శివకేశవులకు ఎంతో ఇష్టమైన మాసం కార్తీక మాసం. ఈ కార్తీకమాసంలో పరమేశ్వరుడితో పాటుగా శ్రీ మహావిష్ణువుని కూడా భక్తిశ్రద్ధలతో పూజిస్తూ ఉంటారు. అంతేకాకుండా ఈ మాసం మొత్తం అంతా నది స్నానాలు ఆచరించి కార్తిక దీపాలను వెలిగిస్తూ ఉంటారు. అయితే ఈ మాసంలో తెలిసి తెలియకుండా కూడా కొన్ని రకాల పొరపాట్లు అస్సలు చేయకూడదట. మరి ఎలాంటి తప్పులు చేయకూడదు ఇప్పుడు మనం తెలుసుకుందాం.. కార్తీక మాసానికి సమానమైన మాసం లేదు, విష్ణుమూర్తికి సమానమైన దేవుడు లేడు. వేదాలతో సమానమైన శాస్త్రం లేదు. గంగతో సమానమైన తీర్థం ఈ లోకంలోనే లేదని అంటారు. శివకేశవులు ఇద్దరికీ అత్యంత ప్రీతికరమైన మాసం కార్తీకమాసం.
ఈ ఏడాది రేపటి నుంచి అనగా నవంబర్ 2 నుంచి కార్తీకమాసం ప్రారంభం కాబోతోంది. శివ భక్తులు ఎంతో భక్తిశ్రద్ధలతో ఈ మాసంలో పరమేశ్వరుడిని ఆరాధిస్తారు. నిత్యం దీపారాధన చేస్తూ శివుడిని ప్రార్థిస్తారు. కార్తీకమాసం అంతా ఏ ఇల్లు చూసినా ధూప దీపాలతో ఆధ్యాత్మిక శోభను సంతరించుకుని కనిపిస్తుంది. తెల్లవారుజామున నిద్రలేచి చన్నీటి స్నానం ఆచరించడం ఈ మాసంలో ప్రత్యేకంగా ఆచరించే ఒక సంప్రదాయం కూడా ఉంది. అలాగే ప్రతిరోజు సాయంత్రం శివాలయానికి వెళ్ళి దీపాలు వెలిగించడం వంటి ఆచారాలను పాటించడం వల్ల జన్మ జన్మల పాపాల నుంచి ప్రక్షాళన కలుగుతుందని భక్తుల నమ్మకం. మరో రెండు రోజుల్లో కార్తీకమాసం ప్రారంభం కాబోతున్న నేపథ్యంలో ఈ మాసంలో ఎలాంటి పనులు చేయాలి, ఎలాంటివి చేయకూడదో తెలుసుకుందాం..
శివుడికి ఎంతో ఇష్టమైన మాసం ఇది. అందువల్ల ఈ మాసంలో పొరపాటున కూడా ఉల్లి, వెల్లుల్లి వంటి పదార్థాలు తీసుకోకూడదట. ముఖ్యంగా మాంసాహారం అసలు ముట్టరాదు. నియమ నిష్టలతో పూజలు చేయాలి. ఇంట్లో ఎవరైనా కార్తీకమాసం పూజలు చేస్తుంటే బయటకు వెళ్ళి తిని రావడం వంటి పనులు కూడా చేయకూడదట. కుటుంబం మొత్తం ఈ నెల రోజులు సాత్విక ఆహారం మాత్రమే తీసుకోవాలని చెబుతున్నారు. తామసిక ఆహారాన్ని దూరం పెట్టాలట. అలాగే మాంసాహారంతో పాటు మద్యం కూడా సేవించకూడదట. దేవుడి మీద భారం వేసి నియమాలు అనుసరించాలని చెబుతున్నారు. అలాగే ప్రదోష కాలంలో నిద్రపోకూడదట. సాయంత్రం వేళ ఇంట్లో ఎవరైనా నిద్రపోతుంటే పెద్దలు ఈ సమయంలో పడుకోకూడదని వారిస్తారు. మరీ ముఖ్యంగా కార్తీక మాసంలో సాయంత్రం పూట నిద్రపోకుండా శివార్చన చేయడం చాలా మంచిదని చెబుతున్నారు. ఈ మాసంలో వీలైతే భార్యాభర్తలు దూరంగా ఉండటం చాలా మంచిది అని చెబుతున్నారు.
అలాగే నేలపై పడుకోవడం నిద్రించడం అలవాటు చేసుకోవాలట. ఎక్కువ సమయం శివుడిని ఆరాధిస్తూ ఉండాలి. అలాగే ఆదివారం రోజు కొబ్బరికాయ, ఉసిరి తినకూడదు. సాధారణంగా కార్తీకమాసంలో ఉసిరి దీపం వెలిగించడం చాలా మంచిది. కానీ ఆదివారం ఒక్కరోజు మాత్రం ఉసిరి, కొబ్బరికాయ తినకూడదని పండితులు చెబుతున్నారు. కార్తీకమాసంలో చేయాల్సిన మొట్టమొదటి పనుల్లో ఉండేది దీప దానం. ఈ మాసంలో దీపదానం చేయడం వల్ల నరకలోక ప్రాప్తి నుంచి విముక్తి కలుగుతుంది. అలాగే తులసి కోట దగ్గర తప్పనిసరిగా ఉదయం, సాయంత్రం దీపం వెలిగించాలట. ఈ మాసంలో చేసే దీపారాధనకు విశేషమైన ప్రాముఖ్యత ఉంటుందని చెబుతున్నారు. ఎవరైనా తెలిసీ తెలియక చేసిన పాపాలు దీప దానం చేయడం, దీపం వెలిగించడం వల్ల తొలగిపోతాయని చెబుతున్నారు..