Maha Shivaratri: హిందువులు జరుపుకునే ప్రధాన పండుగల్లో మహాశివరాత్రి కూడా ఒకటి. మహాశివరాత్రి పండుగను హిందువులు ఎంతో ప్రత్యేకంగా జరుపుకుంటారు. ప్రతీ సంవత్సరం శివరాత్రి పండుగ మాఘ మాసంలో వస్తుంది. ఈసారి హిందూ క్యాలెండర్ ప్రకారం, శివరాత్రి ఫిబ్రవరి 26వ తేదీన వచ్చింది. అయితే, చాలామంది తెలుసుకోవాల్సిన విషయం ఏమిటంటే శివరాత్రి, మాస శివరాత్రి రెండు వేరు.
ఆ రెండిటి మధ్య తేడా చాలా తక్కువ మందికి మాత్రమే తెలిసి ఉంటుంది. అయితే, ఈ రెండిటి మధ్య తేడా గురించి ఇప్పుడు తెలుసుకుందాం. మహా శివరాత్రి నాడు శివుడు పార్వతీ దేవిని వివాహం చేసుకున్నాడని, ఆ రోజున శివుడిని ఆరాధించి, ప్రత్యేక పూజలు చేస్తారు. ఉపవాసం, జాగరణ కూడా చేస్తారు.
మహాశివరాత్రి, మాస శివరాత్రి:
మహాశివరాత్రి, మాస శివరాత్రి ఒకటేనా? ఈ రెండిటి మధ్య పెద్ద తేడా ఉంది. రెండు ఒకటి కాదు. తెలుగు పంచాంగం ప్రకారం, శివరాత్రిని ఐదు రకాలుగా విభజించారు.
- నిత్య శివరాత్రి – రోజూ శివుడిని ఆరాధిస్తూ ఉంటారు.
- ప్రతి నెలలో శుక్ల బహుళపక్షాల వేళ చతుర్దశి – ఈ సమయంలో శివుడిని ఆరాధిస్తారు.
- ప్రతి నెలా బహుళ చతుర్దశి నాడు – మాస శివరాత్రిని జరుపుకుంటూ ఉంటాము.
- మాఘమాసంలో బహుళ చతుర్దశి నాడు – మహాశివరాత్రి వేడుకలు జరుపుకుంటారు.
- యోగులు, యోగ సమాధిలో ఉన్న శివుడిని ఆరాధిస్తారు – వారు ఉపవాసం కూడా ఉంటారు.
మాస శివరాత్రి అంటే ఏంటి?
హిందూ మత విశ్వాసం ప్రకారం, ప్రతీ నెలలో అమావాస్య ముందు వచ్చే చతుర్దశి నాడు మాస శివరాత్రిని జరుపుకుంటారు. ఆ రోజున ఉపవాస దీక్ష చేస్తారు. శివుడిని స్మరించుకుంటారు. ప్రదోషవ్రతం చేసినప్పుడు శివుడికి జలాభిషేకం, బిల్వాలతో పూజలు చేస్తారు.
మహా శివరాత్రి, మాస శివరాత్రికి మధ్య తేడా
మహాశివరాత్రి పండుగను ఏడాదికి ఒకసారి మాత్రమే జరుపుకుంటారు. అది మాఘమాసం కృష్ణపక్షం వచ్చే చతుర్దశి తిధి నాడు. ఈ రోజున పార్వతీ పరమేశ్వరుల కళ్యాణం జరిగిందని నమ్ముతారు. మాస శివరాత్రి అంటే ప్రతి నెలలో కృష్ణపక్షంలో చతుర్దశి తిధి రోజున మాస శివరాత్రిని జరుపుకుంటారు. ఈ ప్రత్యేక రోజుల్లో శివుడిని ఆరాధించడం వలన విశేష ఫలితాలను పొందవచ్చు.
గమనిక: ఈ కథనంలో ఇచ్చిన సమాచారం, సూచనలు పూర్తిగా నిజమైనవి, ఖచ్చితమైనవి అని మేము చెప్పలేము. నిపుణుల సూచనల ప్రకారమే ఈ సమాచారాన్ని అందిస్తున్నాం. వీటిని పాటించే ముందు సంబంధిత రంగంలోని నిపుణుల సలహా తీసుకోవడం మంచిది.