ఆషాడమాసం అంటే అందరికీ ఆసక్తి ఉంటుంది. కొత్త దంపతులు, అత్త అళ్లుల్లు, అత్త కోడళ్లకే కాకుండా ఆధ్యాత్మికంగా కూడా చాలా ప్రాశస్త్యం ఉంది. ఆషాడమాసం ఎన్నో పర్వదినాలను తీసుకువస్తుంది. పూర్వాషాడ నక్షత్రంలో పౌర్ణమి వస్తుంది. కాబట్టి ఆషాడమాసం అంటారు. ఆధ్యాత్మికపరంగా చూసినట్లయితే ఈ మాసానికి ఎంతో విశిష్టత ఉంది. ఈ నెలలో వచ్చే ఏకాదశిని తొలిఏకాదశిగా జరుపుకుంటారు. ఆషాడమాసంలో తెలంగాణలో బోనాలు ప్రారంభం అవుతాయి.
సూర్యుడు ఈ మాసంలో కర్కాటక రాశిలోకి ప్రవేశిస్తాడు. అప్పటి నుంచి దక్షిణాయానం ప్రారంభం అవుతుంది. పూరీక్షేత్రంలో ఆషాడశుద్ధ పాడ్యమినాడు జగన్నాథ రథయాత్ర నిర్వహిస్తారు. ఈ మాసంలోనే స్కందపంచమి, సుబ్రమణ్యషష్టి వస్తుంది. తొలిఏకాదశి పర్వదినం కూడా వస్తుంది. మహాభారతాన్ని రచించిన వ్యాసభగవానుడిని ఆరాధించే రోజే ఆషాఢపౌర్ణమి దీన్నే గురుపౌర్ణమిగా వ్యవహరిస్తారు. ఈ మాసంలో చాతుర్మాస్య వ్రతదీక్షలు ప్రారంభం అవుతాయి. తొలిఏకాదశి నాడు క్షీరసాగరంలో పవళించిన శ్రీ మహావిష్ణువు విశ్రమిస్తాడు.
దీంతో తొలిఏకాదశిగా భక్తితో దీక్ష చేపడతుంటారు. ఎంతో విశష్టత కలిగిన సికింద్రాబాద్ శ్రీ మహంకాళి అమ్మవారి బోనాలు కూడా ఈ నెలలోనే వైభవంగా జరుగుతాయి. ఎంతో విశిష్టత, ఆధ్యాత్మికం కలిసిన విశిష్టమైన మాసం ఆషాడమాసం.