Naag Panchami 2025 : శ్రావణమాసంలో నాగపంచమి, కార్తీకమాసంలో నాగులచవితి రాగానే పుట్టల దగ్గర భక్తుల రద్దీ మొదలవుతుంది. పుట్టలో పాలు పోసే ఆచారం కొన్ని ప్రాంతాల్లో నేటికీ కొనసాగుతూనే ఉంది. అయితే, పాము పాలు తాగదని తెలిసిన తరుణంలో ఈ సంప్రదాయం ఎందుకు కొనసాగుతోంది? ఇది మూఢనమ్మకమా లేక ఏదైనా లోతైన ఆధ్యాత్మిక, ఆరోగ్యపరమైన సందేశమా? పలు పండితుల అభిప్రాయం ప్రకారం, పుట్టలో పాలు పోయడం శాస్త్రానుసారం తప్పు. పాములకు పాలు తాగే శక్తి ఉండదు. అవి సరిసృపాల జాతికి చెందినవి, జీవరాశులను మాత్రమే ఆహారంగా తీసుకుంటాయి. అయితే ఇది సంప్రదాయంగా వస్తున్న ఆచారం కాబట్టి, దానివెనుక ఉన్న ఆధ్యాత్మిక అర్థం తెలుసుకోవడం అవసరం.
నాగులు – సర్పాలు – పాములు: వ్యత్యాసమేంటి?
పురాణాల ప్రకారం, నాగులు అంటే సర్పజాతికి చెందిన విశిష్ట జీవులు. వీరికి మానవరూపం ధరించగల శక్తి ఉండేది. నరరూపంతో తిరిగే నాగులు భూమ్మీద వాయువును మాత్రమే ఆహారంగా తీసుకుంటూ జీవించగలుగుతారు. దేవతాసర్పాలుగా పిలవబడే ఈ నాగులు చాలా పవిత్రంగా భావించబడ్డారు. వీరు ఉంటే మల్లెపూల వాసన వస్తుందని అంటారు. ఇక, సర్పాలు విషపూరితమైనవి, నేలపై చెలామణి అయ్యేవి. వీటి ఆహారం ఇతర చిన్న జంతువులు. పాములు అనేవి సాదా సరిసృపాలే, జీర్ణవ్యవస్థ గల జీవులు కాదు. అంటే, పాములు తినే ద్రవ పదార్థాలు వాటికి ఉపయోగపడవు. అందుకే, పుట్టలో పాలు పోయడం వల్ల పాములకు కష్టమవుతుంది అనే శాస్త్రీయ స్పష్టత ఉంది.
నాగుల పూజ వెనక ఉన్న శ్రద్ధ, భక్తి
పురాణాల్లోని కథలను పరిశీలిస్తే, శ్రీకృష్ణుడు గీతలో “నాగుల్లో నేను అనంతుడిని” అని పేర్కొన్నాడు. అనంతుడు అంటే ఆదిశేషుడు. వాసుకి, అనందుడు ఇద్దరూ కద్రువకు జన్మించిన కుమారులు. ఈ ఆదిశేషుడు త్రేతాయుగంలో లక్ష్మణుడిగా, ద్వాపరయుగంలో బలరాముడిగా, వేంకటేశ్వరస్వామి అవతారంలో గోవిందరాజులుగా, భగవద్ రామానుజులుగా భూమిపై అవతరించాడని పురాణాలు చెబుతున్నాయి. ఈ దేవతాసర్పాలు భక్తులకు సంతానం, ఆరోగ్యాన్ని ప్రసాదిస్తారని నమ్మకం ఉంది. పురాతన కాలంలో భక్తులు శుద్ధచిత్తంతో, సత్యనిష్ఠతో పూజలు చేస్తే నాగదేవతలు ప్రత్యక్షంగా దర్శనమిచ్చేవారట. క్రమంగా సమాజంలో శౌచం తగ్గిపోయిందని, అందుకే నాగులు దర్శనమివ్వడం తగ్గిందని పండితుల అభిప్రాయం.
మూల్యమైన పూజాచరణం ఎలా చేయాలి?
ప్రస్తుతం పుట్టల్లో ఉండే జీవులు సాధారణ పాములే కావచ్చు. వాటిని పాలు పోసి హింసించడం మంచిది కాదు. నాగపంచమి లేదా నాగులచవితి రోజున ఆలయాల్లో నాగప్రతిష్టలు, నాగశిలల వద్ద పూజలు చేయడం శ్రేష్టమని ధార్మిక గ్రంథాలు స్పష్టంగా పేర్కొంటున్నాయి. నాగబంధం వంటి ప్రత్యేక పూజాచరణలు ద్వారా శాంతి, ఆరోగ్యం, కుటుంబ సుఖసంతోషాలను ఆశీర్వదించేందుకు నాగదేవతల కృప అందించవచ్చు. ఈ సంవత్సరం (2025) నాగపంచమి జూలై 29, మంగళవారం నాడు వచ్చింది. ఈ దినాన కొన్ని ప్రాంతాల్లో ఆలయాల్లో ప్రత్యేక పూజలు నిర్వహిస్తున్నారు. పుట్టల వద్ద పాలు పోయడం కన్నా శాస్త్రోక్తమైన పద్ధతిలో పూజలు చేయడం భక్తి, శ్రద్ధలకు తగ్గ మార్గమని గుర్తించాల్సిన అవసరం ఉంది.
Read Also: Operation sindoor Speech : దేశ ప్రజలను రక్షించడం మా ప్రభుత్వ బాధ్యత : రాజ్‌నాథ్‌ సింగ్‌