India-Pakistan tensions : కేంద్ర ప్రభుత్వం తాజా పరిస్థితుల నేపథ్యంలో మరో కీలక నిర్ణయం తీసుకుంది. భారత్ – పాకిస్తాన్ దేశాల మధ్య పెరుగుతున్న ఉద్రిక్తతలు, పాకిస్తాన్ నుంచి వస్తున్న భద్రతా ముప్పుల దృష్ట్యా, చార్ ధామ్ యాత్రను తాత్కాలికంగా నిలిపివేసేందుకు మోడీ సర్కార్ ఆదేశాలు జారీ చేసింది. భక్తుల భద్రతే ప్రథమ ప్రయోజనంగా భావించిన కేంద్రం, తదుపరి ఉత్తర్వులు వచ్చేంత వరకు యాత్ర కొనసాగించవద్దని స్పష్టం చేసింది.
Read Also: Srinagar Explosions: శ్రీనగర్‌ ఎయిర్‌పోర్టు‌పై పాక్ దాడి.. దాల్‌ లేక్‌లో మిస్సైల్ పేలుడు
ఇటీవలి పరిణామాలను పరిశీలిస్తే, పాకిస్తాన్ ఆధారిత ఉగ్రవాద సంస్థలు భారత దేశంలో హిందూ పుణ్యక్షేత్రాలపై డ్రోన్ దాడులకు యత్నిస్తున్నాయని ఇంటెలిజెన్స్ వర్గాల హెచ్చరికలు వెలువడ్డాయి. ముఖ్యంగా ఉత్తరాఖండ్‌లోని ప్రముఖ దేవాలయాల వద్ద భద్రతా పరిస్థితులపై కేంద్రం సీరియస్ అయింది. గత వారం ఆలయ తలుపులు తెరుచుకున్నప్పటికీ, పెద్ద సంఖ్యలో భక్తులు యాత్రకు తరలి వస్తున్న వేళ, ప్రమాదాలను నివారించేందుకు ఈ నిర్ణయం తీసుకున్నారు.
బద్రినాథ్, కేదార్నాథ్, గంగోత్రి, యమునోత్రి దేవాలయాలను కలిగిన చార్ ధామ్ యాత్ర హిందువులకు ఆధ్యాత్మికంగా అత్యంత ప్రాముఖ్యత కలిగినది. ప్రతి సంవత్సరం లక్షలాది మంది భక్తులు ఈ యాత్రలో పాల్గొంటారు. ప్రస్తుతం భద్రతా ముప్పు దృష్ట్యా ఈ యాత్రను నిలిపివేయాలని కేంద్ర హోం మంత్రిత్వ శాఖ సూచించింది. భక్తులు తాము ప్లాన్ చేసుకున్న యాత్రను వాయిదా వేసుకోవాలని, ఎలాంటి రద్దీ నివారణ చర్యలు తీసుకోవాలన్న సూచనలతో ప్రభుత్వం ముందుకొచ్చింది.
అంతేకాకుండా, చార్ ధామ్ యాత్రకు ఉపయోగించే హెలికాప్టర్ సేవలను కూడా తాత్కాలికంగా నిలిపివేస్తున్నట్లు అధికారులు ప్రకటించారు. ఇది భక్తుల కోసం తీసుకున్న ముందు జాగ్రత్త చర్య అని తెలిపారు. భక్తులు ప్రభుత్వ సూచనలను గౌరవించి, తదుపరి అధికారిక సమాచారం వచ్చేవరకు యాత్రకు వెళ్లకుండా ఉండాలని విజ్ఞప్తి చేశారు. ఈ నిర్ణయం వల్ల యాత్రపై ప్రభావం పడనప్పటికీ, భక్తుల ప్రాణభద్రతే ప్రభుత్వానికి ముఖ్యమని అధికార వర్గాలు స్పష్టం చేశాయి. భద్రతా పరిస్థితులు మెరుగవుతున్న కొద్దీ యాత్ర పునఃప్రారంభంపై నిర్ణయం తీసుకుంటామని తెలిపాయి.
Read Also: Pakistan Attack: 26 ప్రదేశాల్లోకి పాక్ డ్రోన్లు.. నాలుగు ఎయిర్‌బేస్‌లపై దాడి