Ustaad Bhagat Singh Censor : పవర్ స్టార్ పవన్ కళ్యాణ్ అభిమానులు ఎప్పుడెప్పుడా అని ఎదురుచూస్తున్న ‘ఉస్తాద్ భగత్ సింగ్’ చిత్రం విడుదలకు ముస్తాబవుతోంది. తాజాగా ఈ సినిమా సెన్సార్ కార్యక్రమాలను పూర్తి చేసుకుంది. సెన్సార్ బోర్డు ఈ చిత్రానికి ఎటువంటి కట్స్ లేకుండా ‘యూ/ఏ’ (U/A) సర్టిఫికెట్ను జారీ చేసింది. సినిమా రన్ టైమ్ను 2 గంటల 34 నిమిషాలుగా ఖరారు చేశారు. అయితే, పవన్ కళ్యాణ్ సినిమా అంటే చిన్న పిల్లల నుండి పెద్దల వరకు అందరూ చూడాలని ఆశిస్తారు, కానీ ‘యూ/ఏ’ సర్టిఫికెట్ రావడం పట్ల కొంతమంది అభిమానులు నిరాశ వ్యక్తం చేస్తున్నారు. సినిమాలో యాక్షన్ సన్నివేశాలు ఎక్కువగా ఉండటం వల్లే సెన్సార్ బోర్డు ఈ నిర్ణయం తీసుకున్నట్లు తెలుస్తోంది.
ఈ సినిమా తొలుత మార్చి 26న విడుదల కావాల్సి ఉండగా, ఇతర సినిమాల వాయిదా కారణంగా వారం ముందుకు జరిగి మార్చి 19న ఉగాది కానుకగా ప్రేక్షకుల ముందుకు రానుంది. పవన్ కళ్యాణ్ సరసన శ్రీలీల, రాశీఖన్నా కథానాయికలుగా నటిస్తున్న ఈ చిత్రంపై భారీ అంచనాలు ఉన్నాయి. అయితే, అదే సమయంలో విడుదలవుతున్న ‘ధురంధర్ 2’ నుంచి ‘ఉస్తాద్’కు గట్టి పోటీ ఎదురుకానుంది. ‘ధురంధర్ 2’ ఇప్పటికే పెయిడ్ ప్రిమియర్స్ మరియు బుకింగ్స్ విషయంలో దూసుకుపోతుండటంతో, హరీశ్ శంకర్ టీమ్ ప్రమోషన్ కార్యక్రమాలను మరింత వేగవంతం చేయాల్సిన అవసరం ఉంది. ట్రైలర్ మరియు టీజర్ ఇప్పటికే సోషల్ మీడియాలో సెన్సేషన్ సృష్టించగా, ఇప్పుడు అందరి దృష్టి ప్రీ-రిలీజ్ ఈవెంట్ పైనే ఉంది.
సినిమా విడుదలకు ముందు చిత్ర యూనిట్ ముందున్న ప్రధాన సవాలు ప్రీమియర్ షోల అనుమతి. ఆంధ్రప్రదేశ్లో ప్రీమియర్లకు సాధారణంగా అనుమతులు లభించినప్పటికీ, తెలంగాణలో పరిస్థితి కొంత సందిగ్ధంగా ఉంది. ఇటీవల ప్రీమియర్ టికెట్ల ధరల విషయంలో ఉన్నత న్యాయస్థానం సీరియస్ వ్యాఖ్యలు చేసిన నేపథ్యంలో, తెలంగాణ ప్రభుత్వం ఎలాంటి నిర్ణయం తీసుకుంటుందనేది ఆసక్తికరంగా మారింది. ప్రమోషన్లను స్పీడ్ అప్ చేసి, థియేటర్ల వద్ద సందడి పెంచేందుకు చిత్ర యూనిట్ ప్రణాళికలు సిద్ధం చేస్తోంది. పవన్ కళ్యాణ్ పవర్ ఫుల్ పోలీస్ ఆఫీసర్ పాత్రలో కనిపిస్తున్న ఈ సినిమా బాక్సాఫీస్ వద్ద ఎలాంటి రికార్డులు సృష్టిస్తుందో చూడాలి.