Dharmendra: ప్రముఖ బాలీవుడ్ నటుడు ధర్మేంద్ర (Dharmendra) కన్నుమూశారు. ‘హీ-మ్యాన్’గా పిలువబడే ఈ నటుడు 89 సంవత్సరాల వయస్సులో నేడు తుది శ్వాస విడిచారు. ధర్మేంద్ర గత కొన్ని రోజులుగా ముంబైలోని బ్రీచ్ క్యాండీ హాస్పిటల్‌లో చికిత్స పొందుతూ.. అక్కడే తుదిశ్వాస విడిచారు. ఈ దిగ్గజ నటుడి మరణంతో బాలీవుడ్‌లో విషాద ఛాయలు అలుముకున్నాయి. ధర్మేంద్ర మరణవార్తను బాలీవుడ్ మీడియా ధృవీకరించింది.
ధర్మేంద్ర అక్టోబర్ 31, 2025న సాధారణ ఆరోగ్య పరీక్షల నిమిత్తం ఆసుపత్రికి చేరుకున్నారు. ఆయన శ్వాస తీసుకోవడంలో ఇబ్బంది పడుతుండటంతో నటుడిని ఆసుపత్రిలో చేర్చారు. గత కొద్ది రోజులుగా ధర్మేంద్ర ఐసీయూలో చికిత్స పొందుతుండగా.. నవంబర్ 10న ఆయన ఆరోగ్యం విషమంగా ఉందనే వార్తలు వచ్చాయి. దీంతో హేమా మాలిని, సన్నీ డియోల్, ఈషా డియోల్, ఆయన మనవళ్లు కరణ్ డియోల్, రాజ్‌వీర్ డియోల్ ఆసుపత్రికి వెళ్లి ఆయన్ని పరామర్శించారు. అలాగే నవంబర్ 11న ఆయన మృతిచెందార‌నే వార్త కూడా వైర‌ల్ అయింది. అయితే ఆయన మ‌ర‌ణించ‌లేద‌ని ధర్మేంద్ర కుమార్తె ఆరోజే వివ‌ర‌ణ ఇచ్చారు.
1960లో బాలీవుడ్ అరంగేట్రం
ధర్మేంద్ర పూర్తి పేరు ధర్మేంద్ర కేవల్ కృష్ణ డియోల్. ఆయన డిసెంబర్ 8, 1935న పంజాబ్‌లోని నస్రాని గ్రామంలో జన్మించారు. ఆయన తన నటనా జీవితాన్ని 1960లో విడుదలైన ‘దిల్ భీ తేరా హమ్ భీ తేరే’ సినిమాతో ప్రారంభించారు. ఆ తర్వాత 1961లో వచ్చిన ‘బాయ్ ఫ్రెండ్’ సినిమాలో సహాయక పాత్రలో కనిపించారు.
Also Read: Khammam : కలెక్టర్ అనుదీప్ చేపట్టిన ‘చదవండి..అర్ధం చేసుకోండి..ఎదగండి’ కార్యక్రమానికి విశేష స్పందన
ధర్మేంద్ర కుటుంబం వివరాలు
ధర్మేంద్ర తన జీవితంలో రెండు వివాహాలు చేసుకున్నారు. ఆయన మొదటి వివాహం ప్రకాష్ కౌర్‌తో జరిగింది. వీరికి సన్నీ డియోల్, బాబీ డియోల్, విజేత డియోల్, అజితా డియోల్ అనే నలుగురు పిల్లలు ఉన్నారు. ఆ తర్వాత మొదటి భార్యకు విడాకులు ఇవ్వకుండానే దివంగత నటుడు 1980లో హేమా మాలినిని వివాహం చేసుకున్నారు. రెండవ వివాహం చేసుకోవడానికి ధర్మేంద్ర ఇస్లాం మతాన్ని స్వీకరించారు. హేమా మాలినితో ఆయనకు ఈషా డియోల్, అహానా డియోల్ అనే ఇద్దరు కుమార్తెలు ఉన్నారు.
ధర్మేంద్ర హిట్ సినిమాలు
ధర్మేంద్ర తన 65 ఏళ్ల నటనా జీవితంలో అనేక హిట్, సూపర్ హిట్, బ్లాక్‌బస్టర్ చిత్రాలలో నటించారు. షోలే (1975), చుప్కే-చుప్కే (1975), సీతా ఔర్ గీతా (1972), ధరమ్‌వీర్ (1977), ఫూల్ ఔర్ పత్థర్ (1966), జుగ్ను (1973), యాదోన్ కీ బారాత్ (1973) ఆయన అద్భుతమైన చిత్రాల జాబితాలో ఉన్నాయి. రాకీ ఔర్ రాణీ కీ ప్రేమ్ కహానీ (2023), తేరీ బాతో మే ఐసా ఉల్జా జియా (2024) ఆయన ఇటీవలి విడుదలైన సినిమాలు.
మరణానంతరం విడుదల కానున్న ధర్మేంద్ర చివరి చిత్రం
ధర్మేంద్ర మరణానంతరం ఆయన చివరి చిత్రం ‘ఇక్కీస్’ (Ikis) ఈ ఏడాదే విడుదల కానుంది. ఈ చిత్రంలో నటుడు, అమితాబ్ బచ్చన్ మనవడు అయిన అగస్త్య నందా తండ్రి పాత్రలో కనిపించనున్నారు. అగస్త్య నందా ఈ చిత్రం ద్వారా బాలీవుడ్‌కు పరిచయం కానున్నారు. ఈ చిత్రం డిసెంబర్ 25, 2025న థియేటర్లలో విడుదల కానుంది.
