Vaikuntha Dwara Darshan : వైకుంఠ ఏకాదశి సందర్భంగా తిరుమలలో నిర్వహిస్తున్న వైకుంఠ ద్వార దర్శన ఏర్పాట్లపై హీరో విశ్వక్సేన్ భక్తులకు కీలక విజ్ఞప్తి చేశారు. డిసెంబర్ 30, 31 అలాగే జనవరి 1 తేదీల్లో దర్శన టోకెన్లు ఉన్న భక్తులే తిరుమలకు రావాలని ఆయన కోరారు. ఈ పది రోజుల దర్శన కాలంలో సామాన్య భక్తులకు ప్రాధాన్యం ఇస్తూ టీటీడీ విస్తృత ఏర్పాట్లు చేసింది. ఆన్లైన్ లక్కీడిప్ ద్వారా ఎంపికైన వారికే ఆ మూడు రోజులు సర్వదర్శనం ఉంటుందని టీటీడీ ప్రకటించింది. భక్తుల భద్రత, సౌకర్యాల కోసమే ఈ ఆంక్షలు తీసుకున్నట్లు అధికారులు తెలిపారు.
వైకుంఠ ఏకాదశి సందర్భంగా తిరుమల తిరుపతి దేవస్థానం శ్రీవారి భక్తుల కోసం విస్తృత ఏర్పాట్లు పూర్తి చేసింది. అత్యంత పవిత్రంగా భావించే వైకుంఠ ద్వార దర్శనానికి ఈ నెల 30వ తేదీ నుంచి జనవరి 8వ తేదీ వరకు పది రోజుల పాటు భక్తులను అనుమతించనున్నట్లు టీటీడీ ప్రకటించింది. ఈ పది రోజులూ సమాన పవిత్రత కలదని, ఏ రోజు దర్శనం చేసుకున్నా ఒకే రకమైన పుణ్యఫలం లభిస్తుందని టీటీడీ ఈవో అనిల్ కుమార్ సింఘాల్ స్పష్టం చేశారు. దర్శనానికి టోకెన్లు పొందిన భక్తులు తమకు కేటాయించిన సమయానికే తిరుమలకు చేరుకుంటే కేవలం రెండు గంటల్లోనే శ్రీవారి దర్శనం పూర్తయ్యేలా ఏర్పాట్లు చేసినట్లు తెలిపారు. రద్దీ నియంత్రణ కోసం ప్రత్యేక ప్రవేశ మార్గాలు ఏర్పాటు చేయడంతో పాటు, భక్తులకు ఎప్పటికప్పుడు సమాచారం అందించేందుకు ఆర్టిఫిషియల్ ఇంటెలిజెన్స్ ఆధారిత కమాండ్ కంట్రోల్ సెంటర్ను వినియోగిస్తున్నట్లు వెల్లడించారు.
ఈ పది రోజుల వ్యవధిలో ఆన్లైన్, ఆఫ్లైన్ మార్గాల ద్వారా మొత్తం 7 లక్షల 70 వేల మంది భక్తులకు దర్శనం కల్పించనున్నట్లు టీటీడీ వెల్లడించింది. దర్శన సమయంలో సామాన్య భక్తులకు పెద్దపీట వేసినట్లు ఈవో తెలిపారు. మొత్తం దర్శన సమయాల్లో ఎక్కువ గంటలను సాధారణ భక్తులకే కేటాయించామని, ప్రివిలేజ్, బ్రేక్ దర్శనాలను రద్దు చేసి కేవలం ప్రోటోకాల్ పరిధిలో ఉన్న ప్రముఖులకు మాత్రమే అవకాశం ఇస్తామని స్పష్టం చేశారు. అన్నప్రసాద కేంద్రంలో ఉదయం నుంచి రాత్రివరకు నిరంతరంగా ప్రసాదాలు అందించేందుకు ఏర్పాట్లు చేశామని, భద్రత కోసం భారీ సంఖ్యలో పోలీస్, విజిలెన్స్ సిబ్బందిని నియమించినట్లు వివరించారు.
ఈ నేపథ్యంలో టీటీడీ భక్తులను ఉద్దేశించి హీరో విశ్వక్సేన్ ఒక కీలక విజ్ఞప్తి చేశారు. డిసెంబర్ 30, 31 అలాగే జనవరి 1 తేదీల్లో తిరుమల దర్శనానికి వెళ్లాలనుకునే భక్తులు తప్పనిసరిగా ముందస్తు దర్శన టోకెన్లు ఉన్నప్పుడే ప్రయాణం చేయాలని ఆయన సూచించారు. టికెట్ లేకుండా వెళ్లడం వల్ల అనవసర ఇబ్బందులు ఎదుర్కొనే ప్రమాదం ఉందని, భక్తులు టీటీడీ మార్గదర్శకాలను పాటించాలని కోరారు. టోకెన్లు లేకుండా స్వామివారి దర్శనానికి వెళ్లి ఇబ్బందులు పడొద్దని, టీటీడీ సిబ్బందికి సహకరించాలని రిక్వెస్ట్ చేశారు. వైకుంఠ ఏకాదశి సందర్భంగా తీసుకున్న కఠిన నిర్ణయాలపై కొందరు భక్తులు అసంతృప్తి వ్యక్తం చేస్తున్నా, గతంలో జరిగిన తొక్కిసలాట ఘటనలను దృష్టిలో ఉంచుకుని ఈ ఆంక్షలు అవసరమని టీటీడీ అధికారులు వివరణ ఇస్తున్నారు. భక్తుల భద్రతే తమ ప్రధాన లక్ష్యమని స్పష్టం చేస్తున్నారు.
ఇక విశ్వక్సేన్ విషయానికి వస్తే, మాస్ కా దాస్గా తనకంటూ ప్రత్యేక గుర్తింపు సంపాదించుకున్న ఈ యువ హీరో ఇటీవల వరుస సినిమాలతో ప్రేక్షకులను అలరిస్తున్నాడు. విభిన్న కథల్ని ఎంచుకుంటూ ప్రయోగాలకు సిద్ధంగా ఉన్న విశ్వక్సేన్, నటుడిగా మాత్రమే కాకుండా దర్శకుడిగానూ తన సత్తా చూపిస్తున్నాడు. ఇటీవల లైలా, మెకానిక్ రాకీ చిత్రాలతో నిరాశపరిచిన ఆయన సరైన బ్రేక్ కోసం ఎదురుచూస్తున్నారు. యూత్, మాస్ ప్రేక్షకులను లక్ష్యంగా చేసుకుంటూ కంటెంట్ ఓరియెంటెడ్ కథలపై కూడా దృష్టి పెట్టిన విశ్వక్సేన్, తన కెరీర్ను మరింత బలంగా ముందుకు తీసుకెళ్లే ప్రయత్నంలో ఉన్నాడు. శ్రీవారి భక్తుడిగా, బాధ్యతాయుతమైన పౌరుడిగా టీటీడీ మార్గదర్శకాలను ప్రచారం చేస్తూ ఆయన చేసిన విజ్ఞప్తి ప్రస్తుతం సోషల్ మీడియాలో మంచి స్పందన పొందుతోంది.