Spirituality : పూజా గృహం కేవలం భక్తి ప్రదర్శించే ప్రదేశం మాత్రమే కాదు. వాస్తు శాస్త్రం ప్రకారం ఇది సానుకూల శక్తి ప్రసరణకు కేంద్రంగా పరిగణించబడుతుంది. మన పూర్వీకులు పరమ పవిత్రతతో, శుద్ధచిత్తంతో పూజా కార్యక్రమాలు నిర్వహించేవారు. వారు పాటించిన కొన్ని నియమాలు శాస్త్రీయంగా ఆధారపడినవే. ముఖ్యంగా దీపం, అగరబత్తి, పుష్పాల వినియోగంలో కొన్ని ప్రత్యేక నియమాలను వాస్తు నిపుణులు సూచిస్తున్నారు. ఈ నియమాలను పాటించడం వల్ల ఇంట్లో శుభఫలితాలు, సాంత్వనాత్మక వాతావరణం నెలకొనతాయని నిపుణులు అంటున్నారు.
దీపం పెట్టే దిశ, సమయానికి ప్రాముఖ్యత
పూజా గృహంలో దీపం తూర్పు లేదా ఉత్తర దిశలో పెట్టాలి. పూజ సమయంలో దీపజ్వాల తూర్పు వైపునకు తిరిగేలా చూడాలి. సాయంత్రం వేళ నెయ్యి దీపం వెలిగించడం శుభప్రదంగా భావిస్తారు. దీపాన్ని ఎప్పుడూ ఏకవత్తిగా కాకుండా మూడు వత్తులతో (త్రివర్తి దీపం) వెలిగించాలి. ఇది శాంతి, శక్తి, ఐశ్వర్యాన్ని ఆకర్షిస్తుందనే నమ్మకం ఉంది. దీప శ్లోకాన్ని పఠించడం వల్ల ఆత్మశుద్ధి కలుగుతుందని నిపుణులు అంటున్నారు:
దీపం శ్లోకం
“సాజ్యం త్రివర్తి సంయుక్తం వహ్నినా యోజితం ప్రియం
గృహాణ మంగళం దీపం త్రైలోక్య తిమిరాపహ
భక్త్యా దీపం ప్రయచ్ఛామి దేవాయ పరమాత్మనే
త్రాహిమాం నరకాద్ఘోరాత్ దివ్య జ్యోతిర్నమోస్తు తే”
అగరబత్తికి వాస్తు నియమాలు
అగరబత్తిని దేవుని విగ్రహం కుడివైపు వెలిగించడం శుభప్రదం. ఇది ఆగ్నేయ దిశలో ఉంచితే సానుకూల శక్తి వ్యాప్తి జరుగుతుందని వాస్తు శాస్త్రం చెబుతోంది. కానీ ఆరిపోయిన అగరబత్తిని పూజా గదిలో ఉంచడం వల్ల ప్రతికూలత ఏర్పడవచ్చు. అగరబత్తి బూడిదను ఎక్కడ పడితే అక్కడ కాకుండా మట్టి పాత్రలో వేయాలి. ధూపం వెలిగించే సమయంలో ఈ శ్లోకం పఠించటం శ్రేయస్కరం.
“వనస్పత్యుద్భవిర్దివ్యైః నానా గంధైః సుసంయుతః
ఆఘ్రేయః సర్వదేవానాం ధూపోఽయం ప్రతిగృహ్యతాం”
పువ్వులు సమర్పించేటప్పుడు పాటించాల్సిన నియమాలు
దేవునికి ఎప్పుడూ తాజా సువాసన గల పువ్వులే సమర్పించాలి. వాడిపోయిన లేదా రెక్కలు ఊడిన పూలను ఉపయోగించకూడదు. పుష్పాలను తూర్పు లేదా ఉత్తర దిశలో ఉంచాలి. బిల్వపత్రం, తులసి, తామర వంటి పవిత్ర పుష్పాల వినియోగం శుభప్రదంగా పరిగణించబడుతుంది. ఒకసారి సమర్పించిన పుష్పాలను మరుసటి రోజు తప్పక మార్చాలి. పూలు దొంగతనంగా తెచ్చి పూజ చేయడం శ్రేయస్కరం కాదు. పుష్పాలు అందుబాటులో లేనప్పుడు పసుపు, కుంకుమ, అక్షతలు ప్రత్యామ్నాయంగా ఉపయోగించవచ్చు.
వాస్తు నియమాలు ఒక నమ్మకం
ఈ నియమాలన్నీ పాతకాలం నుంచి వస్తున్న సాంప్రదాయాలపై ఆధారపడినవే. అయితే ఇవి అనుసరించాల్సిందేనని కాదు. ప్రాంతీయ సంప్రదాయాలు, స్థానిక పండితుల మార్గదర్శనం ప్రకారం కొన్ని మార్పులు ఉండొచ్చు. ముఖ్యంగా, మీరు ఏ నియమాన్ని పాటించినా, భక్తితో చేసే ప్రార్థనకు ఎప్పుడూ ఫలితం ఉంటుందని నిపుణులు చెబుతున్నారు. పూజలో కొన్ని నియమాలు పాటించలేకపోయినా, నిశ్చల భక్తి ఉంటే దైవ అనుగ్రహం దక్కుతుందని గుర్తుంచుకోవాలి.
గమనిక: ఈ సమాచారం వాస్తు శాస్త్రం మరియు సంప్రదాయ సూత్రాల ఆధారంగా ఉంది. అనుసరించే ముందు స్థానిక వాస్తు నిపుణులను సంప్రదించడం ఉత్తమం. నమ్మకమే శక్తి. నిశ్చల భక్తి ఎప్పుడూ విజయాన్ని తీసుకొస్తుంది.
Read Also: Minister Narayana : మెగాసిటీగా తిరుపతి అభివృద్ధి : మంత్రి నారాయణ