తించలేకపోతున్నారు. సాధారణంగా పురుషులలో రొమ్ము కణజాలం (Breast Tissue) తక్కువగా ఉన్నప్పటికీ, అక్కడ ఉండే కణాలలో అసాధారణ మార్పులు సంభవించినప్పుడు క్యాన్సర్ వచ్చే అవకాశం ఉంది. ముఖ్యంగా 60 ఏళ్లు దాటిన వయసు వారిలో ఈ ముప్పు ఎక్కువగా ఉంటుందని హైదరాబాద్లోని ESIC వైద్యులు పేర్కొంటున్నారు.
ప్రధాన లక్షణాలు – ఏయే మార్పులను గమనించాలి?
పురుషులు తమ శరీరంలో వచ్చే కొన్ని మార్పుల పట్ల అప్రమత్తంగా ఉండాలి. ప్రధానంగా:
చాతీ భాగంలో గడ్డలు: నిపుల్ (చనుమొన) కింద లేదా చుట్టుపక్కల గట్టిగా ఉండే నొప్పి లేని గడ్డలు ఏర్పడటం.
చర్మ మార్పులు: రొమ్ము చర్మం ఎర్రగా మారడం, పొలుసులు రావడం లేదా డింపుల్స్ (గుంతలు) పడటం.
ద్రవాలు కారడం: చనుమొనల నుండి రక్తం లేదా నీరు వంటి ద్రవాలు రావడం.
నిపుల్ వెనక్కి వెళ్లడం: నిపుల్ ఒక్కసారిగా లోపలి వైపుకు కుంగిపోవడం.
ఈ లక్షణాలు కనిపించిన వెంటనే ఏమాత్రం సంకోచించకుండా డాక్టరును సంప్రదించడం ఉత్తమం.
కారణాలు మరియు చికిత్స మార్గాలు
పురుషులలో ఈ క్యాన్సర్ రావడానికి ప్రధానంగా జన్యుపరమైన కారణాలు (BRCA1/BRCA2 జీన్స్), కుటుంబ చరిత్ర, మరియు హార్మోన్ల అసమతుల్యత (ఈస్ట్రోజెన్ స్థాయిలు పెరగడం) కారణమవుతాయి. అలాగే విపరీతమైన ఊబకాయం, లివర్ సంబంధిత వ్యాధులు కూడా హార్మోన్లపై ప్రభావం చూపుతాయి. దీనిని ప్రాథమిక దశలోనే గుర్తిస్తే మమోగ్రామ్, బయాప్సీ వంటి పరీక్షల ద్వారా నిర్ధారించి.. సర్జరీ, కీమోథెరపీ లేదా రేడియేషన్ ద్వారా విజయవంతంగా నయం చేయవచ్చు. సరైన సమయంలో స్పందించడమే ప్రాణాపాయం నుంచి రక్షించుకోవడానికి ఏకైక మార్గం.