సుదర్శన చక్రం మహిర్షిని ఎందుకు వెంబడించిందో తెలుసా?

. తీర్థగ్రహణం, మహర్షి ఆగ్రహం

. సుదర్శన చక్రం రక్షణ, భక్తికి గెలుపు

. అంబరీషుడి భక్తి విజయం

Sudarshana Chakra : పురాణకథల్లో అంబరీష మహారాజు పేరు వినగానే అపారమైన భక్తి, క్రమశిక్షణ గుర్తుకొస్తాయి. విష్ణుభక్తుడైన ఆయన ఏకాదశి వ్రతాన్ని అత్యంత నిష్ఠతో పాటించేవాడు. ఏకాదశి ఉపవాసం అనంతరం ద్వాదశి ఘడియల్లో భోజనం చేయడం శాస్త్రోక్తమైన నియమం. ఈ నియమాన్ని తప్పకుండా పాటించాలనే సంకల్పంతోనే అంబరీషుడు ఆ రోజు తన వ్రతాన్ని ముగించేందుకు సిద్ధమయ్యాడు. అయితే అతిథి సత్కారానికి ఎల్లప్పుడూ ప్రాధాన్యం ఇచ్చే రాజు, తన వద్దకు వచ్చిన మహర్షి దుర్వాసుని కోసం భోజనాన్ని వాయిదా వేయడం ధర్మమని భావించాడు. ఇక్కడే ధర్మసంకట పరిస్థితి ఏర్పడింది. అతిథి మర్యాదా, వ్రత నియమాల మధ్య సమతుల్యత ఎలా సాధించాలి అనే ప్రశ్న ముందుకొచ్చింది.

దుర్వాస మహర్షి స్నానానికి వెళ్లి తిరిగి రావడంలో ఆలస్యం జరిగింది. ద్వాదశి ఘడియలు ముగిసే సమయం దగ్గరపడటంతో వ్రత భంగం అయ్యే ప్రమాదం కనిపించింది. అప్పుడు సభలోని పండితుల సూచన మేరకు అంబరీషుడు కేవలం తీర్థాన్ని మాత్రమే పుచ్చుకున్నాడు. ఇది భోజనం చేసినట్టుగా కాకపోయినా, వ్రత నియమాలు నిలబెట్టే మార్గమని వారు వివరించారు. అయితే తిరిగి వచ్చిన దుర్వాస మహర్షి దీనిని తనకు జరిగిన అవమానంగా భావించాడు. అతిథి రాకముందే ఏదైనా స్వీకరించడాన్ని అహంకారంగా అర్థం చేసుకుని మహర్షి ఆగ్రహంతో మండిపడ్డాడు. ఆ క్షణంలోనే తన తపోబలంతో ఓ భయంకర రాక్షసిని సృష్టించి రాజుపైకి పంపాడు. ధర్మబద్ధంగా నడిచిన రాజుపై ఇలా విపత్తు ముంచుకొచ్చింది.

అంబరీషుడు భయపడలేదు. ఆయుధాలు ఎత్తకుండా, శరణాగతి భావంతో విష్ణుమూర్తిని స్మరించాడు. భక్తుని ఆర్తిని ఆలకించిన శ్రీహరి తన సుదర్శన చక్రాన్ని పంపాడు. అది దుర్వాసుడు సృష్టించిన కృత్యను క్షణాల్లో సంహరించింది. అంతటితో ఆగకుండా, అహంకారానికి ప్రతీకగా మారిన దుర్వాస మహర్షినే వెంబడించింది. తన తప్పు తెలుసుకున్న మహర్షి బ్రహ్మలోకం, శివలోకం తిరిగి చివరకు విష్ణుమూర్తిని ఆశ్రయించాడు. అయితే శ్రీహరి స్పష్టంగా చెప్పారు. “నా భక్తుడే నాకు ఆధారం. అతని క్షమ లేకుండా నీకు రక్షణ లేదు.” చివరకు అంబరీషుడి వద్దకు వచ్చి క్షమాపణ కోరిన దుర్వాసుడిని రాజు విశాల హృదయంతో క్షమించాడు. అప్పుడు మాత్రమే సుదర్శన చక్రం వెనుదిరిగింది. ఈ కథ భక్తి శక్తి ఎంత గొప్పదో, ధర్మాన్ని ఆచరించినవారికి దేవుడు ఎలా అండగా నిలుస్తాడో చాటిచెప్పుతుంది. అంబరీషుడి వినయం, క్రమశిక్షణ, భగవంతునిపై అచంచల విశ్వాసం తరతరాలకు ఆదర్శంగా నిలిచాయి.