Rekha Vedavyas హీరోయిన్ రేఖ వేదవ్యాస్ తాజాగా తన పెళ్లి విషయంపై మనసు విప్పారు. మొదట్లో వివాహంపై పెద్దగా ఆసక్తి లేకపోయిందని, కానీ కాలక్రమేణా జీవిత భాగస్వామి అవసరం అనిపించిందని తెలిపారు. అయితే తన అనారోగ్య పరిస్థితి కారణంగా పెళ్లి చేసుకోవడానిక ఎవరూ ముందుకు రావడం లేదని అన్నారు. ఆరోగ్య సమస్యలతో శారీరకంగా, మానసికంగా కుంగిపోయిన సమయంలో పెళ్లి ప్రయత్నాలు ఫలించలేదన్నారు. తొందరపడి నిర్ణయం తీసుకుని తర్వాత పశ్చాత్తాపపడే కంటే, ఆలస్యమైనా సరైన వ్యక్తి రావాలని ఆశిస్తున్నానని రేఖ పేర్కొన్నారు.
సౌత్ సినీ ఇండస్ట్రీలో ఒకప్పుడు అందం, అభినయంతో ప్రేక్షకులను ఆకట్టుకున్న హీరోయిన్ రేఖా వేదవ్యాస్ 2001లో విడుదలైన ‘ఆనందం’ సినిమాతో టాలీవుడ్కు పరిచయమైంది. శ్రీను వైట్ల దర్శకత్వంలో వచ్చిన ఈ చిత్రంలో ఆమె నటన యువతను విపరీతంగా ఆకట్టుకుంది. తొలి చిత్రంతోనే మంచి గుర్తింపు తెచ్చుకున్న రేఖ, ఆ తర్వాత తెలుగు, కన్నడ, తమిళ భాషల్లో వరుస అవకాశాలు అందుకుంది. ప్రధానంగా కన్నడ చిత్రసీమలో స్టార్ హీరోయిన్గా ఎదిగి 30కి పైగా చిత్రాల్లో నటించి తనకంటూ ప్రత్యేకమైన ఇమేజ్ సంపాదించుకుంది.
సినిమా రంగంలో బిజీగా ఉన్న సమయంలోనే రేఖ అనూహ్యంగా తెరమరుగు కావడం అభిమానులను ఆశ్చర్యానికి గురిచేసింది. ఇటీవల ఒక ఇంటర్వ్యూలో పాల్గొన్న ఆమె తన వ్యక్తిగత జీవితానికి సంబంధించిన విషయాలను వెల్లడిస్తూ భావోద్వేగానికి గురైంది. గత కొన్నేళ్లుగా అనారోగ్య సమస్యలు వేధిస్తున్నాయని, శారీరకంగా మాత్రమే కాదు మానసికంగా కూడా చాలా కుంగిపోయానని ఆమె చెప్పారు. ఆరోగ్యం బాగోలేకపోవడంతోనే సినిమాలకు దూరం కావాల్సి వచ్చిందన్నారు. ఒక దశలో మళ్లీ ఫోటోషూట్లు చేసి, సినిమాల్లోకి రీఎంట్రీ ఇవ్వాలనుకున్నప్పటికీ ఆరోగ్య పరిస్థితి సహకరించలేదని తెలిపారు.
పెళ్లి విషయంపై కూడా రేఖ ఓపెన్గా మాట్లాడారు. హీరోయిన్గా ఛాన్సులు అందుకున్న సమయంలో వివాహంపై పెద్దగా ఆసక్తి లేకపోయిందని, కానీ వయసు పెరుగుతున్న కొద్దీ జీవిత భాగస్వామి అవసరం అనిపించిందని తెలిపారు. అయితే తన ఆరోగ్య పరిస్థితిని చూసి సంబంధాలు ముందుకు రాకపోవడం బాధ కలిగించిందన్నారు. తొందరపడి తప్పు నిర్ణయం తీసుకోవడం కంటే ఆలస్యమైనా సరైన వ్యక్తి రావాలని ఆశిస్తున్నానని ఆమె చెప్పారు. బయటకు సినిమా జీవితాలు రంగులమయంగా కనిపించినా, వ్యక్తిగతంగా ఎన్నో కష్టాలు, ఒంటరితనం ఉంటాయని ఆమె మాటల్లో స్పష్టమైంది.
తెలుగులో రేఖ నటించిన సినిమాలు ప్రేక్షకుల్లో మంచి క్రేజ్ సంపాదించాయి. ‘దొంగోడు’, ‘ఒకటో నెంబర్ కుర్రాడు’, ‘జానకి వెడ్స్ శ్రీరామ్’, ‘అనగనగనగా ఓ కుర్రాడు’, ‘జాబిలి’, ‘ప్రేమించుకున్నాం.. పెళ్లికి రండి’ వంటి చిత్రాల్లో ఆమె నటన ప్రత్యేకంగా నిలిచింది. కన్నడలో వరుస విజయాలతో స్టార్ హోదా దక్కించుకున్న రేఖ ఒక దశలో సౌత్ ఇండస్ట్రీలో డిమాండ్ ఉన్న హీరోయిన్గా గుర్తింపు పొందింది. అయితే వరుస పరాజయాలు, ఆరోగ్య సమస్యలు కలిసి ఆమె కెరీర్కు బ్రేక్ వేశాయి. 2014 తర్వాత సినిమాల్లో పెద్దగా కనిపించని రేఖ, అప్పుడప్పుడు టీవీ కార్యక్రమాలు, ఇంటర్వ్యూల ద్వారా మాత్రమే అభిమానులకు టచ్లో ఉంటున్నారు. ఇటీవల ఓ టీవీ షోలో నటుడు వేణు తొట్టెంపూడితో కలిసి పాల్గొన్న రేఖను చూసి అందరూ షాక్కు గురయ్యారు. ఒకప్పుడు క్యూట్ లుక్తో మెరిసిపోయిన ఆమె బక్కిచిక్కిపోవడం అభిమానులను కలవరపరిచింది. రేఖ ఆరోగ్యం త్వరగా మెరుగుపడి, మళ్లీ పాత ఉత్సాహంతో ప్రేక్షకుల ముందుకు రావాలని అభిమానులు ఆకాంక్షిస్తున్నారు.