Spiritual : మన పురాణాలు, శాస్త్ర గ్రంథాల ప్రకారం సాయంత్రం సమయం అనేది అత్యంత పవిత్రమైనది. ఇది శ్రీ మహాలక్ష్మి దేవి భూమిపైకి విచ్చేసే సమయంగా భావించబడుతుంది. అలాంటి పవిత్ర సమయంలో కొన్ని పనులు చేయకూడదని, కొన్ని వస్తువులు ఇతరులకు ఇవ్వకూడదని జ్యోతిష్య శాస్త్రం చెబుతోంది. ఎందుకంటే, అలాంటి చర్యలు మన ఆర్థిక స్థితిని బలహీనపరిచి, దారిద్ర్యానికి దారితీయవచ్చు.
తెల్లటి వస్తువులు ఇవ్వకూడదు
సాయంత్రం సమయంలో పాలు, పెరుగు, ఉప్పు వంటి తెల్లటి వస్తువులను ఇతరులకు ఇవ్వడం శుభదాయకం కాదు. ఇవి శుక్రగ్రహానికి సంబంధించినవిగా పరిగణించబడతాయి. శుక్రుడి స్థితి బలహీనమైతే, మనలో ఆర్థిక స్తిరత తగ్గి, లావాదేవీలు గందరగోళంగా మారుతాయి. శాస్త్రాలు చెబుతున్నట్లుగా, తెల్లటి పదార్థాలను సూర్యాస్తమయం తర్వాత దానం చేయడం వల్ల లక్ష్మీదేవి అనుగ్రహం తగ్గిపోతుంది.
డబ్బు లావాదేవీలు వద్దు
సాయంత్రం సమయంలో డబ్బు అప్పు ఇవ్వడం, డబ్బుతో సంబంధిత లావాదేవీలు చేయడం సాంకేతికంగా అశుభం అని భావిస్తారు. లక్ష్మీదేవి రాక సమయములో మీ ఇంట్లో నుంచి ధనం బయటకు పోతే, అది ఆర్థిక నష్టం తీసుకురాగలదని పండితులు హెచ్చరిస్తున్నారు. ఈ సమయంలో మీరు డబ్బు ఇవ్వడం వల్ల మీపై లక్ష్మీ అనుగ్రహం తగ్గిపోయే అవకాశముంది.
తులసి మొక్క – నివారణలు, నియమాలు
తులసి మొక్కను భారతీయ సంస్కృతిలో దేవతల పూజలో భాగంగా చూస్తారు. ఇది శుద్ధి, ఆరోగ్యానికి ప్రతీక. కానీ సాయంత్రం తర్వాత తులసిని ఎవరైనా అడిగితే, వాళ్లకు ఇవ్వకూడదు. తులసి మొక్కను ఇవ్వడం వల్ల మీ ఇంటి నుంచి పవిత్ర శక్తులు వెళ్లిపోతాయని నమ్మకం. దీనివల్ల లక్ష్మీదేవి మీ ఇంటికి రాకుండా పోవచ్చు. కనుక, తులసిని పగలు సమయంలో మాత్రమే పంచుకోవాలని పండితులు సూచిస్తున్నారు.
పసుపు – గురుగ్రహానికి సంకేతం
పసుపు అనేది భారతీయ సంప్రదాయంలో పవిత్ర పదార్థం. ఇది గురుగ్రహాన్ని సూచిస్తుంది. సాయంత్రం సమయానికి పసుపును ఇతరులకు ఇవ్వడం వల్ల గురుగ్రహ స్థితి బలహీనమవుతుంది. దీనివల్ల వ్యక్తిగత జీవితం, కుటుంబ సౌఖ్యం ప్రభావితమయ్యే అవకాశం ఉంది. పసుపు దానం చేయాలంటే అది ఉదయం లేదా మధ్యాహ్నం సమయంలో మాత్రమే చేయాలని విశేష సూచన.
వెల్లుల్లి, ఉల్లిపాయల నియమాలు
వెల్లుల్లి మరియు ఉల్లిపాయలు సాధారణంగా కేతుగ్రహానికి సంబంధించి ఉన్నాయని జ్యోతిష్య శాస్త్రం చెబుతోంది. సాయంత్రం తర్వాత ఈ పదార్థాలను ఇతరులకు ఇవ్వడం వల్ల కేతు ప్రభావం పెరిగి, నెగటివ్ ఎనర్జీకి తలుపులు తెరవవచ్చునని పండితులు హెచ్చరిస్తున్నారు. కాబట్టి ఈ సమయంలో వీటిని ఇవ్వకుండా ఉండటం మంచిది. కాగా, ఈ నియమాలు శాస్త్రాలకు, పురాణాల వ్యాఖ్యానాలకు అనుసంధానంగా రూపొందించబడినవి. ఎవరు నమ్మినా, నమ్మకపోయినా, సాయంత్రం సమయాన్ని ఆధ్యాత్మికంగా చూసుకుంటే మంచిదే. లక్ష్మీదేవి అనుగ్రహం పొందాలంటే చిన్నచిన్న అలవాట్లను పాటించడం ప్రారంభించాలి. వాటిలో మొదటిది – సాయంత్రం సమయాన్ని గౌరవించడం.
Read Also: Telangana : కొత్త రేషన్‌ కార్డుల జారీకి ముహూర్తం ఖరారు.. 41లక్షల మందికి రేషన్‌కార్డులు జారీ