JN.1 Variant: విజృంభిస్తోన్న కరోనా వైరస్ కొత్త సబ్-వేరియంట్ JN.1.. మాస్క్ మస్ట్..!

Covid 19

JN.1 Variant: ప్రపంచ వ్యాప్తంగా కరోనా వైరస్ మరోసారి విజృంభిస్తోంది. భారత్‌తో పాటు పలు దేశాలు దీని బారిన పడుతున్నాయి. ఈసారి కొత్త రకం (JN.1 Variant) కరోనా వైరస్ బారిన పడుతున్నారు. ఈ మేరకు భారత ప్రభుత్వ ఆరోగ్య మంత్రిత్వ శాఖ పలు రాష్ట్రాలకు హెచ్చరికలు జారీ చేసింది. అలాగే ప్రజలు రద్దీగా ఉండే ప్రదేశాలకు వెళ్లకుండా, మాస్కులు ధరించాలని రాష్ట్ర ప్రభుత్వాలు ప్రజలకు సూచిస్తున్నాయి.

కరోనా వైరస్ కొత్త సబ్-వేరియంట్ JN.1 గురించి దేశంలో హెచ్చరికలు చేస్తున్నారు. నిపుణుల బృందం కొత్త వేరియంట్‌ను నిశితంగా పరిశీలిస్తోంది. ఇదిలా ఉండగా దేశంలో 21 JN.1 వేరియంట్ కేసులు నమోదయ్యాయని, ఈ జీనోమ్‌పై ఇండియన్ కౌన్సిల్ ఆఫ్ మెడికల్ రీసెర్చ్ (ICMR) పరిశోధనలు చేస్తోందని నీతి ఆయోగ్ సభ్యుడు డాక్టర్ వీకే పాల్ తెలిపారు. గోవాలో అత్యధికంగా 19 కేసులు నమోదవగా, కేరళ, మహారాష్ట్రల్లో ఒక్కో కేసు నమోదైంది.

బెంగళూరు, చండీగఢ్‌లో మాస్క్ మస్ట్

బెంగళూరులో కోవిడ్ JN.1 కొత్త వేరియంట్ కేసులు వచ్చిన తర్వాత ప్రజలు మాస్క్‌లు ధరించాలని సూచించారు. అదే సమయంలో చండీగఢ్‌లో మాస్కులు ధరించడం తప్పనిసరి అయింది. ఇక్కడ ప్రజలు రద్దీ ప్రదేశాలు, ఆసుపత్రులలో మాస్క్‌లు ధరించాలని అధికారులు కోరారు. ఇదిలా ఉంటే ఢిల్లీలోని సఫ్దర్‌జంగ్ ఆసుపత్రి వైద్యులు JN.1 వేరియంట్ విషయంలో జాగ్రత్తగా ఉండాలని సూచించారు. కరోనాపై భయాందోళన చెందాల్సిన అవసరం లేదన్నారు.

Also Read: Covid Sub-Variant: 3 రాష్ట్రాల్లో 21 కొత్త వేరియంట్ JN1 కేసులు

కరోనా కొత్త వేరియంట్ గురించి హెచ్చరిక

కరోనా అనేది ఆర్‌ఎన్‌ఏ వైరస్ అని, ఇది ఎప్పటికప్పుడు కొత్త రూపాలను తీసుకుంటుందని ఓ డాక్టర్ చెప్పారు. ఈసారి కరోనా వైరస్ JN.1 కొత్త ఉప-వేరియంట్ ఉద్భవించింది. అయితే, ఈ వేరియంట్‌కు సంబంధించి ఢిల్లీలో ఇంకా ఎలాంటి కేసు నమోదు కాలేదు. కరోనా యొక్క కొత్త వేరియంట్‌పై నిఘా ఉంచామని ఆయన అన్నారు. దాని గురించి కూడా అప్రమత్తంగా ఉన్నాము. కరోనా లక్షణాలను చూపించే వ్యక్తులను పరీక్షించడం, జీనోమ్ సీక్వెన్సింగ్ కోసం కూడా పంపుతున్నాం. తద్వారా కొత్త వేరియంట్‌లను గుర్తించవచ్చని తెలిపారు.

ఎవరికైనా దగ్గు, జలుబు, గొంతునొప్పి, ఛాతిలో నొప్పి, శ్వాస తీసుకోవడంలో ఇబ్బంది ఉంటే వెంటనే వైద్యుల వద్ద పరీక్షలు చేయించుకోవాలని వైద్యులు సూచించారు. ఈ సమయంలో శ్వాసకోశ సమస్యలు, ఆస్తమా ఉన్న రోగులు చాలా జాగ్రత్తగా ఉండాలన్నారు. చలికాలంలో ప్రజలు తీవ్రమైన వ్యాధుల పట్ల జాగ్రత్తగా ఉండాలని, ఎందుకంటే కరోనా వైరస్‌తో మరణిస్తున్న వ్యక్తులు ఇప్పటికే షుగర్ లేదా గుండె సంబంధిత వ్యాధులతో బాధపడుతున్నారని అన్నారు.