బార్లీ నీరు..పూర్వీకుల ఆహార రహస్యం..నేటి ఆరోగ్యానికి వరం

. పూర్వకాలపు ధాన్యం నుంచి ఆధునిక ఆరోగ్య పానీయం వరకు

. బార్లీ నీటిలోని పోషకాలు..ఆరోగ్యానికి బలమైన కవచం

. బార్లీ నీరు తయారీ విధానం..సులభం, ఆరోగ్యకరం

Barley Water : పూర్వకాలంలో మన దేశంలో బియ్యానికి ప్రత్యామ్నాయంగా వాడిన ప్రధాన ధాన్యాల్లో బార్లీ ఒకటి. మన పూర్వీకులు బార్లీని రోజువారీ ఆహారంలో భాగంగా తీసుకుంటూ ఆరోగ్యంగా జీవించేవారు. కాలక్రమేణా బియ్యం, గోధుమలకు ప్రాధాన్యం పెరిగినా, బార్లీ విలువ మాత్రం ఏమాత్రం తగ్గలేదు. బార్లీతో చేసిన వంటకాలు మాత్రమే కాదు, బార్లీ నీరు కూడా ఆరోగ్యానికి ఎంతో మేలు చేస్తుందని ఆయుర్వేద నిపుణులు చెబుతున్నారు. అందుకే నేటి ఆధునిక జీవనశైలిలో కూడా బార్లీ నీరు మళ్లీ ప్రాచుర్యంలోకి వస్తోంది. ప్రపంచవ్యాప్తంగా గ్రీక్, బ్రిటన్ వంటి దేశాల్లో బార్లీ నీటితో “కైకియాన్” అనే సంప్రదాయ పానీయాన్ని తయారు చేస్తారు. బ్రిటన్‌లో అయితే బార్లీ నీటిని వేడిగా టీలా తాగడం ఆనవాయితీ. కొందరు ఇందులో నిమ్మరసం, నారింజరసం కలిపి రుచిగా తీసుకుంటారు. ఇలా సంప్రదాయం, ఆరోగ్యం కలిసిన పానీయంగా బార్లీ నీరు గుర్తింపు పొందింది.

బార్లీ నీటిలో ఫైబర్, విటమిన్లు, యాంటీ ఆక్సిడెంట్లు, ఫైటో కెమికల్స్, అవసరమైన ఖనిజ లవణాలు సమృద్ధిగా ఉంటాయి. ఇవి శరీరంలో డిటాక్సిఫికేషన్ ప్రక్రియను వేగవంతం చేసి, వ్యర్థాలను బయటకు పంపిస్తాయి. బార్లీ నీరు సహజ మూత్రవిసర్జనకారిగా పనిచేస్తూ మూత్రనాళాల ఇన్ఫెక్షన్లను తగ్గించడంలో సహాయపడుతుంది. మూత్రాశయ సమస్యలతో బాధపడేవారికి ఇది సహజ నివారణగా ఉపయోగపడుతుంది. క్రమం తప్పకుండా బార్లీ నీరు తాగడం వల్ల మూత్రపిండాల్లో రాళ్లు ఏర్పడే ప్రమాదం తగ్గుతుంది. అలాగే జీర్ణవ్యవస్థ మెరుగుపడి మలబద్ధకం సమస్య తగ్గుతుంది. వాంతులు, విరేచనాల సమయంలో శరీరంలోని ఎలక్ట్రోలైట్ సమతుల్యతను కాపాడటంలో కూడా ఇది దోహదపడుతుంది. రక్తంలో చక్కెర స్థాయిలు నియంత్రణలో ఉండటంతో పాటు కొలెస్ట్రాల్, ట్రైగ్లిజరైడ్స్ తగ్గి గుండె ఆరోగ్యం మెరుగుపడుతుంది.

బార్లీ నీటిని ఇంట్లోనే చాలా సులభంగా తయారు చేసుకోవచ్చు. పొట్టు తీసిన బార్లీ లేదా పెర్ల్ బార్లీని ఉపయోగించవచ్చు. ముందుగా పావు కప్పు బార్లీని శుభ్రంగా కడగాలి. తరువాత నాలుగు కప్పుల నీరు పోసి మధ్యస్థ మంటపై సుమారు అరగంట పాటు ఉడికించాలి. మధ్య మధ్యలో కలుపుతూ ఉండాలి. ఆ తరువాత నీటిని వడకట్టి, గోరువెచ్చగా ఉన్నప్పుడు నిమ్మరసం లేదా తేనె కలిపి తాగవచ్చు. రుచిలో వైవిధ్యం కోసం అల్లం ముక్క, నారింజరసం, దాల్చిన చెక్క పొడి లేదా జీలకర్ర పొడి కూడా కలుపుకోవచ్చు. బార్లీ నీరు తయారైన తర్వాత మిగిలిన గింజలను సలాడ్లు లేదా ఇతర తృణధాన్యాలతో కలిపి తీసుకోవచ్చు. పిల్లలు, పెద్దలు రోజూ బార్లీ నీటిని తీసుకుంటే బరువు నియంత్రణలో ఉండి, కడుపు ఎక్కువసేపు నిండుగా ఉంటుంది. ఈ విధంగా బార్లీ నీరు అనేక రకాలుగా మన ఆరోగ్యానికి మేలు చేస్తుంది. పూర్వీకుల ఆహార విజ్ఞానాన్ని మళ్లీ అలవాటు చేసుకుంటే, ఆరోగ్యకరమైన జీవితం మనకూ సాధ్యమే.