ఋతువులతో రంగులు మారే వినాయకుని ఆలయం..ఎక్కడుందో తెలుసా?

. కాలానుగుణ అద్భుతాలతో భక్తులను ఆకర్షిస్తున్న వినాయగర్ ఆలయం

. బావి నీటిలోనూ అదే అద్భుతం

. 12వ శతాబ్దపు ఆలయ ప్రాంగణంలో ప్రకృతి లీలలు

Tamil Nadu : కేరళపురం గ్రామంలో కొలువై ఉన్న శ్రీ మహాదేవర్ అతిశయ వినాయగర్ ఆలయం భక్తులకు మాత్రమే కాదు పరిశోధకులకు కూడా ఆశ్చర్యాన్ని కలిగిస్తోంది. ఈ ఆలయంలోని ప్రధాన ఆకర్షణ వినాయకుడి విగ్రహమే. సాధారణంగా శిలా విగ్రహాలు ఒకే రంగులో దర్శనమిస్తాయి. కానీ ఇక్కడి వినాయక విగ్రహం కాలానుగుణంగా రంగులు మారుతూ కనిపించడం విశేషం. ఉత్తరాయణ కాలంలో విగ్రహం నలుపు రంగులో దర్శనమిస్తే దక్షిణాయన సమయంలో తెలుపు వర్ణంలో మెరుస్తోంది. ఈ మార్పును భక్తులు ప్రత్యక్షంగా గమనిస్తుంటారు. ప్రకృతి చక్రంతో కలిసి దేవత స్వరూపం మారుతుందనే భావన భక్తుల్లో గాఢ విశ్వాసాన్ని పెంచుతోంది. శాస్త్రీయంగా వివరణ ఇవ్వలేని ఈ పరిణామాన్ని చాలామంది “మిరాకిల్ వినాయకుడు”గా కొనియాడుతున్నారు.

ఆలయ ప్రాంగణంలో ఉన్న పురాతన బావి కూడా మరో విశేషానికి నిలయంగా మారింది. వినాయక విగ్రహం ఏ రంగులో దర్శనమిస్తుందో, బావి నీరు దానికి విరుద్ధమైన రంగులోకి మారుతుందని స్థానికులు చెబుతున్నారు. ఉదాహరణకు, విగ్రహం నలుపు వర్ణంలో ఉన్నప్పుడు బావి నీరు తెల్లగా కనిపిస్తే, విగ్రహం తెలుపు రంగులో ఉన్న సమయంలో నీరు గాఢంగా మారుతుందని భక్తుల అనుభవం. ఈ వింతను ప్రత్యక్షంగా చూడడానికి దూర ప్రాంతాల నుంచి కూడా జనాలు తరలివస్తున్నారు. నీటి స్వభావంలో వచ్చే ఈ మార్పు వెనుక ప్రకృతి కారణాలున్నాయా లేక దైవ మహిమేనా అన్న ప్రశ్నలు తలెత్తుతున్నా, భక్తులు మాత్రం దీనిని వినాయకుడి లీలగా భావిస్తున్నారు. ఈ బావి నీటిని పవిత్రంగా భావించి  పూజల సమయంలో వినియోగిస్తుంటారు.

సుమారు 12వ శతాబ్దానికి చెందిన ఈ పురాతన ఆలయ ప్రాంగణంలో ఉన్న మర్రిచెట్టు కూడా మరో అద్భుతానికి నిదర్శనం. సాధారణంగా చెట్లు ఒకే కాలంలో ఆకు రాల్చడం, చిగురించడం చేస్తాయి. కానీ ఈ మర్రిచెట్టు మాత్రం కాలానుగుణంగా విభిన్నంగా స్పందిస్తుందని స్థానికులు చెబుతున్నారు. కొన్ని నెలల్లో పూర్తిగా ఆకులు రాల్చి నిర్జీవంగా కనిపించే ఈ చెట్టు మరికొన్ని కాలాల్లో ఒక్కసారిగా చిగురించి పచ్చదనంతో కళకళలాడుతుంది. ఈ మార్పులు ఆలయంలో జరిగే ఇతర అద్భుతాలతో అనుసంధానమై ఉన్నాయనే నమ్మకం బలంగా ఉంది. ఈ ఆలయం కేవలం పూజా స్థలం మాత్రమే కాకుండా ప్రకృతి దైవ సమన్వయానికి ప్రతీకగా నిలుస్తోంది. రంగులు మార్చుకునే వినాయకుడు విరుద్ధ వర్ణంలోకి మారే బావి నీరు కాలాన్ని అనుసరించి స్పందించే మర్రిచెట్టు ఇవన్నీ కలిసి కేరళపురంలోని శ్రీ మహాదేవర్ అతిశయ వినాయగర్ ఆలయాన్ని ఒక అరుదైన ఆధ్యాత్మిక క్షేత్రంగా మలుస్తున్నాయి. అందుకే ఈ ఆలయం నేటికీ భక్తులను ఆసక్తిగల వారిని అబ్బురపరుస్తూనే ఉంది.