. జీవనశైలి, ఆహారం వల్ల పెరుగుతున్న ప్రమాదం
. యూరిక్ యాసిడ్, డయాబెటిస్పై కాకరకాయ ప్రభావం
. కాకరకాయ రసం ఎలా తీసుకోవాలి?
Bitter gourd juice: ప్రపంచవ్యాప్తంగా జీవనశైలి మార్పులతో పాటు అనేక ఆరోగ్య సమస్యలు వేగంగా పెరుగుతున్నాయి. ముఖ్యంగా డయాబెటిస్, యూరిక్ యాసిడ్ వంటి వ్యాధులు వయస్సుతో సంబంధం లేకుండా చిన్నా–పెద్దా అనే తేడా లేకుండా ప్రజలను ప్రభావితం చేస్తున్నాయి. భారతదేశం సహా అనేక దేశాల్లో మధుమేహ బాధితుల సంఖ్య ఆందోళన కలిగించే స్థాయిలో పెరుగుతోందని తాజా అధ్యయనాలు వెల్లడిస్తున్నాయి. అదే సమయంలో యూరిక్ యాసిడ్ సమస్య కూడా చాలామందిలో కనిపిస్తోంది. ఈ రెండు వ్యాధులకు ప్రధాన కారణం మన అనారోగ్యకరమైన జీవనశైలి, ఆహారపు అలవాట్లే అని వైద్య నిపుణులు చెబుతున్నారు.
నేటి రోజుల్లో శారీరక శ్రమ తగ్గిపోవడం, ఫాస్ట్ ఫుడ్కు అలవాటు పడటం, అధికంగా చక్కెర, కొవ్వు, ప్యూరిన్ ఎక్కువగా ఉన్న ఆహారం తీసుకోవడం వల్ల శరీరంలో అనేక రకాల అసమతుల్యతలు ఏర్పడుతున్నాయి. ఇవే మధుమేహం, యూరిక్ యాసిడ్ వంటి సమస్యలకు దారి తీస్తున్నాయి. ప్యూరిన్ అధికంగా ఉండే ఆహారం తీసుకుంటే శరీరంలో యూరిక్ యాసిడ్ స్థాయిలు పెరుగుతాయి. దీని ప్రభావంగా గౌట్, ఆర్థరైటిస్, మూత్రపిండాల్లో రాళ్లు, అధిక రక్తపోటు, గుండె సంబంధిత సమస్యలు వచ్చే అవకాశం ఉంటుంది. అందుకే ఈ వ్యాధులను ప్రారంభ దశలోనే నియంత్రించడం చాలా అవసరం.
సహజంగా లభించే కూరగాయల్లో కాకరకాయకు ప్రత్యేకమైన ఔషధ గుణాలు ఉన్నాయి. కాకరకాయలో ఐరన్, మెగ్నీషియం, కాల్షియం, పొటాషియం, విటమిన్ C, బీటా-కెరోటిన్ వంటి పోషకాలు సమృద్ధిగా ఉంటాయి. ఇవి శరీరంలో విషపదార్థాలను బయటకు పంపడంలో, యూరిక్ యాసిడ్ స్థాయిలను తగ్గించడంలో సహాయపడతాయి. గౌట్ వంటి సమస్యలతో బాధపడేవారికి కాకరకాయ రసం ఉపశమనం ఇస్తుందని చెబుతున్నారు. డయాబెటిస్ ఉన్నవారికి కూడా కాకరకాయ ఎంతో ప్రయోజనకరం. ఇందులో ఉండే సహజ సమ్మేళనాలు ఇన్సులిన్లా పనిచేసి రక్తంలో చక్కెర స్థాయిలను సమతుల్యంలో ఉంచేందుకు తోడ్పడతాయి. ఫైబర్ ఎక్కువగా ఉండటం వల్ల జీర్ణక్రియ మెరుగుపడటంతో పాటు షుగర్ స్పైక్స్ తగ్గే అవకాశం ఉంటుంది.
ప్రతిరోజూ ఉదయం ఖాళీ కడుపుతో అర కప్పు కాకరకాయ రసం తాగడం మంచిదిగా భావిస్తారు. చేదుగా అనిపిస్తే కొద్దిగా నిమ్మరసం లేదా నల్ల ఉప్పు కలుపుకోవచ్చు. ఇలా తీసుకోవడం వల్ల యూరిక్ యాసిడ్, ఆర్థరైటిస్, గౌట్ వంటి సమస్యల్లో కొంతమేర ఉపశమనం లభిస్తుంది. రసం మాత్రమే కాకుండా కాకరకాయతో కూరలు, వేపుడు, సూప్ వంటి వంటకాలను కూడా ఆహారంలో చేర్చుకోవచ్చు. అయితే ఈ రకమైన సహజ ఆహారాలను తీసుకునే ముందు మీ ఆరోగ్య పరిస్థితిని బట్టి వైద్యుల సలహా తీసుకోవడం మంచిది. సరైన ఆహారం, వ్యాయామం, ఆరోగ్యకరమైన జీవనశైలి పాటిస్తే డయాబెటిస్, యూరిక్ యాసిడ్ వంటి వ్యాధులను నియంత్రణలో ఉంచుకోవచ్చు.