Air Pollution: వాయు కాలుష్యం (Air Pollution) ఎంత తీవ్రంగా మారిందంటే అది గర్భంలో పెరుగుతున్న బిడ్డపై కూడా ప్రభావం చూపుతోంది. వాయు కాలుష్యం పెరుగుతున్న స్థాయి మీ శ్వాస సామర్థ్యాన్ని మాత్రమే కాకుండా మీ ఆలోచనా సామర్థ్యాన్ని కూడా ప్రభావితం చేస్తోంది. ఈ ప్రభావం మీరు మీ తల్లి గర్భంలో ఉన్నప్పటి నుంచే ప్రారంభమవుతుంది. అమెరికాలో పరిశోధన చేస్తున్న కొంతమంది శాస్త్రవేత్తలు ఈ విషయాన్ని వెల్లడించారు.
గర్భిణీ స్త్రీలలో కాలుష్యం- మెదడుపై ప్రభావం
శాస్త్రవేత్తల అభిప్రాయం ప్రకారం.. గర్భిణీ స్త్రీ 2.5 PM (పార్టిక్యులేట్ మ్యాటర్) పరిమాణం గల కణాల సంపర్కంలోకి వస్తే అది ఆమె గర్భంలో పెరుగుతున్న బిడ్డపై, ముఖ్యంగా మెదడుపై ప్రభావం చూపుతుంది. ఈ 2.5 PM కణాలు పరిమాణంలో చాలా చిన్నవిగా ఉంటాయి. వీటిని మానవ కళ్లతో చూడటం అసాధ్యం. మన జుట్టు కంటే కూడా 30 రెట్లు చిన్నగా ఉండే ఈ కణాలు నేరుగా మన మెదడు నరాలపై ప్రభావం చూపుతాయి. దీని కారణంగా మెదడు పనితీరు దెబ్బతింటుంది. ముఖ్యంగా ఈ కణాలలో మన మెదడు సక్రమంగా పనిచేయడానికి చాలా అవసరమైన కొన్ని పదార్థాలు ఉంటాయి.
Also Read: IND vs AUS: నిరాశ‌ప‌ర్చిన రోహిత్‌, కోహ్లీ.. మ్యాచ్‌కు వ‌ర్షం అంత‌రాయం!
ఈ కణాలు ఎలా ఏర్పడతాయో తెలుసా?
ఇవి కార్లు, కర్మాగారాల నుండి విడుదలవుతాయి. వీటిలో మండే ఇంధనం నుండి నేరుగా ఈ కణాలు ఉత్పన్నమవుతాయి.
మెదడు అభివృద్ధికి ఆటంకం
శిశువు తల్లి గర్భంలో ఉన్నప్పుడు మెదడులో మైలినేషన్ (Myelination) అనే ఒక ముఖ్యమైన ప్రక్రియ జరుగుతుంటుంది. తల్లి కలుషిత ప్రాంతంలో నివసిస్తున్నప్పుడు మెదడులోని ఈ మైలినేషన్ ప్రక్రియ ఒత్తిడికి గురవుతుంది. ఎందుకంటే మెదడులోని నరాల మధ్య సంబంధాన్ని ఏర్పరిచే మైలినేషన్ ప్రక్రియ నెమ్మదిగా పనిచేయడం ప్రారంభిస్తుంది.
ఈ పరిశోధనలో 137 మంది నవజాత శిశువులపై పరీక్షలు నిర్వహించారు. కలుషిత ప్రాంతాల్లో నివసించే నవజాత శిశువులలో మైలినేషన్‌పై ప్రభావం కనిపించింది. స్థూలంగా చెప్పాలంటే.. పిండం దశలో మెదడు అభివృద్ధి సరిగా జరగకపోతే భవిష్యత్తులో మానసిక రుగ్మతలు వచ్చే అవకాశం ఎక్కువగా ఉంటుంది. ఇది మెదడుపై ప్రతికూల ప్రభావాన్ని చూపుతుంది.