Fact Checked By Newsmeter
ప్రచారం : కేసీఆర్ రాజకీయాల నుంచి తప్పుకొని అమెరికాలో స్థిరపడనున్నారు.
వాస్తవం : ఈ ప్రచారం తప్పు. రాజకీయాల నుంచి తప్పుకుంటున్నట్లుగా కేసీఆర్ ఎక్కడా ప్రకటించలేదు.
భారత రాష్ట్ర సమితి(బీఆర్ఎస్) పార్టీ అధినేత, తెలంగాణ మాజీ సీఎం క‌ల్వ‌కుంట్ల చంద్రశేఖర్ రావు (కేసీఆర్) ప్రత్యక్ష రాజకీయాలకు గుడ్ బై చెప్పి, అమెరికాలో స్థిరపడతారంటూ ఒక న్యూస్ క్లిప్ సోషల్ మీడియాలో వైరల్ అవుతోంది. ఈ న్యూస్ క్లిప్‌లో.. ‘‘ప్రత్యక్ష రాజకీయాల నుంచి కేసీఆర్ రిటైర్ అవుతారని విశ్వసనీయ సమాచారం. న్యూయార్క్‌లో చింతలపూడి శకుంతలా దేవి ఇంటి పక్కన కొత్త ఇంటిని కేసీఆర్ కొననున్నారు. పెళ్లి కాకముందు నుంచీ శకుంతల దేవితో కేసీఆర్ క్లోజ్ ఫ్రెండ్ షిప్’’(Fact Check) అని ఆ న్యూస్ క్లిప్‌లో ప్రస్తావించారు. ఈ న్యూస్ క్లిప్‌పై తెలంగాణ న్యూస్ టుడే లోగో, లింక్ ఉన్నాయి. ఫేస్‌బుక్‌లో ఈ న్యూస్ క్లిప్‌ను అప్‌లోడ్ చేశారు. (ఆర్కైవ్)
ఫ్యాక్ట్ చెక్‌లో ఏమేం గుర్తించారు ?
- పైన ప్రచారం జరిగిన న్యూస్‌క్లిప్‌లోని సమాచారమంతా తప్పేనని ఫ్యాక్ట్ చెక్‌లో ‘న్యూస్‌మీటర్’ గుర్తించింది.
- ‘తెలంగాణ న్యూస్ టుడే’ పేరుతో ఏ వార్తా సంస్థ కూడా ఉనికిలో లేదని వెల్లడైంది.
- కేసీఆర్ ప్రత్యక్ష రాజకీయాల నుంచి తప్పుకుంటున్నట్లు, అమెరికాకు వెళ్ళబోతున్నట్లు చూపిస్తున్న విశ్వసనీయ వార్తా కథనాలు ఏవీ మాకు మీడియాలో దొరకలేదు.
- బీఆర్ఎస్ పార్టీ సోషల్ మీడియాలో కానీ, మరి వేరే ఎక్కడా కేసీఆర్ రాజకీయాల నుంచి తప్పుకుంటున్నట్లు ప్రకటించలేదు.
- న్యూయార్క్‌లో నివసిస్తున్న చింతలపూడి శకుంతల అనే మహిళ గురించి న్యూస్ క్లిప్‌లో ప్రస్తావించారు. ఆమె వివరాలు కూడా ఇంటర్నెట్‌లో లభించలేదు.
- ‘తెలంగాణ న్యూస్ టుడే’ పేరుతో వార్తా సంస్థే లేదని గతంలో కూడా ఒక కథనం ఫ్యాక్ట్ చెకింగ్‌లో న్యూస్‌మీటర్ గుర్తించింది.
- ఆ న్యూస్ క్లిప్ బ్యానర్‌పై ఉన్న యూఆర్ఎల్ లింక్ కూడా మనుగడలో లేదని మేం గుర్తించాం.
- మేం గూగుల్, బింగ్‌ సెర్చింజన్లలో ఈ న్యూస్‌కు సంబంధించిన వివిధ కీవర్డ్‌లతో సెర్చ్ చేశాం. తెలంగాణ న్యూస్ టుడే డైలీ ఈ-పేపర్ లేదా దాని వెబ్‌సైట్ ఎక్కడా మాకు దొరకలేదు.
- Whois సెర్చ్‌ను ఉపయోగించి telangananewstodaydaily డొమైన్‌ కోసం మేం వెతికాం. ఆ పేరుతో వెబ్‌సైట్ ఇంకా నమోదు కాలేదని మేం గుర్తించాం.
- భారతదేశ వార్తాపత్రికల రిజిస్ట్రార్ కార్యాలయ వెబ్‌సైట్‌లో కూడా ‘తెలంగాణ న్యూస్ టుడే’, ‘తెలంగాణ న్యూస్ టుడే డైలీ’ అనే పేరుతో రిజిస్టర్ అయిన వార్తాసంస్థల వివరాల కోసం మేం ఆన్‌లైన్‌లో వెతికాం. ఈ పేర్లతో ఏ వార్త సంస్థ కూడా నమోదు కాలేదని తేలింది.
ఈ వార్తా సంస్థ పేరుతో ప్రచురించిన రెండు వార్తలు కూడా ఉనికిలో లేవు. తెలంగాణ న్యూస్ టుడే డైలీ సంస్థ పేరుతో వైరల్ అవుతున్న న్యూస్ క్లిప్పింగ్‌లను నమ్మకూడదు. అవన్నీ ఫేక్. బీఆర్ఎస్ నాయకులపై తప్పుడు ఆరోపణలు చేయించేందుకే ఈ న్యూస్ క్లిప్పులను వైరల్ చేయించినట్లుగా కనిపిస్తోంది. కాబట్టి న్యూస్‌మీటర్ ఈ క్లెయిమ్ తప్పు అని నిర్ధారించింది.