‘ది రాజా సాబ్’, ‘మన శంకర వరప్రసాద్ గారు’ చిత్రాల‌కు గుడ్ న్యూస్‌!

The Raja Saab: తెలంగాణ చలనచిత్ర పరిశ్రమలో గత కొన్ని రోజులుగా టికెట్ ధరల పెంపు వ్యవహారం పెద్ద చర్చకు దారితీసింది. ముఖ్యంగా భారీ బడ్జెట్ చిత్రాలకు ప్రభుత్వం ఇచ్చే ధరల పెంపు జీవోలను (G.O) కోర్టులు సస్పెండ్ చేయడం నిర్మాతల గుండెల్లో రైళ్లు పరిగెత్తించింది. కొన్ని రోజుల క్రితమే, ‘అఖండ 2’ సినిమా టికెట్ ధరల పెంపుపై తెలంగాణ ప్రభుత్వం జారీ చేసిన ఉత్తర్వులను హైకోర్టు సింగిల్ బెంచ్ జడ్జి నిలిపివేసిన సంగతి తెలిసిందే. ఇదే విధమైన పరిస్థితి ‘గేమ్ ఛేంజర్’, ‘ఓజీ’, ‘పుష్ప 2’ వంటి భారీ చిత్రాల విషయంలోనూ ఎదురైంది.

ఈ నేపథ్యంలో రాబోయే సంక్రాంతి రేసులో ఉన్న భారీ చిత్రాలు ‘ది రాజా సాబ్’ (ప్రభాస్ నటించిన చిత్రం), ‘మన శంకర వరాప్రసాద్ గారు’ చిత్రాల నిర్మాతలు అప్రమత్తమయ్యారు. సినిమా విడుదలైన తర్వాత న్యాయపరమైన ఇబ్బందులు తలెత్తకుండా ఉండేందుకు వారు ముందస్తుగానే హైకోర్టును ఆశ్రయించారు. టికెట్ ధరల పెంపు, ప్రీమియర్ షోల నిర్వహణకు అనుమతి ఇవ్వాలని వారు కోర్టును అభ్యర్థించారు.

హైకోర్టు సానుకూల స్పందన- స్పష్టత

నిర్మాతల విన్నపంపై హైకోర్టు సానుకూలంగా స్పందించింది. గతంలో తాము ఇచ్చిన స్టే ఉత్తర్వులు కేవలం ఆ సమయంలో విడుదలైన సినిమాలకు మాత్రమే వర్తిస్తాయని కోర్టు స్పష్టతనిచ్చింది. అంటే పాత సినిమాల విషయంలో తలెత్తిన న్యాయపరమైన అడ్డంకులు భవిష్యత్తులో విడుదలయ్యే సినిమాలపై ప్రభావం చూపవని ధర్మాసనం స్పష్టం చేసింది. ఈ వివరణతో సంక్రాంతికి విడుదల కాబోతున్న ఈ రెండు పెద్ద సినిమాలకు ఉన్న ప్రధాన చట్టపరమైన అడ్డంకులు తొలగిపోయినట్లయింది.

Also Read: కేంద్ర బడ్జెట్ 2026.. ఆదివారం బడ్జెట్ ప్రవేశపెట్టే అవకాశం?

ప్రభుత్వ నిర్ణయంపైనే అందరి దృష్టి

కోర్టు నుంచి సానుకూల స్పందన రావడంతో ఇప్పుడు బంతి తెలంగాణ ప్రభుత్వం వద్ద ఉంది. నిర్మాతలు ఇప్పటికే సమర్పించిన టికెట్ ధరల పెంపు, ప్రత్యేక షోల విన్నపాలను ప్రభుత్వం పరిశీలించాల్సి ఉంది. ఈ చిత్రాల భారీ బడ్జెట్, పంపిణీదారుల ప్రయోజనాలను దృష్టిలో ఉంచుకుని ప్రభుత్వం త్వరలోనే అనుకూలమైన జీవోను జారీ చేస్తుందని సినీ వర్గాలు ఆశిస్తున్నాయి.

సంక్రాంతి సీజన్ అంటేనే టాలీవుడ్‌కు అతిపెద్ద వ్యాపార సమయం. కోర్టు క్లియరెన్స్ రావడంతో ది రాజా సాబ్, మన శంకర వరాప్రసాద్ గారు చిత్ర బృందాలు ఊపిరి పీల్చుకున్నాయి. త్వరలోనే అధికారికంగా టికెట్ రేట్ల పెంపు ప్రకటన వచ్చే అవకాశం ఉంది. అభిమానులు, ప్రేక్షకులు బుకింగ్స్ కోసం ఎదురుచూస్తున్నారు. ఈ సినిమాల వసూళ్లపై టికెట్ ధరల ప్రభావం ఎంత ఉంటుందో చూడాలి.